那些年，當香港仲係百鬼夜行既時代: 20.令狐無相師叔

原來我真係仲有師叔!?我仲以為我D師叔都已經死哂! 望住我一面震驚既表情，師父再度開口。「其實你三個師叔都仲在世，除左有一個係大陸，其餘都係香港。嗯，聽日我會上門多謝無相，你都一齊黎啦。」 我抱住滿肚子既問題返到屋企。到底呢個師叔又有咩過人之處呢?玩符?師父玩符都好厲害架喎...佢專玩符咪天下無敵!?咁其餘師叔又叻邊凡?我又有無機會見下佢地?慢慢地，我就係一堆問題纏繞之下訓著左。 翌日，我好準時去到師父屋企門口。 一打開門既一刻，我以為我去錯左人地屋企。因為開門迎接我既竟然係著一套好整齊既中山裝既男人!呢個邊係我師父!?我師父多數著住件污糟TSHIRT就呢到去個到去，有需時就加返件道袍。 「你入黎先，我再臘一下個頭。」師父招呼我入屋，自己係去左廳個塊全身鏡整自己D頭髮。 我望住自己一身既裝扮。死啦，連平時咁求其既師父都執到咁靚，我著T SHIRT牛仔褲會唔會好唔尊重? 「你望住自己件衫做咩姐?行啦。」師父終於搞掂。我抬頭一望，嘩，師父呢三七分界真係堪稱經典!佢簡直就係依照住電視既明星黎整! 「呃，師父，你使唔使執到去飲咁呀?」 「既然要去多謝人，自然就要著靚D架啦。」師父邊行邊拎起飯枱上既一個生果籃。 上環，接連住西環既一個地方。連當年孫中山先生商議革命呢D大事，都係簡呢到，可見當年呢到幾咁偏僻，甚至傾革命都無人知無人理。雖然依家既上環興和左好多，但係呢到依然係廟宇、古蹟林立，文武廟，太歲廟...唔單單係廟，紙扎鋪都好多。我同師父依家就正正企係一間紙扎鋪前面。 「呵，將師兄黎左呀原來?」無相師叔滿面笑容行出黎迎接我地。無錯，就係呢個男人。佢最吸引到我既依然係佢雙有唔同顏色既手。 「黎多謝你救我一命。」師父微笑回答。 「下，哦...入黎坐人黎坐。」無相師叔面色一沉，隨即又再擺一擺手，將我地迎入內堂。 內堂中，除左D紙扎衫呀，車呀之外，亦都有令人感覺到好弔詭既紙扎公仔。佢地雙眼就好似無時無刻都係望住你咁。師父話，有法力既紙扎公仔可以睇穿陰陽，睇到你一生運劫，所以佢雙眼先至會比人心寒既感覺。 師父示意叫我自己搵個位坐，但係內堂入邊得兩張櫈。嗯，我企下得啦。 「多謝你黎幫我散功，我出鳳凰係為左救我徒弟。」師父用手指指一指我。下，邊有人咁樣介紹徒弟出場架!?間接話個徒弟無鬼用要師父救都有既? 雖然我心係咁諗，但係我面上都係掛笑容，踏前一步向無相師叔欠身作輯。「無相師叔你好，我叫做上官一。已經跟左師父學法接近四年。呃，上次誤會師叔你係賊唔好意思。」 「嗯，無所謂，夜媽媽入人間屋自然好易比人當係賊，無事無事。」師叔望一望我笑笑，又揮一揮佢滿係唔同顏色既雙手。 「姓劉個邊點樣?」師父係無相師叔講完後，突然失驚無神地問一句。 「唉，我唔比你徒弟知我係邊個就唔想你黎，跟住又再插手返呢件事...」無相師叔低頭唔直望師父，好似有疚於師父咁。 「講啦。既然係祖訓，咁就無理由只係由你地幾個黎承擔，我都要出下力。」 「唉..好啦。帝師兄係大陸清除緊佢遺留落黎既風水大陣，王希師兄就搵緊佢個墓。」無相師叔語氣中透露出一種無奈。 「劉伯溫當年已經令到你同兩個師叔重傷，久久不能復原，你不如就唔好再理啦...等我地三個搞掂啦..」