那些年，當香港仲係百鬼夜行既時代: 2. 準備II – 鬼市

我係晏就五點幾就趕到入上水，係正常既市場食左D野，就準備入鬼市。 鬼市係夜晚八點之後先會開，話明鬼市，咁當然唔係賣正常人岩用既野。你可以係鬼市搵到泰國入口既鬼仔，買到有靈力既法器，新鮮屍油，特別既符，甚至會搵到D用都未識用既物品等等。只要你識搵。 我去鬼市當然唔係只係為左買D奇怪野啦，我係為左買符。你地唔好以為符只係得幾種，其實符仲可以分為黃土符，真紅火符，冰藍水冷符，綠光幽木符，頑金符呢五種。平時最常用既，就係黃土符，因為土能容納百川，唔會對任何既咒有特別加成，都唔會有咩特別既減持。而有關火既符咒用真紅火符就會有最大既威力。 鬼市其實表面睇落去普通既市場無咩分別，依然係人山人海好多人行，而且唔難見到有其他國籍既人。我走到去一個中國籍既阿叔身旁。滿頭白髮既阿叔正係到看守緊一個地攤，地攤上放滿一堆舊野，鞋，CD，水壺，情況就好似星期日既鴨寮街咁。我微微向前彎腰，輕聲道，「天官賜福，鎮守大地，驅魔逐妖，守土衛道。」 阿叔抬頭望一望我，壓低聲音道，「要咩符?」佢就係中國法器市場既管理人。話係管理人其實都唔係好岩。佢只係充當既一個傳話人既角色，要係到買野就先要同唔同地區既接頭人講暗號，咁佢就會知你大約想要咩，然後佢就會搵有呢D貨既人出黎同你傾。 我諗左一諗，「我要冰藍水冷符，真紅火符同埋綠光幽木符。」 「喂!有客要收音機，劉德華CD同一個PANISONIC熨斗丫喂!」阿叔突然扯開嗓子大叫，嗯，呢啲暗號黎既都係，我記得我跟師父黎過一次，個時既真紅符火符既暗號好似係美源髮采，今日就變左做劉德華CD。 過左一陣，有個老人行出黎。佢身材瘦少，渣住一枝殘舊既木杖，用一對染有唔同顏色既手向我招手道，「你要既野我都有齊，跟我黎。」 我跟住個老人家入左去一間地面鋪既後室入邊。「要幾多張?」 「呃，三張真紅火，三張冰藍水冷同四張綠光幽木丫唔該。」我心中盤算。 「120蚊。」個老人一手遞符比我，另一隻手同時伸張，示意我磅水。 無錯，鬼市就係咁。成個過程都好莫明奇妙，好快速，比錢拎貨走人。 我手渣住呢十張既符，我靜靜坐車返屋企。

今次係一次九死一生既戰鬥，一個唔小心就會死，仲要死得好慘。