那些年，當香港仲係百鬼夜行既時代: 12. 鎖羅盤X – 殺神

唔理啦，我要拼一拼，就決定用師叔比既符啦!雖然我無呢道符既咒語，亦唔知道符有咩作用，但係唔緊要。咒語只係幫助我，令我可以遠距離控制道符點飛，飛向邊個目標，如果我埋到隻白虎身的話，將符直接貼上去都可以達到同樣效果。至於唔知有咩作用都唔緊要，火係五行中最為霸道既一行，有關佢既咒術多係用黎攻擊人地既，如果咁岩得咁橋呢道竟然係協助人既符的話，我認輸，不過我絕到唔係輸比隻白虎，而係天意! 我當下立即清空思緒，準備係白虎起跳時，將符咒係佢肚既位置貼上去。而白虎見我無再落跑，佢都無衝前黎立即一抓撕開我，反而圍住我盤旋，就好似一隻老鷹見到一隻就快被食隻小雞既動作咁。可惜，今次呢隻小雞其實係由刺蝟假扮，要食佢就難免比刺蝟身上既刺插損。 敵不動我不動，呢句係孫子兵法中十分有名既一句。可惜係當代，可能已經唔再太適合。我眼見時間一分一秒咁流逝，我等唔到啦。師父可能已經好似無相師叔咁....唉。我計算過，白虎同我只有十步左右既距離，唔遠唔近，要大家攻擊大家，都一定要先衝出一步。點樣衝，幾時衝都好講究，唔係我就比白虎分屍。 我咬一咬牙，趁白虎稍微抬頭望天時向前飛撲，準備殺隻白虎措手不及!我既左右雙手各持一符，只要求其一張貼到上去，我相信都會起到作用!白虎雖然眼快手準，但係當我飛撲時，佢卻無反擊，。可能佢無諗到竟然獵物會主動攻擊捕食者，亦可能因為佢岩岩望緊天，一時間反應唔黎。可惜往往就係因為小小既大意，或者輕敵，佢就會死得好慘。我邊撲邊滾，係我滾到同白虎只有五步距離時，白虎終於郁起上黎。我眼前忽然白光颼颼，只見佢白爪一抓，我下意識就舉起左手去擋，但係我右手都無空閒落黎，就伸盡往佢出爪既前臂用力一貼!

我眼中只見到白虎既身影愈黎愈細。而同時，兩聲清脆既啪聲瞬間響起!第一聲啪，係我猛力貼張符上佢身既聲音。而第二聲啪，就係我左手骨折既聲音。 白虎一記揮爪將我打到好遠，至少唔係白虎可以一下子撲到黎既範圍中。我按左我既左手，勉強靠住一棵大樹企返起身。係濃霧中，我只係見到一點小小既火光依附係白虎既右手上，又橙又白，好似隨時就會比風吹熄咁。而白虎好似不痛不癢咁，只係好奇咁用另一隻手去拍下個啲火。而個一小點既火焰竟然就藉此燒到去佢另既左手上，但係依然都只係好小好小既火團。 白虎始終係動物，佢唔會好似人咁識得用工具幫手滅火，又或者話...呢D火根本滅唔到。只見白虎不停將雙爪往身上拍，希望可以拍熄D火燄，但係火並無好似佢想像中咁熄滅，反而不停往佢身上粘，每拍一下，白虎身上著火既範圍就愈大!佢甚至開始係地上打滾，希望可以整走身上既火。可惜天不從虎願，須臾間，我只係見到白虎身上白色既地方愈來愈小，紅色既地方就愈黎愈多。 到最後，當白虎身上最後一點白色都不敵紅色既力量時。火就突然逢一聲大起上黎，又係下一秒，完全熄滅。白虎呢?白虎就咁就消失左。好似完全未存在過咁。佢係死之前連一啲聲都無發出過。 我望住手中既符。到底呢D咩火黎?竟然可以將四象之一既白虎無聲無息咁殺死!?