那些年，當香港仲係百鬼夜行既時代: 6.鎖羅盤IV – 鬼屋

如果用跑的話，其實鎖羅盤村同疑似劉伯溫既墓都唔係分隔好遠既路程。我地一路狂奔，唔使十五分鐘已經返到黎就如死村一樣既鎖羅盤村。村中一樣靜如剛才我走個時，唯一既分別，就只係因為劉伯溫鬼王大駕光臨，同時為村中帶黎一大片既鬼霧。 「嗄...嗄...嗄..師父...劉伯溫去左邊?」我上氣唔接下氣咁問師父。 師父無直接回應我既問題，佢只係話，「又起霧....但係霧中陰氣好重....!一仔，因住!」師父語音未落，突然一把將我向後一拉!我只見原先我企緊個位突然有一隻慘白色既手係地下冒出，而且隻手附近仲有一啲綠色既氣體冒出!我驚出一身冷汗，因為如果師父拉遲我一步，我分分鐘就會比呢隻莫名奇妙既怪手拉走，唔知拉左去邊! 「嘻嘻，捉你唔到添。」呢把死人聲絕對係劉伯溫所發既!睇黎隻怪手唔係佢自己既就係佢所操縱既鬼既手。 係呢個時候，無相師叔指住大霧中大叫左一聲，「劉伯溫係個到呀!!將師兄，我地分頭夾擊佢!」然後蹤身入霧，立時不見蹤影。師父見狀，亦反方向飛身入霧，同時叫我留係原位唔好亂走。 面對強敵，分開各自為戰係最笨既應戰方式。我立時追住師父，打算跟住佢，助佢一臂之力。可惜，就係因為一秒既猶豫，我失去左師父既蹤跡。我停左係一個間村屋隔離，抬頭四望。倏地，呼既一聲!忽然有一隻手從村屋一個破舊不堪既窗門中伸出黎勒住我條頸!我用雙手拼命抓去隻怪手到。隻怪手力量好大，但係我又覺得有D唔真實，唔似真人既手。廢話，一條咁既死村仲點可能有人!?我立時從衫中抽一把由桃木所造既呎子，上面密密麻麻寫滿哂符文，我一下子用把呎大力抽落隻手到!就當我把呎掂到隻怪手時，我就聽到滋滋既聲音，就好似燒野食時，燒豬肉燒到滴哂油咁既聲。 個把桃木呎又名壓鬼呎，把呎可以吸走陰氣，而當佢開始吸陰氣時，就會有D滋滋聲發出黎。係一條咁既死村入邊，我唔係打到鬼仲可以打到啲咩? 怪手好快比我把壓鬼呎斬斷，手伴隨住佢主人既一聲怪叫就縮返入屋入邊。我無比機會佢喘息，我從窗口跳入去，準備再次追殺隻鬼。但係我一跳到入本應已經荒廢左，唔應該有人住既屋既時候，我就嚇呆左。

因為我見到屋中有一家四口，坐埋一齊，準備開飯。屋中就好似平常人家既屋咁，有書枱，有電視，有梳化.....我眼睛不停係屋中浮游。嗯...屋中無咩怪異喎...點解無啦啦會有人...呃或者鬼係到?正當我抽出身中一啲普通既符出黎準備時，我望到屋中既一個神主櫃好似有啲唔妥。神主櫃係一個高大既長方體，入邊中空，放一啲祖先神主牌又或者土地既神位，相信好多人屋企都有。而呢家人既神主櫃亦無放好多野，只有四張相，四個香爐。 但係點解我會話奇怪呢?係因為神主櫃中，比血紅色既燈照到幾乎出血既相中主人，就係我眼四個靜默無言係到食飯既四個人!