那些年，當香港仲係百鬼夜行既時代: 17. 鎖羅盤XV – 破陣

語音剛落，頭先訓係地下既屍體竟然一個一個咁爬返起身!湘西...!?湘西最著名既當然就係操屍匠，唔通呢個花蓮子既絕技係操屍!? 地上既屍有序不亂地爬起身，驟眼睇好似無咩特別既起法包含係其中，但係我學過陣法，就知道佢地擺緊陣。係一種叫做天仙陣既陣法。天仙陣同天仙局差唔多，係一種利用接近所有可以利用既野黎擺陣。牆身，天花，地板，屍體等等。呢種既陣如果成左形，相信就好難破陣，因為個陣可以用哂所有既地形，甚至敵人自己黎幫手防禦。而陣則分有陣眼陣腳陣頭陣尾，要破一個陣，首先要攻破陣頭，強拆陣腳，再直取陣眼。而陣尾就只係令敵人搵唔到陣頭係邊既姐，即係簡單黎講，陣尾係無用既。 哼，以為咁就難到我?我手中仲有一張燎原火符，我一次過燒死哂你地都仲得呀!駛咩理邊個係陣頭，邊個係陣眼!?我暗中抽出符咒。 但係係我將張符咒抽出左一半時，一隻溫暖既大手按左係我捏緊符咒既手上邊。 「唔好用住。你可唔可以成個墓燒左佢?如果唔得，你又點傷到佢地分毫?」 師父知我想做咩，出手提醒左我。丫係喎，我無火德真君幫忙，燎原火既威力只可以足夠燒死一隻笨白虎架咋喎。 但係說時遲，那時快，未及我收返好道符，以摸金校尉所組成既殭屍大軍已經開始形成天仙大陣。 咦，點解陣中清一色摸金校尉呢既?正當我悶納緊點解天仙大陣只係得摸金校尉，唔見左班發丘中郎將時，我忽然聽到左右兩邊牆有啲奇怪既聲!沙沙沙沙...咩聲黎?點解好似有人掘緊野咁? 但係一秒之後，我就知道個啲聲係點黎。就係電光石火間，兩隻發丘中郎將突然從左右兩邊破牆而出! 摸金校尉一派本屬尋龍點穴之士，生前一定有修煉陣法一道，所以由佢地再起陣就最適合不過。而發丘中郎將其實只係等摸金校尉確定到墓穴既位置再開始幫手發掘，所以破墓牆，解機關佢地反而先係最有心得。 識分工合作黎夾擊我地，呢個花蓮子睇黎真係唔弱，至少有啲腦，不過我唔發火你當我係病貓? 「地面萬物，尊水為父，洪洪大水，苦海飄浮!淹!」 我抽出三張我自己買返黎既冰藍水冷符，發動大洪水咒。點解我要用我唔熟悉既水咒都唔係用火咒?因為水係五行中最為靈動，可以作出無死角既攻勢! 語音剛完，身邊兩隻中郎將立即中招。佢地比以靈力化成既大水衝擊，頓時五臟六腑俱裂爆體而死。而面對靈力海，天仙陣都無處可逃，為首既一隻身材壯健既摸金校尉比海浪打立即向後直飛，直至撞上墓壁先停低。而陣中其餘既陣腳等都一沖而散。陣不成陣，頓時潰敗。無錯，除左以最傳統既方法去破陣，係陣法學中仲有一招以最霸道既方法去破陣。呢招係強拆，一口氣掃清敵人。 哼，我強拆左你個陣睇你仲有咩方法去抵擋我地!