那些年，當香港仲係百鬼夜行既時代: 18. 鎖羅盤XVI – 黑白雙凶

五行生生不息，互相制衡。係道術既世界中，無野係無敵。呢隻花蓮子所擺既陣都唔會例外。但係，我不期然對接下黎既路程開始擔心起黎。因為迎接我地既已經係一隻有返咁上下程度既湘西花蓮子，咁愈近劉伯溫肉身既墓室咪愈危險!? 我扶住師父，開始再踏上呢個吉凶未知既旅途。我地小心翼翼咁慢慢前行，一步一小心，始終墓中既致命陷阱，機關不少，一個唔小心就會命喪於此。咩鐵飛鏢都係小兒科，最恐怖既係一啲地型戰，以地型黎擾亂人，令人迷失於其中。招數同打牆鬼差唔多，但係問題係只要我地可殺死隻打牆鬼就可以破幻境，但係墓中地型陷阱呢...就難破得多。 「師父，點解呢到會有隻花蓮子既呢?而堆積如山既屍體又咩料?」我打破空氣中既沉默，首先開口，提出我同頭先班盜墓一族戰鬥時既疑問。劉伯溫明明就係明朝既一代天師，照理係會幫駕崩既皇帝搵墓，建墓，安排一切佢既身後事，理應同盜墓一族勢成水火架喎，但係頭先個班盜墓人又好似想阻止我地入墓，幫佢守衛緊咁既?真係好怪..... 「嘿，你估明朝國師好好搵?明朝既制度利民不利臣，真係好窮好窮既人先去做大臣架咋，好似朱元璋咁，窮人先會攞條命去搏，打仗爭皇位。所以當時大部份既大臣都會有其他既兼職黎搵多D錢。而劉伯溫就因利成便，好自然地會知道好多皇帝既墓啦...佢自己唔方便出手，咪請人去盜佢地D墓囉。唔係邊得黎咁風光?所以佢可能係死前以祕法去將呢班盜墓賊整成自己個墓既守衛，你話嘞，邊有盜墓人會比起呢班人更強?佢打算以盜墓人制盜墓人呀!」 嘩真係估佢唔到喎!做國師做到盜自己起既墓! 「轟....」嗯?咩聲黎!?正當師父解答左我既問題，我地係墓中一路前進時，突然聽到又一啲奇怪既聲音。

個D轟隆聲由前方傳過黎，而且係轟聲停左落黎之後，又好似傳黎一啲打鬥聲。 「肯定係你師叔佢地出事啦!快啲過去先一仔，唔好理我住!」師父面色大變，不停推我前行。 雖然我覺得係呢時候離開師父唔係咁好，但係我唔敢逆師父意，所以馬上轉身就開跑。而且師父身邊仲有四星宿，應該無問題既。 我一路上慢跑，而打鬥聲就開始愈黎愈大。黑暗中我見到有四個人影前埋一齊，明顯地有兩個人係佔緊上風，佢地不停壓住另外兩個人黎打，個兩個比人禁住打既就好似體力不支，比人不停用連環拳打中。個兩個佔上風既人會唔會就係我師叔呢?我無多想，佢地佔到上風當然好啦，我可以輕輕鬆鬆咁係旁戰，但係如果佢地係下風個兩個....我心裏一沉。我腳步當下立即再加快，並向天祈求師叔們係佔上風個兩個人。 可惜事與願違。我好快就黎到戰場範圍，亦好快就見到帝師叔比人一拳打飛。而王希師叔就半跪係地下，渾身都係未乾既血。攻擊師叔既人一黑一白，企得好直，我睇唔到佢地個樣，只係見到佢地既服裝唔係現代既服裝，似係明朝官服黎。

「師侄走呀!佢地係黑凶白凶黎!」