那些年，當香港仲係百鬼夜行既時代: 10. 鎖羅盤VIII – 拖延

四神，同時亦稱四象，佢地係靈獸中最高級，天地間所有靈獸都係由佢地管轄。對住天屍鬼，我地就話可以以一物治一物既方法去剋制佢，但係呢四神...睇怕要請玉皇大帝黎先可以壓得住佢地。無可能，人力終究唔能夠勝天道，四神已經係人力可以召喚既最高級神靈之一。 「到底劉伯溫係師祖墓中偷左D咩卷軸出黎...點解可以召喚到四神助戰....」今次真係大勢已去，連師父都講出一番咁絕望既說話...但係絕處逢生亦係同時師父可以係香港呢個百鬼夜行既地方生存咁耐既能力之一。 師父所請既北陰豔都中鬼帝同四獸其實係差唔多級數，只不過中鬼帝係地府之王，上到黎人間未必有著數。 「一仔，我地依家唯有盡量拖，只要兩位師兄破壞左佢既肉身，佢法力就會大減，到時莫講話要四神聽命於佢，佢到時甚至連天屍鬼都控制唔到。」師父突然壓低聲音，眼睛死盯住劉伯溫咁同我講。 我點點頭，既然要拖延時間，體力一定係最重要，其次就係一啲擾亂人地既招數，再其次就係一啲障眼法。擾亂到四神既方法大把，但係我唔識。障眼法?我啲障眼法連雨瑤都呃唔到..點呃到呢個識引走我地，令我地分散左戰力既劉伯溫? 師父再次催動法力聚集十六星宿，只係今次醒目左。既然翼火蛇係由南方朱雀所管，咁今次咪反攻北方既玄武囉。即使實力相距甚多，但係如果只係拖延佢地都仲可以既。

而我唔識聚神喚獸，我當然係打返體力戰。 「 無上五行，三魂永久，天罡護身，出幽入冥 ，為吾開路!急召土地護我身!」我低聲喝道。黃土符開始自燃起黎，睇黎土地係應我要求出黎了。 土地係大地之神，即使我受左D咩傷，佢都可以幫我分擔一下，用法力吸受部份傷害。我事前唯一擔心既就係，鎖羅盤村呢到多年無人，唔知駐地既土地會唔會已經走左，但係睇黎我既擔心都係多餘，土地依然堅守自己既崗位。 師父既靈獸邊戰邊死，而師父就不停咁聚集星宿繼續戰鬥。見到師父苦況，我立即提符直驅，目標就係先取最靈活既白虎!白虎可以話係成個戰場中最恐怖既一個對手，佢不停跳動，左一隻靈鼠，右一隻速狼，殺得場中既靈獸死傷慘重。 我依住一間村屋旁，開始唸咒運符。「九九輪轉，凶者必滅，天地合我，暫借天上天下雷火!離!」神雷火符出陣。由真紅火符所寫成既神雷火符比起我係德達所用既起碼強上十倍，所以符咒一出，天上即刻響雷不斷，天上雷電所劈中之處爆出一道又一道既火光，而靈獸群中既白虎顯得尤其突兀，就好似一枝都市中既避雷針咁，不斷吸引天上神雷。 白虎連避三下雷擊，但係終於比第四道從電而降既閃雷轟中。白虎身影完全沒入雷電中，我估計，呢一擊肯定傷得佢唔輕。但係白光過後，白虎竟然從雷中步出，好似完全無事咁。但係對我呢個施法者虎視眈眈，睇黎比我呢一下雷擊激嬲左。仲要係極怒。 「吼!!!」