那些年，當香港仲係百鬼夜行既時代: 4. 鎖羅盤II -- 惡鬥

「餓鬼刑殺四方!」劉伯溫一聲令下，眾鬼就跟住衝上黎，而身邊既霧就更加濃。係鬼界中，餓鬼比起普通鬼更為厲害，佢地以食鬼為生，更甚者係食屍，而當中既佼佼者就係我地眼前呢五隻惡鬼， 佢地以食五行為生，只有一隻的話佢地好容易收服，但係五隻一齊，就有如一個大陣，生生不息，極難將佢地殺死。 但係只見師父佢地好快速咁一人一個方位咁企好，「岩啦，你徒弟企中間，我運五陽大陣!」呢把陰柔既聲音應該係二師叔既聲。但係我無暇去諗點解二師叔把聲咁似女人，因為我忙於震驚呢個陣! 五陽大陣，據說係宋代已經有，當年每逢同親元軍打仗，就唔知點解D士兵就會又嘔又暈，自然就會比人打到落花流水。而當年既國師，就認為係元人係有陰神相助，所以令到班士兵打唔到仗。咁佢就搵左軍中五個陽年陽月陽日陽時陽分出生既士兵，運起五陽大陣去同陰神隔空鬥法。到最後，國師都係失敗左。失敗既原因唔係因為個陣無效，而係太有效，令到除左做陣眼既士兵無受到傷害外，其餘做陣腳既士兵都吐血而亡。師父同師叔佢地幾時出世我唔知，不過我肯定唔係五陽之人，如果二師叔都係要運起呢個陣，佢地要承受既壓一定唔會比當年個四個士兵少! 正當我想開口阻止時，二師叔已經抽出左一張黃色既符，手持五枚銅錢。銅錢係陣法學入邊，多數被稱為壓陣錢，可以催旺個陣之餘，仲可以提供額外既法力。 見師父佢地已經就位，二師叔又開始運陣，我唔敢亂移動或者亂出聲，生怕令二師叔分心，引致五陽大陣既反噬。 只見師父摸出兩張紅色符。「陽照大地，掃污滅垢，五行無上，奉火至尊!敬請日宮太丹炎光郁明太陽帝君!」師父終究都係祭出佢最拿手既日神。 「萬物之神，火燒大地，龍王鳳后，侍衛左右!召!」係請左太陽帝君上身之後，師父再次淨空思緒，低聲喝道。 倏地，師父手中既火紅符忽然成形，右手為龍，左手為鳳!佢地左右互纏，準備轟出開天僻地既一擊。師手隨手將兩張火符甩出。 「五行鬼陣!擋!」五行鬼陣，就係係五行餓鬼所組成既陣，佢地當中既食火鬼即一馬當先，準備對上火龍火鳳。食火鬼，即係食陽火為生既鬼無論真陽火定假陽火，佢地都照食可也，唉，睇黎師父呢一擊可能無功而還。 「水淹七軍，苦海無途，五行無上，以水為靈!奉請北方辰星水德真君!」正當我苦惱緊我好唔好用用我手中為數不多既藍水冷符去剋死隻食火鬼既時候，我突然聽到無相師叔把聲! 「地面萬物，尊水為父，洪洪大水，苦海飄浮!淹!」