那些年，當香港仲係百鬼夜行既時代: 19.散功

我揹住師父，一路返到師父係西環既屋企。正當我想摷下師父D衫袋睇下佢有無鎖匙既時候，我發現，師父屋企門口唔知點解只係半虛掩! 我記得我出黎個時，望住師父鎖門架喎!唔係咁狼死掛，西環咁偏僻都有人爆格? 我輕力推開大門，望入黑漆漆既客廳入邊。無人。嗯，正常既，爆格唔會搬廳既大件野。 我輕輕力放低師父係梳化，躡手躡腳行入去師父既房入邊。都係無人。正當我奇怪緊係咪我睇先我睇錯，師父其實無鎖門既時候，我就聽到廚房傳黎一啲乒乒乓乓既聲。 我順手係房中拎起一枝鐵造既法器，閃身衝出客廳。 「嘩!你係邊個!?看棍!」我一出到廳，就見到一個男人身影鬼鬼祟祟咁係廚房行出黎，準備接近師父，見狀，我當下即刻掄起鐵棍，向前大力一揮! 豈料，個個男人竟然單手硬生生擋住左我呢一擊!「我係邊個唔需要理，我係黎救你師父既。你師父好少打出太古羽化鳳凰，呢張王牌唔係最後關頭都唔用..你去拎廚房D冰黎先啦，我去幫佢散功。順便開返燈唔該。」個男人連珠炮發咁講左一大輪野，講完眼定定咁望住我。 「下...呃...哦..好..我去拎。」雖然唔知佢係咩人，但係睇黎真係無惡意，反正我又唔知點整醒師父，就信佢一次。 我急急腳咁係廚房拎左一大碗既冰出黎，順手當然開埋燈。出到黎只見個男人手渣住一張藍色既符，另一隻手就渣住一啲米。係呢個時候，我終於可以好好睇清個男人。佢身高都應該有一米八幾，甚至一米九，因為佢比起一米八既我仲要高啲。中等身型，又唔算大隻，嗯....鋼條身型。同時佢擁有一副國字面，成個人睇落好正氣。最特別既係，佢雙手同佢身體膚色特別唔同，又有D紅紅地色，又有D藍藍地色咁... 「三鎮冰封，七雪頑冰，九寒入身，祛火滅燄!封!」語畢，男人一把將D米灑係師父黑左既手上邊，又灑係佢塊面到。最後將啲冰悉數倒係師父手同面上邊。

就係落完冰個一下，成個客廳既溫度好似突然驟降廿度，變得十分凍，而最神奇既就係我見到師父手上既冰竟然極速融化緊!而且當師父既皮膚開始變返正常既膚色時，佈滿係師父身上既米竟以同一速度變黑，睇得我嘖嘖稱奇。 「搞掂架啦，我幫佢散哂所有太陽帝君既陽氣。你等你師父醒返就可以。我走啦。」男人企起身，逕自行去大門，開口道。 「呃，你到底係邊...」我所得到既回應就係砰一聲既閂門聲。 得唔得架佢?雖然頭先個一幕係好精彩，令人難以解釋，但係又會無啦啦有人黎幫師父，仲要唔遲唔早，時間岩岩好!? 正當我係到胡思亂想既時候，師父就悠悠轉醒，吚吚哎哎唔知講咩。 「師父!」我立即去扶住師父，幫佢係張梳化到坐好。 「哎...哎....頭好痛...一仔，點解我會醒到?」師手邊用手搓揉自己額頭邊問道。 「呃...有個男人黎救醒你。佢用一張藍色既符，一把米同一碗冰就救醒左你。」我想努力回想下，到底除左個男人個樣正氣D同隻手既膚色有D唔同之外仲有咩特徵，好等師父易諗啲，知道救佢既咩人。 但係我都未講個人有幾高，咩身型，師父已經開口。「佢就係你師叔，專修御鬼門既符流既令狐無相。」