那些年，當香港仲係百鬼夜行既時代: 17. 再戰達德II -- 敗退

上次我灑出一堆符其實只係想阻止佢過黎，等我可以燒左佢隻飛頭蠻。阿頌以為我今次會再照辦煮碗咁用多次招障眼法，殊不知其實已經落入左我既圈套。 今次，我就要燒左你隻人蠱! 果然，當阿頌見到漫天符咒接連地唰唰聲點燃上黎個時意識到唔妥已經太遲，因為衝左入漫天符紙既人蠱已經比天火符燒到變成火人!我見狀就手持三張真紅符，向佢一個箭步衝埋去!人蠱身上又開始有蟲走出黎，但係一出黎，就比火燒著，雖然死唔去，但係活動能力大減，爬行速度都下降不少。我吼準機會，一下子貼左一張真紅符係人蠱既右手上邊!我無去望佢個表情係點，我只係向左手邊一碌，離開左佢同埋D蟲既攻擊範圍。 我迅速企返起身，只見隻人蠱雖然全身都著火，但係明顯地右手既火特別唔同。佢右手既火唔係紅，唔係黃，係深到反光既黑。個種黑令人望落去有一種絕望既感覺...如果比D火沾到上身，我諗點都唔會熄，直至你成個人燒成灰為止.... 人蠱痛極大叫，不停甩自己隻右手，希望可以整熄D火。但係D火無熄到不單止..仲愈燒愈上...由手掌一路燒，燒到去接近上手臂位置。人蠱係呢個時候，竟然伸出自己既左手，一下扯甩左自己比真陽火所傷既右手落黎! 哼，又係呢招。由於今次我無降無蠱係身既關係，阿頌係落唔到我降，所以隻手都無用，而人蠱就咁係掉左隻手係地下。 人蠱身上既火仍然燒緊，可惜個D唔係真陽火，只係假陽火，姐係普通火，所以唔會對佢有咩傷害。 我偷瞄左一下師父個邊。好明顯地，阿頌既蠱蟲比上次我捉既天敵蛇食左唔少，數量係明顯減少左好多。而師父應付得都幾輕鬆。日宮太丹炎光郁明太陽帝君既威力果然非同凡響，只見師父甩出一道又一道普通既天火符，一隻又一隻浴火既鳳凰就立即成型，橫掃全場。而阿頌亦都唔笨，佢將D蠱蟲分開幾批，分幾面夾攻師父，只係基本上都無咩效用，無幾多隻可以埋到師父時。 我見師父個邊無咩問題，我就將集中力重新放係眼前既人蠱身上。真紅符就仲有兩張，我要殺死佢，就一定要將佢燒到變灰。師父臨開打前同我講過，佢話燒得死佢固然好，燒唔死都無問題，最緊要重創佢，等阿頌無人蠱用。咁我只要燒埋佢個頭，佢都應該比我廢左一半武功啦?好，就咁話啦，有真紅符剩就再燒下佢d手腳。 我再度邁步上前，雙手各持一符，擺好姿勢，準備再衝向人蠱。豈料，一輪操兵聲同救命聲又再次傳入耳中。

係我同人蠱中間竟然再飄出一啲灰色既身影!遠處既戰鬥聲都嘎然而止，睇黎師父佢都見到呢一幕，所以都停左戰鬥。 我退返去師父身邊，因為今次好似同上次有D唔同。唔同既地方就係，今次伴隨呢D冤魂出現既霧異常地濃!甚至濃到我望唔到人蠱既身影。 「師父，呢層既霧...」 「隻人蠱點?」師父劈頭就問。 「下...呃...我已經燒左佢一隻手架啦。」我不明所以咁答師父。 「咁跟我黎!」 師父一講完，就領頭衝左入去呢片詭異無比既濃霧中!