那些年，當香港仲係百鬼夜行既時代: 14. 鎖羅盤XII – 激戰II

係模糊中，我突然聽到一聽巨響。

 「踫!」 我即刻成個人醒神哂。我雖然感覺成個人都仲係好似比火燒緊咁，但係已經無左辛苦既感覺，只係覺得有啲熱。我再拍一拍自己個頭，頭痛既感覺已經消退得七七八八。抬頭一望，只見到村屋既牆身穿左一大個窿，石灰猛甩，搞到我一身既灰塵。 「無啦啦點解有個窿既?」黑暗中既我係到自言自語，但係好快我就搵到答案。因為呢間村屋中唔係只係得我一個人，仲有一個人直挺挺咁訓左係地下。我心中突然浮出一個不妙既念頭。唔通個個人係師父!?我依家心亂如麻，眯起雙眼用力前望。 完了。除左滿身傷痕之外，呢個的而且確係師父黎。 師父奄奄一息咁訓係地下，但係好彩，心口仲係一起一伏，應該仲有呼吸既。而我背後又響起一陣刺耳既笑聲。唔駛講，呢把聲唔係劉伯溫仲可以係邊個? 我從村屋既窟窿望返出去戰場。劉伯溫漂係空中，比青龍玄武朱雀包圍住，係到放懷地大笑。「輸得比我一次就自然會輸第二次架啦，御鬼門喎!哈哈哈哈....」 我抽出兩張真紅符，「御鬼門唔到你呢隻狗賊侮辱!」我當下十分憤怒，有咩理由偷完人師祖既墳仲可以理直氣壯?有咩理由打傷人仲可以大笑?語畢，氣極既我伸腳向前踏出一步。一踏前一步，頭又開始痛起上黎，唔單止頭痛，全身仲好似比無數隻隱形之手將我向後猛拉咁，扯到我全身上下所有肌肉都就黎要撕裂。我知道又係神力作崇，但係我又可以點做?唔通真係企係到原地，睇住佢走?我已經下定決心，即使我要犧牲我既生命都要做低佢!! 我承受一步一劇痛，勉強踏出左三步。手中既真紅火符比我捏到巢哂。正當我就黎頂唔到神力既侵襲，要再次暈倒時，腦中忽然響起一把聲。把聲好空洞，好似完全無生氣咁。 把聲無講到啲咩，只係不停同我講「三步朝陽，離龍火鳳，陣列在前，逐魔滅妖，捍衛人間!顯現!」呢一句符文。呢句係咩符文黎?我無聽過師父提起，我只係知道，以兩個字黎作收結既就一定唔係普通既符文。 雖然我未聽過呢把聲，唔知道聲既主人係邊個，但係我決定相信佢。腦中不停重覆既咒語就從我口中大聲吟誦左出黎。 「三步朝陽，離龍火鳳，陣列在前，逐魔滅妖，捍衛人間!顯現!」 語音畢落，左右手中所持既兩張真紅火符紙當下立即自燃。須臾間，左手既符紙燒盡後變成離龍，而右手既就變成火鳳。 離龍，傳說中係眾龍之祖，其形之威乃後世之龍不能相比擬，四神之一既青龍係佢既後代。火鳳，傳話中乃係同離龍一同戰鬥既鳳凰，乃朱雀之先祖，朱雀為其後六代。 我一召喚出離龍火鳳出黎之後，我忽然感覺到全身好似無哂力咁，火德真君既神力竟然一下子比離龍火鳳抽光。唔單止火德真君既神力，連我本身自己既道力都比佢地快速抽光。 我終於不支倒地。係我合埋眼前既一刻，我見到離龍以極速纏死左青龍，而火鳳既火唔單燒死朱雀，仲波及埋劉伯溫同玄武呢隻笨重既大烏龜。 完了?我既使命完了?