那些年，當香港仲係百鬼夜行既時代: 9. 鎖羅盤VII – 四神

我記起啦!有一本講殯葬既書籍有曾經提及過天屍鬼!天屍鬼，其實係源自西藏既天葬。天葬係西藏十分流行，天葬係有別於一般既葬禮，當一個人死左之後，佢屋企選擇幫佢進行天葬，天葬師就會係出殯當日將佢既骨同肉分離，再將佢既骨磨碎，掉棄係大草原上，比D動物所食。但係有時...有D罪孽深重既人，即使係生前選擇左天葬，但係死後都唔會有天葬師幫佢進行分骨挫肉呢個步驟，因為天葬師怕變成好似呢個罪孽深重既人既幫兇咁，死後會落地獄。 佢地既屋企人，一般會選擇將呢種人既屍體掛係懸崖旁，任由動物去啄食。唔好以為咁樣係可以完成天葬，因為如果一個人真係背負太多既罪惡，有時D動物都唔會去食佢地，而呢啲無人理會既屍體只要係懸崖旁掛夠九九八十一日，係日曬雨淋既情況下，吸食夠人間同埋大自然既精氣，咁佢地就可以被煉化成天屍鬼。掛得愈耐愈完整既屍體就可以煉化成愈強既天屍鬼。 呢D既天屍鬼由於已經吸食左好多大自然既精華，我地用返大自然既力量去打佢當然悉數無效。 「師父..呢隻野點打?」我開始驚慌起黎。因為呢隻野真係好似不死之身咁。 「哼，天屍鬼怕動物，但係一般無修為既動物會怕佢。」師父言下之意姐係要用D有修為既動物幫手?但係無啦啦點會有啲咁既動物係左近呀..... 「一方極樂，三界侍衛，五方鬼帝，九重天神，急鎮惡鬼，以吾之身為引，急迎北陰酆都中鬼帝!」師父無再回答我，只係再一次請神上身!係師父身邊除左有一股黑氣包圍住佢之後，我仲見到大大小小唔同既身影。有牛，有老虎，有狼....哦，我記起啦!佢地就係係嘉賢臺同八旗護法惡鬥既十六星宿! 「各星宿領命，傾力絞殺天屍鬼!」師父再次低喝一聲，十六星宿即空群出動，佢地有啲從上以下進攻，有啲就從前方急襲，其攻勢睇黎絕對機會有一擊打敗係自然界稱霸一方既天屍鬼! 「靈獸...氣勢果然磅礡，嗯...但係...」劉伯溫竟然好似好讚賞師父既十六星宿，除左咪起眼觀察，竟然仲點點頭。「但係萬物之靈並唔係呢班動物啊。」 劉伯溫口中唸唸有詞。「四神先係。」 當劉伯溫停止唸咒時，大地忽然不停抖動，天空亦不停有變化，一時好天，一時落雨，一時仲陰雲密佈。但係師父好似無理到呢D反常既變化，只係專心致志咁驅動個十六隻靈獸猛攻天屍鬼。 就當有成個人腰粗既翼火蛇就黎咬到天屍鬼時，佢既動作就忽然而止，繼而就比一道從天而黎既橙紅色既火光燒成青煙。 我抬頭一望火光射出既地方，只見一隻紅色既大雀拍翼緩緩落下。朱雀!操控廿八星宿既四神之一，朱雀!佢竟然親自降臨大地.... 「嗚...」一聲既悲鳴將我既視線由朱雀拉返去師父既其他星宿上。個聲既悲鳴係由奎木狼發出既，因為佢比一隻極為巨大，威風凜凜既大白虎一把撕開兩邊。奎木狼係四神之一既白虎既坐下星宿，唔夠白虎打係好正常不過既事。連白虎都黎埋，今次真係弊.... 倏地，我發現本身因為朱雀已經完全降臨大地而變返正常既天空，又開始暗左落黎。我下意識抬頭一望，我只係望到一塊大木板咁既野。上邊有一條又一條不規則既紋，有啲似烏龜既殼...我耳中就與此同時傳入一啲有規律既「碰」聲，似係有一啲龐然大物踏係呢塊大地上面。 「玄武...」師父呆望天空上既木板狀物體，口中脫出一句。 「吼!!!」遠處又傳來一把霸氣十足既吼聲。唔使講，有玄武白虎朱雀，又點可以無青龍? 我倒吸一口涼氣。面對呢四個真正既萬物之靈...今次睇怕只有賴布衣師祖顯靈先救到我地...