那些年，當香港仲係百鬼夜行既時代: 7.鎖羅盤V – 鬼掩眼

我望住放係神主櫃入邊比人供奉既個四張相，再望一望只係低頭食飯，完全當我無到既個四個人... 嘩!真係相中人黎!唔掂唔掂，走先!正當我好心急，想偷偷地爬窗離開，盡量唔好驚動到佢地個時，令人震驚到不得了既另一幕又再出現係我眼前。比濃霧所籠罩既鎖羅盤村，村中既屋竟然通通都著哂燈!間間都燈火通明，人聲鼎沸，就好似一條普通既村莊咁，甚至熱鬧到好似個市場咁!呢個....無可能架!我明明入黎個時黑媽媽架，條村荒廢左架應該! 我呆站係窗前面，望住突變既環境，我有D不知所措。與此同時，我手中既桃木呎又開始發出一啲滋滋聲。我向下望住把壓鬼呎。佢由原本有些少桃木特有既粉紅色蛻變成啡色，再慢慢銳變成陰氣爆發既黑色!而正當桃木呎變緊色個時，我眼前既景物竟然慢慢褪緊色...D燈慢慢調暗，直到完全消失...而人聲係慢慢降低，直到完全聽唔到半點聲...所有既野回歸最初...到最後變到漆黑一片....一片死寂... 見到呢個咁奇妙既場面，我腦海中突然閃過一個詞語，鬼掩眼!我可能比打牆鬼遮左眼!係陰間中，鬼都有分好多種，可以令你產生幻覺，最後導致你係某一個地方不停亂轉而餓死，渴死，發瘋而死既鬼，就係一種叫打牆鬼既鬼。比呢種鬼纏上既人，我地多數話佢比鬼掩眼。鬼掩眼最恐怖既地方唔係可以直接殺死你，而係令你感受到死前既無助，絕望，痛苦...當你抱住以上種種感覺死去時，你就會帶住一股無比既怨氣，化成怨鬼，唔可以正常咁再輪迴，真正既做鬼都唔化。 我重新再審視一下自己身處既位置。原來我入左黎一間村屋入邊。間村屋既陳設同頭先我見到既差唔多除左好多灰塵同蜘蛛網外，其他既野都大同小異，斑駁既牆身，相同顏色既梳化，HELLO KITTY既書枱...同埋四位先人既相片，只係呢幾位先人既樣同我頭先見既個班唔太一樣...我係鬼掩眼個時見到既個班係後生D既。 我無再作打量，只係快手快腳爬返出窗，因為我開始擔心起師父同師叔上黎。我有呢把大隋朝既壓鬼呎都咁狼狽，咁師父佢地咪隨時有危險?雖則佢地經驗豐富，但係以佢地怒火中燒既精神狀態，實在難以保持冷靜，去細心觀察眼前既情況架喎....我愈諗就愈驚，愈驚就行得愈快。係霧中我搞唔清個方向，我唯有亂咁行，希望上天保佑可以搵返師父佢地。 我一路行，手心就不停咁冒汗...唔好有事呀師父... 正當我撞連穿過左幾間破爛不堪既村屋之後，我就見到有一個人訓左係地上。佢手上仲持有一張藍色既符。我心裏一沉，就知心知不妙。我立即加快腳下速度，趕忙跑過去個個人既跟前。

訓係地下奄奄一息既人係一個男人，佢比我仲要高，身體結實，樣子正氣，令人有一股安全感而最特別既就佢擁有一雙五顏六色既手...

「無相師叔!」