那些年，當香港仲係百鬼夜行既時代: 21. 淵源

劉伯溫?咁熟既個名...嗯....呃....哦....啊!我記起啦!當年係東華義莊撞到個個阿伯!我地呢一門其中一個祖訓就係要滅左佢!我有曾經問過師父點解我地同佢有咁大仇口，師父唔肯講，又話等我大個D先。睇黎我今日終於有得一窺究竟啦! 「有冇線索丫咁?」師父唔理無相師叔既勸阻，只係執意想知道有關呢個明朝一代國師既近況。 「王希師兄話有些少微目，應該搵到佢既正墓，不過你知啦...佢個手尋龍點穴時準時唔準，同埋人地係國師，又點會咁易比你搵到?就算搵到都可能係衣冠塚啦。」無相師叔心不甘，情不願咁講。 「你無呃我!?」師父聽罷，對無相師叔怒目而視。 「無無無，句句真話，絕無半點既大話!」無相師叔舉起右手三指，作發誓狀答道。 「嗯，既然係咁，要出手就通知我一聲，知道嗎!?」師父滿意咁點點頭。「我依家去執返幾張符，之前同個泰國仔打用左好多，真紅，冰藍符我都要。」丫，係，可能你地會奇怪緊點解係達德會有個泰國降頭師。其實之後我同師父有返過去做法事，打算超度一下死係達德既一眾元朗原居民，而同時，我就同當地村民打聽過。原來呢個阿頌，係當年英軍所請既啹喀兵既後代黎。佢老豆係就係當年少數比元朗原居民係反抗時殺死既英軍，而16歲既佢當時就係英軍第八號炮兵團服役，同反英軍既圍村村民打緊仗。而佢為一報殺父之仇，就一直潛伏係元朗，期待自己蠱降都有所成就時就可以殺盡所有元朗居民。但係點解佢既外表仲會係後生，睇落只係大我少少呢?咁就不得而之啦。 「你叫上官一下話?」無相師叔突然開口，將我既思緒打斷。「嗯，上官一，十二筆，木屬，堅定不移，生命力強，好多劫都可以比你過到。」 我心中一驚。點解同師父當年同我講既野咁似既!? 無相師叔從我既眼神之中睇得我既驚恐。「唔使咁驚訝，我地御鬼門既人個個都學過唔同範疇既野，尋龍點穴、睇相、畫符、請神、墓構學、宗教學，數之不盡呀!」 「嘩，要學哂咪要好耐囉?」我比師叔所講既一堆名詞嚇親。 「傻啦，樣樣學少少架咋，跟住你就可以揀你最鐘意既黎繼續潛修。你大師叔佢大學主修建築學，所以佢就揀左墓構學，風水學，你二師叔呢，就揀左尋龍點穴黎修，至於我啦喎...」佢揚一揚自己雙手。「睇隻手就知，我就係揀左會比D染料搞到周身顏色既畫符學同紙扎學!至於你師父呢...唉，份人太過正直，見義勇為，所以佢就學請神，符咒學!就係咁，佢先會係20年前身受重傷..如果當年佢聽師父講，揀面相學就唔會咁啦...」師叔既話語中透露出一種唏噓。但係正正比左我一個機會去細問劉伯溫同我地呢一門既淵源既時機。 我當然立即打蛇隨棍上，開口問道:「師叔，其實呢個劉伯溫係咩料，同我地有咩仇口，又點解會打到師父同師叔...呃...爺重傷?」所以話，中華民族搞到D關係幾複雜，師父個師叔..我都諗左一陣先開到口。 「既然你係我地呢一門，呢件事你絕對有權知既。嗯....劉伯溫係邊個你知架呵?」無相師叔望住我，希望我答個知字。但係好可惜，我只係知一啲好表面既野，例如佢係咩人，咩職位等。 「知呢D就夠。其實佢係退出朝廷之後並唔係單單過住平凡既生活咁簡單。唔少史書都話佢係六十五歲身故，但係其實佢係七十八歲先身故!中間呢十三年佢去左邊，點解又要扮死呢?普通人唔知，得我地御鬼門既人先知。話說佢退出朝野後，依然研究唔同風水鬼神之說，係故鄉有賴布衣再世之名。有一日，佢忽發奇想，丫，個個都叫我賴布衣再世，倒不如我就同呢個人比一比，我分分鐘可以取代佢，成為玄學一代宗師!咁師祖賴布衣係已死之人，劉基又點可能同佢一較高下呢?佢就諗住用佢獨特既尋龍點穴方法，搵出師祖既墓穴!」師叔講到口沫橫飛，如果佢唔做紙扎，絕對可以去榕樹頭講故維生。 「佢收集左好多唔同關於師祖既資料，佢既時辰八字啦，生平啦等等。到最後，佢搵到廿幾個有師祖有可能埋葬既地點出黎。佢自知以佢既身份通山走一定會惹人懷疑，所以佢決定先扮死。當所有人都信哂佢已經落左去同閻王報到既時候，佢就開始佢既大計。佢一路由旴江，即係師祖故鄉，一路向南搵，最後，搵到黎香港既前身呢到。咁佢點印證自己既推測係岩定錯呢?好簡單，掘下咪知囉。」 下!?大明一代國師就為左同死人比較而掘人地個墓!?不過明既，當一個人腰纏萬貫，無欲無求，就一定會做下瘋狂野。 「佢揀好方位，一掘落去!就比佢掘到，佢都唔係省油既燈嘛。而師祖係落葬個時都無用到咩機關去阻止人入黎，因為佢既陪葬物就只有唔同既宗卷，普通盜墓賊都係得物無所用。可惜今次呢個唔係一般既搬山摸金之士，佢係精通風水命運鬼神之說既劉伯溫。佢就係驗證緊呢個墓到底係唔係師祖既時候，佢就見到呢啲宗卷，仲好順手咁攞埋。當然如果只係咁，我地都唔會執意要搵佢報仇。佢拎左，走左，咪算囉，點解仲要係師祖既棺木上邊用朱砂寫住，先知山人亦不過如此!?」講到激動處，無相師叔緊握拳頭，一拳狠狠地打係枱面上。 本身盜墓已經係大不敬既事，盜人墓仲要寫字係棺木上邊，實在係不能原諒。我都感到心心不忿，普天下間邊可能學道之人會唔明呢樣野架?呢件事就可以足以說明佢本身德性就有好大既問題!到呢刻，我終於明師父點解會咁憎恨呢個人。第一，佢侮辱我地師門。第二，其身不正既修道之人要害人實在易如反掌，我地係有責任去阻止佢去害人。 「而佢拎左既宗卷就係講述點樣死後再修煉既方法既古籍。所以你先會見到一個有意識，同埋連夜叉都要讓路既佢。你依家明點解我受過重傷，用左十年時間恢復，但係都堅持要滅左佢啦?」今次繼續講既，唔係無相師叔，而係拎完符返黎既師父。佢眼中閃過一絲堅定，又摻雜住一絲既哀傷。 「咁當年既事...?」我好奇起上黎。師父比我既印象就係三個字，好厲害。區區一隻惡鬼竟然可以將佢同一班師叔爺逼死? 「我同一班師叔同佢既魂打起上黎，明明差少少就捉到佢，可以封左佢，但係點知原來一切都係佢既圈套。佢自知一日自己既墓無比人搵到，一日佢既肉身都可以長存。身在魂在，身亡魂亡。佢最後黎左個反擊，引左我地入佢一早預先設好既結陰陣入邊，將我地陽氣悉數吹滅。」師父輕描淡寫咁講，但係我已經幻想到，個場到底係一場點既硬仗。稍有閃失，命運好可能就會改寫。 「將師兄，你唔好再咁介懷當年既事啦...師叔既死唔關你事架。我地等王希師兄搵到佢隻死老鬼既墓先再作打算啦。有時D野無得急既...」無相師叔拍一拍師父既膊頭，叫佢放鬆D。 「嗯...唯有係咁啦...我走啦。記住!有咩消息一定一定要通知我!」已經行到鋪頭門口既師父再三提醒無相師叔。 無相師叔亦無奈地點點頭。 呼...到底呢個劉伯溫會有幾厲害?我既大師叔控制有辦法搵到黑白無常既法器，我師父既請神術又如此精湛，四師叔所畫既符威力又如此巨大，唔會都唔夠佢打掛?而且仲有個二師叔呢?嗯....但係師父連同一眾師叔爺一同出征都掛彩而回喎.... 我實在唔敢再多諗，因為始終要黎既就會黎，終有日我都要去面對，依多諗都無謂。 -------------------------------------------------------------第三部完-----------------------------------------------------------------