那些年，當香港仲係百鬼夜行既時代: 16. 鎖羅盤XIV – 湘西花蓮子

佢既聲音係長長既墓道到迴響不絕，聲音時大時小，我根本判斷唔到聲音係係邊到傳出黎。 我決定當聽唔到，繼續使用法力去驅動追魂符，我唔可以因為一啲未知是友是敵既野而影響我搵師父，師父已經受左傷，佢未必頂得住。但係就係我下定決心既時候，我隻腳就忽然比隻白骨手捉住左!隻手既力度唔算好大，但係已經足夠令已經飽受驚嚇，承受緊巨力壓力既我尖叫起上黎。「邊個!?放開我呀!」我用另一隻腳踢去比人捉住既個隻腳到。但係我乜都踢唔到，唯一踢到既就只有空氣，但係我好清晰見到係有隻手捉住我。 忽然，墓道到陰風四起。我停左踢腳，因為我感覺到墓道中好似唔至我一個人。我感覺到有一道寒氣由我背脊直升到我頭頂。我慢慢擰轉頭望向我既背後。原本只係墓牆既地方依家..依家竟然變左一隻帶有極重陰氣既女鬼企係到!而隻女鬼後邊竟然仲有另一條路! 唔係掛?明明我行經過既時候，個到只係得一面牆架咋喎?又係打牆鬼?但係打牆鬼應該唔會現哂成個真身出黎架喎...佢只能依附牆中生活...呢隻女鬼到底係咩黎!? 「嘻嘻嘻...哥哥黎陪我玩啦。」隻女鬼竟然向我慢慢招手!佢隻白骨手係空中無力地上下擺動，而佢雖然係一路嘻嘻嘻咁笑，但係面上完全毫無笑容，最顯眼就只係得佢流緊血淚既雙眼。佢既雙眼令我諗起當初見到阿雪既場境，阿雪第一次出現都係流住血淚。唔知係咪因為咁既原因...我竟然慢慢一步一步咁向前行..行去佢個到，而隻女鬼就一路向墓道既深處漂。阿雪，我對你唔住...唔係我咁無能你就唔使死...唔好走啦... 「一仔!」背後忽然響起一聲暴喝。 比女鬼迷惑住既我當即打左個激靈，停下腳步。咦，我係到做緊咩!?我重新審視隻女鬼。呢隻女鬼點會係阿雪!?阿雪已經走左啦!唉... 「四天星宿滅妖!」背後又再傳黎一把雄厚既聲音。 我調轉一望，就見佢師父企係墓道既盡頭，身邊只有兩隻星宿保護住，因為另外兩隻已經飛身而出，直撲隻女鬼。見到師父無事，我當然心神振奮，三步併作兩步跑返去師父既身邊。 走近啲睇，原來師父唔比我既情況好好多。我就斷左左手，而師父隻右腳行路時就一拐一拐咁，睇黎都係受左傷。「你又跟埋黎。」師父用手拍一拍我個頭，但係睇得出佢唔係嬲，係開心，因為至少知道自己個徒弟無死到。「個隻女鬼係模金校尉中既花蓮子，所以你比佢迷惑到係正常。」 花蓮子!我心中一驚。花蓮子就係曹操時代，發丘中郎將同摸金校尉既統領者，佢地多數身懷奇技，我曾聽過一啲花蓮子既尋龍點穴手法百發百中，從來無試過搵唔到墓黎盜，亦有啲花蓮子對墓中陷阱，機關，結構十分熟悉，甚至熟過自己家中既擺設。而更多既係陰氣甚重，鬼都怕左佢，甚至有啲可以聚百鬼幫佢掘墓，殺盡墓中守靈。而同緊星宿戰鬥既女花蓮子睇黎就係後者呢種，唔係身上陰氣點會咁重!? 就係隻花蓮子節節後退，眼看就黎要比星宿打敗時，佢忽然用佢把尖到不行既聲大叫。 「湘西花蓮子豈容你幾隻畜生玩弄!摸金一族，中郎將，重召人間!」