那些年，當香港仲係百鬼夜行既時代: 20. 鎖羅盤XVIII – 中元二品郝罪地官

就係咁，我就眼定定望住兩個師叔死係我面前。 「哼，細路你唔係以為你啲火真係可以傷到我兩隻黑白凶下話?我用佢地條命做餌黎掩護我，好等我容易D埋你班傻仔身咋!哈哈哈哈...」 兩位師叔雖然同我無咩交情，但係始終有人死係你面前既感覺係絕對唔好受，尤其是上一秒仲同你講緊野既人。 師父唔顧自己既腳傷，竟然一下子向前暴衝，將我拉離劉伯溫既肉身既攻擊範圍。「估唔到你竟然變成有思維既旱魃。難怪呢到一帶既村莊都變死村。係呢塊連旱魃都養到既絕頂陰地到建陽宅同晚晚訓棺材板無分別，人氣一定早已經比你呢隻老妖怪吸盡。」師父即使死左兩個師兄，但係都仲可以好冷靜咁講呢番說話，就知道師父對為左殺死劉伯溫呢個狗賊係幾咁執著。 旱魃，係最早期記錄係山海經中既怪物之一，佢地既初代係黃帝之女。傳說中，蚩尤戰敗予黃帝，係戰敗被俘時曾經詛咒過黃帝一族，要佢地不得好死，到最後黃帝之女死於意外，而黃帝又陰差陽錯咁葬左佢個女落一塊極品養屍地，結果佢個女就變成呢種不人不鬼既殭屍之王。而佢地一出現多數會引起方圓百里都發生旱災，所以民間自古而黎就有打旱魃呢個習俗。 一聽到旱魃呢個詞，我不由得先集中眼前景物，將悲傷放下。眼前既劉伯溫同佢以魂見我地既形態極度唔同。依家既佢雙頰下陷，眼窩空洞，眼珠應該一早已經比蟲子等食左，頭髮更加只係得返幾條。「我已經係旱魃，殭屍之王，我就睇下你地今次點走得出我既手指罅!」 照理黎講，旱魃有銅皮鐵骨，好難打入。殭屍扎記中曾記錄清朝一次收服旱魃既過程。清朝當年為左捉一隻旱魃，竟然動用左六百枝火統，最後犧牲左三百幾人先將隻旱魃轟殺至渣。先唔好講人數，我同師父依家連槍都無枝，咁試問又點可能用科技去滅左佢? 「哼，今次一仔你企埋一邊，為師親自出手滅佢肉身!」師父踏前一步，兩手皆放係厚重既外套入邊。 「你憑咩呀?你連我四神都唔夠打呀，最後要個徒弟出手先滅到我兩魂五魄。」劉伯溫狀甚輕鬆，甚至竟然舔一舔自己沾滿師叔鮮血既雙手。  「絕技又點會一早出?一早出既又點叫得絕?」師父冷笑一聲，不過我真係唔知原來師父仲留有一手絕技。「要滅你肉身除左要用火燒仲可以點?用土掩囉。等你無得重見天日，我再落符鎖死你係呢到。」 師父抽出三張奇怪既黃土符同兩張頑金符。點解我會話黃土符奇怪呢?咁係因為黃土符竟然咩都無寫。師父唔係呢個時間抽錯空符下話!? 但係師父自信滿滿，竟然開始念起咒上黎!而佢所聚集既四星宿竟然消散左。星宿唔見左就只係得一個解釋，就係師父竟然請走左北陰鬼帝!無左北陰鬼帝我地仲點可能同呢個人間一代鬼王國師戰鬥!?但係師父好似一啲都唔在符，佢只係著意自己既手印同埋罡步。以師父能力去請神竟然要唸咒，五符齊出，結手印，踏罡步，睇黎呢個神同北陰鬼帝絕對唔會同級! 「上清虛，急召神，激大地，貫上下，跪請中元二品郝罪地官大尊降駕人間!」