那些年，當香港仲係百鬼夜行既時代: 15. 鎖羅盤XIII -- 怪墓

係唔知過左幾耐之後，我終於醒左。我起身第一眼就望到離龍火鳳所造成既破壞。雙上古神獸既破壞力果然唔講得小，一大片既村屋比佢地燃燒殆盡，甚至連灰都無，彷彿係塊黑色，被燒焦既空地上根本從來都無屋。而劉伯溫同三神都唔見左。睇怕已經比離龍火鳳燒到煙消雲散啦。 咦，係喎!師父呢!?係我同劉伯溫開打之前都仲見到師父架喎! 我係村屋既瓦礫中左搵右搵。唔見師父。原因得一個既姐，師父起身走左囉!我一諗到呢到，我就感覺莫明既興奮，師父無事啦!但係...但係師父無事又點解唔叫醒我，而係自己一個走左去?係喎...唔合邏輯喎....我一諗到呢到，熾熱既心又再次冷卻返落黎。 唔通...!?係啦，雖然我搞掂左劉伯溫既魂魄，但係仲有佢既肉身未破!師叔都曾經講過話只破魂魄而不破肉身係無用架!劉伯溫依然可以再重新修煉，繼續為禍人間。咁師父肯定係怕耽誤時間，所以先出發去劉伯溫既墓到! 好，一諗到個合理既解釋，我當下即磨拳擦掌，準備出發?既然頭先請神，喚離龍火鳳咁危險既野都比我安然渡過囉，我仲有咩好怕丫! 我企返起身拍一拍身上既灰塵。唉，唔應該著白色衫出黎，依家變左黑色，返去實比雨瑤鬧死我。 沿住同一條羊腸小徑，我好快就行到去同帝師叔，王希師叔分手既個到。原本平整既地下赫然變左一個洞口。洞口四四方方，睇黎係用工具黎挖掘出黎。有工具去掘墓既人唔係師叔們仲有邊個!?睇黎個班惡鬼奈唔到識陣法既王希師叔咩何。 我整理一下思緒，開始爬落劉伯溫個墓到。一落地，我就發覺地下好似軟綿綿咁，有D彈力。我好奇向地下一望。 嘩!死屍!唔止一條死屍!成條墓道都鋪滿哂死屍!雖然我係比死屍群嚇左一大跳，但係始終我學法既又點會無見過死屍?所以好快，我就冷靜返落黎，仔細觀察下比我踩住既個條死屍。佢身穿古代服，但係奇怪地容貌竟然好似岩岩先死咁。嗯?有塊金牌既?我係屍首既頸上摘下左一面金牌。 嗯...上邊寫住...摸..摸金校尉....我再搵一搵條死屍附近D屍身體。果然，除左搵到一啲相同模樣既牌之外，我仲搵到發丘中朗將既令牌。 呢兩種既職業係相傳源自於三國既曹操。話說曹操當年無咩錢，養唔起D軍隊，所以就特意設立呢D官職去盜先人既墓，以便可以搵到值錢然後轉賣去填補軍餉既不足。當年既摸金校尉最威就係掘到梁孝王既墓，轉賣墓中既財物得黎既錢財，足足幫曹操養左三年兵。所以呢一派之能真係唔能睇少，而係之後仲愈做愈大，好似仲話大陸有本書都係以佢地黎做藍圖，著力描寫摸金校尉既能力同佢地一派既特色。  但係摸金校尉同發丘中朗將並唔係我既目標。我掉左手中既令牌，繼續一路向前。係黑暗中既墓道踏出每一步都會令人心驚膽顫，因為你唔知有咩機關等緊你.... 其實我都唔確定師父佢地行左邊條路，因為按正常墓構黎講，呢條應該係主墓道黎，所以無論我行盜洞既左定右邊通道，最後都一定會通到去主墓室中。不過，呢個墓係劉伯溫既墓。佢咁多年以黎都一路怕我地去盜佢肉身，所以呢個墓應該唔會正常，甚至我行緊既呢條睇落好長好闊既路都唔一定係主墓道。 正當我想抽出綠木幽光符去使出追魂術，去探下師父佢既活人魂係邊時，我忽然聽到一個女子既聲音。佢把聲好尖，好陰柔.... 「嘻...嘻..嘻嘻嘻嘻嘻嘻嘻嘻......又有人黎啦...嘻...」