那些年，當香港仲係百鬼夜行既時代: 11. 鎖羅盤IX -- 白虎

白虎沖住我發出一聲撼天動地既咆哮。迷霧中既佢後腳一發力，瞬間就將我同佢既距離拉近左十步!好，既然係咁我就拖住你先!我立即從村屋中既一個小小窗口鑽左入屋，屋中一片黑暗。我好快就搵到通上頂樓既樓梯，手腳並用咁爬左上去。就係我岩岩上到二樓個時，我就見到我原本鑽入黎既個個窗口已經唔見左，取而代之既就一個好大既窟窿。白虎神好似一尊雕像一般，好有威嚴咁企係窟窿旁。 我當然再加快速度爬上三樓。始於人只有兩隻腳，唔及白虎有四隻腳可以跑得咁快，要拖延佢，就只有用以空間換取時間呢招。咁狹隘既通道佢自自然然好難發揮出本身既速度，限制到白虎最為自豪既速度，就自然可以令我有機可乘，可以拖住佢，甚至擊敗佢! 當我爬到上三樓時，白虎都勉強跟到上黎二樓。佢龐大既身軀幾乎爬唔到上條樓梯到。 雖則我有地利，但係對手始終係四神之一，我唔敢鬆懈落黎，諗到呢到，我當即係天台跳過去右手邊另一棟村屋既天台。望落地下，只見一隻又一隻既動物飛身撲過去朱雀等神既身上，但係其餘三神應付得都唔算辛苦。反觀師父，佢已經開始有啲吃力，聚集靈宿既速度好明顯咁慢左落黎。頂住呀師父! 白虎既咆哮聲又係我左邊響起，睇黎佢已經開始有啲唔耐煩，身為神獸，竟然比一個人類玩弄。就好似李嘉誠為求一特別之物而比個窮人侮辱既感覺一樣。 我唔敢再逗留，我不停係一間接一間既村屋天台不停咁跳。以前圍村既村屋中間所隔甚近，基本跨大步少少都可以過到另一間村屋。就係咁，我一路跳，有時又跑返落地下屋過屋，竟然避過左白虎既無情追殺。但係屋既數目始終有限，係我過左十幾間屋後，我黎到鎖羅盤村既外圍，近森林既範圍。 我停左係樹林前面，諗緊好唔好入去。頭先D屋用石屎做，就話夠硬可以抵擋到白虎既衝撞姐，但係森林D樹林容乜易比佢掃冧哂?無左障礙物，佢好快就可以追到上黎。我突然又諗起隻奎木狼。我當下打一個冷震，媽呀，我唔想死得咁肉酸呀!! 我抽出身中所有既符咒。我有師叔比既一啲已經寫好左既紅符，而我自己帶既紅符就已經用哂，仲有一啲冰封咒符，一啲師叔比既藍符，同埋一啲追魂符同師叔比既綠符。至於金符，我係唔敢郁佢地。師叔比個D到底係咩符!? 符既威力除左符紙會影響到之外，符既複雜性都會。威力頗強既神雷火符，上邊僅有五筆，但係師叔比既就足足有三十幾筆!到底係咩符，此符一出豈不是天地為之崩塌!?我不停回想我學過最難既符咒，但係我諗到最難既都只有十六筆。 我本想從符上既咒文嘗試解讀一下到底符紙上寫咩，但係一把熟悉又令人毛骨悚然既聲音又再係我背後轟然而起。 唔使講，白虎肯定再追到上黎啦!