那些年，當香港仲係百鬼夜行既時代: 18.再戰達德III – 完結

我都唔明點解師父要咁做，但係既然佢咁做得，自然有佢既因由。 我緊緊跟隨係師父後邊。雖然我知道師父係好想殺左阿頌，好可以為民除害，但係我覺得今次咁做有D冒險。因為D霧無理由會咁濃架喎.... 一路跑，我就一邊提防。始終，呢個阿頌滿腦子詭計，之前又試過扮對自己操控既人蠱阿讚言聽計從，自己同自己做對手戲，又試過呃我話咩靠飛頭蠻吸取我精氣，再用黎落降，所以對住咁既敵人，都係小心D好。 係迷霧中，我一直追住師父背影黎跑，直到佢停低。時間都過左成十分鐘。 「師父...嗄...你做咩停低...佢地去左邊?」我企係師父後邊喘氣，左顧右盼道。 「你句問題錯左啦細路，你應該問，你師父去左邊呀!」咦，點解師父把聲會變成咁既!? 我赫然向前一望，驚見原來我一路追住既，唔係師父，而係阿頌!佢對住我獰笑，面容扭曲。 我退後左幾步。暗中再抽出真紅符同天火咒符。其實我身上仲有神雷火符，不過結界未散，我係用唔到。嗯....我係咪應該同佢打過?阿頌身邊依家又無蠱蟲幫佢，又無人蠱幫佢。但係佢本身識打泰拳喎...我諗返起上次比人一拳打到滿天星斗，就心有餘悸。真紅符燒屍就得...燒人又得唔得呢...天火咒我又無太陽帝君幫手，威力實在唔大喎...呃... 就係我諗緊點對付佢既時候，突然忽然聽到遠處傳黎吖既一聲!倏地，一道火光係我前面略過，而企係我對面既阿頌就比個道火光打中，硬生生咁比D火燄燒左上半截既軀體而轟然倒地!大霧中，我見到一隻全身燚光閃閃既鳳凰係我頭頂上飛過，佢既形態，就好似臨死前最後發光發亮，為保護世人作出最後一擊般。呢隻咪係師父既火鳳凰!?師父唔係有咩事下話!? 「師父!你係邊呀!?」我張口就大叫，向住火鳳凰飛黎既方向跑過去。邊跑邊叫左成五分鐘，我都係聽唔到師父既回應，我知係呢一刻，師父都唔會應到我。因為我見到師父就訓左係我不遠處既地下上邊，手上仲渣住一張有綠色字既符紙，我認得，呢張係追魂符，師父應該係為左救我而打出最強一擊! 師父地下附近就滿佈燒焦既痕跡，睇黎師父呢一擊真係用盡佢所有力量。我急急走到去師父既跟前，不停推師父既左手，唔推尤自可，一推嚇死我!師父竟然成隻手臂變左做黑色，唔單止，連面都變黑埋!我個心頓時涼左半截，師父唔係提早去搵師祖去飲茶下話!?唔係既，黑左隻手姐，唔代表死既!我戰戰兢兢咁將手指放係師父既鼻個到。嘩!好彩，仲有呼吸。 霧依舊一樣咁濃。我揹住師父，漫無目的咁係濃霧中到處亂行。救命聲開始愈黎愈細聲，與此同時，我又開始聽到好熟悉既粗獷笑聲。個D笑聲就係黎自持槍殺人個班英軍。 嗯，睇黎結界就黎會破。我曾經睇過一啲道家既古籍，書中話枉死既人會不停每晚重複返佢係點死。例如吊頸死既，佢每晚就要重複結繩，上吊，斷氣呢個動作，直到佢陽壽真係完全終結，可以去輪迴為止。依家班村民睇黎就係不停重複返當年佢地點比人屠殺，由逃跑，中槍，失去意識到最後斷氣。 而書中仲話，當咁多鬼聚集係一個地方時，個個地方既地運磁場就會改變，輕則住係該地既人會事事不順，重則會令結界出現，將人困死係入邊。而當個班鬼完成哂佢地點死之後，佢地就會連同結界一齊消失，等聽日再死一次，再感受死前既痛苦。 哦...唔怪得之呢間學校會執啦，起係死位黎。 果然，當笑聲消失哂之後，霧都跟住消失。我發現自己原來正正身處係間學校既門口黎。 我調轉頭，向當年被英軍屠殺既村民鞠三個躬。希望你地可以盡快安息啦....