那些年，當香港仲係百鬼夜行既時代: 3. 鎖羅盤 – 跟蹤

由於我唔知師父佢地幾時出發，所以我係翌日就帶齊所有野去鎖羅盤等佢地。鎖羅盤其實唔算好大，得一條村同一個港口仔，仲有一個葬滿死人既山頭。而無論要去個港口仔定係去佢地呢條村既墳場都係要經過村口先得。而經過我學左三年既尋龍點穴功力，我搵到三個比較大可能係劉伯溫個墓既地點。而個D地點都通通都係山頭上邊。

 我搵左村口一間兩層高既村屋，係咁易執一執，就入左去暫住。而第一日好快就過去，我見唔到師父佢地既蹤影，亦都感受唔到有法力既感覺。佢地未到。 我稍為訓左幾個鐘，好快就到左第二日既早晨。亦即係師父同我講佢地會出發之後既第三日。呢日除左有隻野牛路過呢一條空無一人既村莊外，其餘野都同第一日一樣。 個一日既夜晚，我坐係間村屋既天台睇星星。市區已經好難再睇到星星，依家只有呢D與世無爭既小村仲可以搵到一啲怕醜既星星。正當我咬緊花生欣賞緊賞心悅目既夜境既時候，我忽然聽到有D腳步聲。係一個咁靜既環境下，我可以好明顯地聽到腳步聲由遠至近咁黎緊。我趕緊向村口一望。只見四個中年人正由遠處行緊黎村口，為首既係一個十分高大，衣著都幾整齊既男人，每行一步都仿如巨獸踏動地下，沉重而穩如泰山。後邊跟住既三個男人中，有兩個男人我係識既，個個就係我師父同無相師叔。最後一個腳步漂浮，身體好似無重量，仿似無時無刻都踏緊罡步，個子比較瘦長既唔使問，肯定係我既二師叔，歐陽王希。 我當然係立即二話不說，立即落一樓收拾好D行裝，準備跟住佢地。整頓完畢，我就一個翻身，係一樓既窗口跳左落去。一樓跳落地下其實真係濕濕碎，古時既村屋間間都好低樓底，門有幾高，樓底就有幾高。兩米多少少既高度，細路仔都可以安然無恙咁跳落黎。 我一路上小心翼翼咁跟住師父佢地行，果然，真佢地係向葬滿死人既山頭既方向行。哈，我既尋龍點穴都好準啦，竟然同專修呢方面既二師叔點到同一個地方!但係我開心得太早。正當我以為佢地上山既時候，佢地就突然一個轉向，入左去一條羊腸小徑。 我雖然怕跟甩，唔敢跟得太近，但係我仲怕佢地會發現到我，所以一路上我都係佢地保持大約30米既距離。而佢地一路時行時停，最後去到半夜兩點幾，佢地先係樹林中一塊平地中開始掘。

正當我入神睇緊佢地掘到D咩出黎既時候，我就發現附近竟然開始起大霧!就好似我當年係東華義莊見到劉伯溫個時咁!我立即開啟天眼。當我一開天眼，我頓時比前面既畫面嚇到魂不附體!我見到師父同一班師叔身上散發住一啲D金光，但係係金光既外圍就有接近上千隻不同形態既鬼包圍住佢地!有啲無頭，有啲無手，更有啲連下半身都無...只能係地下匐匍前進!就連係我身邊，都有幾隻鬼，我好清楚見到有一隻鬼係拎住自己個人頭係到梳頭髮! 「你班死剩種搵我呀!?」突然，一把聲響起。「呵呵，今次五個人黎?真係咁想我死?」講呢番說話既人唔係劉伯溫仲可以有邊個!? 我師父一聽到把聲立時從口袋入邊抽出兩張火紅色既符，符紙既紅比起我買得到既真紅火符仲以鮮色，睇黎係無相師叔特製既。而王希師叔都抽出三張綠光大作既符。 「哼，劉伯溫，唔使靠嚇，諗住靠出口術擾亂我地!?我呸!」高大既帝師叔踏前一步道，佢地根本唔知我係到，所以帝師叔以為劉伯溫諗住呃佢地，迷惑佢地既心智。 「樹後邊個位小兄弟呢?佢咪係第五個生人囉。」劉伯溫伸出慘白既手指，向我躲藏既位置指一指。 我既然見東窗事發，我就索性從樹後行出黎。「師父，各位師叔好。」我向各人拱一拱手。 「唉，你始終都係跟左黎。」師父搖搖頭。但係我見到，佢將手上既符張捏得更緊。 「哎咁多位，我話哂都係地主，應該一盡地主之誼，唉，敍舊呢度邊舒服架。細佬我已經安排好左五副上好既棺木，等你地可以安安詳詳咁訓係入邊，等大家平安落到地府先再慢慢敍!!」