那些年，當香港仲係百鬼夜行既時代: 15. 消降

當晚我送左雨瑤返屋企之後，就直接去左西環搵師父。 我詳細同師父講左今晚既經歷之後，師父低頭不語，似係諗緊野。 「嗯，除就一定要除去佢地，如果繼續比佢地係塊聚陰地到修煉，佢地既力量一定唔止如此，甚至幾倍上，到時害人真係話咁易。仲要個班慘死係達德既鬼，佢地每晚都要重複返當年比人屠殺既場景，其痛苦之大實在久非常人能想像。」嗯，果然同我諗既一樣。個班叫救命既鬼就係當年比英兵屠殺既原元朗村民。枉死既鬼要係人間不停重複返佢點死，直到佢既陽壽真係盡哂，咁先可以落去報到。當有大量枉死鬼出現時，佢地就可以令該地運有所改變，令類似結界既野出現。所以我地先可以見到佢地被殺既一幕。 「嗯，但係仲一個問題就係..到底佢...嗯...佢地...呃...」 我接過師父既話，「到底佢地有兩個人定只係得一個人?」 師父訝異地望一望我，「你好似知我想講咩喎。嗯，不過唔好諗住，當務之急，就係我要幫你完全清除蠱毒同降頭先，雖然你頭先有土地護體，但係身體入邊仍然留有降頭同蠱毒，唔清手尾會好長。」 「下，師父你點解認為我仲有蠱毒同降頭?我無感覺到有咩唔妥喎!」我一聽，不由得心中一驚。 「你隻眼珠上有條好粗既黑線，咁就代表你係中左降。」師父淡淡一道。「你除左件衫坐陣先啦，我去預備一下。」 下，唔係掛，有條黑線!?我當下即刻拎起一塊鏡，用力撐開自己隻眼。依係喎...真係有條黑線由我眼珠伸延到眼皮之下，仲要兩隻眼都係咁。下，唔係咁大鑊下話。 「唔使驚一仔，土地幫你擋左大半，我幫你消一消就可以。」師父拎住一個盆，又拎住一支毛筆。「坐低先啦。」 我依師父之言坐低。師父比左個盆我，拎住支毛筆兜左去我後邊坐低左。我就好順手咁除左我件上衣，我知道，師父係想直接用我身黎做符紙，等咒可以更有效。 「師父...我地要準備D咩去?」我低聲問道，我唔敢得意洋洋咁問，始終今場戰鬥我都係鎩羽而歸。 「呵，輕鬆D啦，對方係高手，又佔盡陰地地利，你輸左係正常，你可以全身而退，燒死佢隻飛頭蠻，我都已經好安慰。」師父好似睇得出我既心思咁，出口安慰下我。「我地要帶既野好簡單，雲南蠱蟲都係蟲，除左你所講既天敵外，佢地其實都係怕火燒，只係普通既火對佢地無效，一定要係三味真火先有效。到時只要我請太陽星君幫忙就可以收服佢地。之不過...」師父口一路講，手中既毛筆不停揮舞，係我身上寫上一道又一道既符。 「唉，我怕如果係一個人而唔係兩個人的話...咁成件事就好難搞啦...」師父稍作停頓，又再繼續講。 「元始徘徊 ，清鬼散靈，固身穩魄，妖邪莫侵!分!」師父大喝一聲。

我就忽然覺得胃裏一陣翻騰，個感覺就好似原地轉上五六十個圈。我立即就抱緊個大盆，開始嘔起上黎。

「話左有野未清架啦。你慢慢嘔啦，有排你嘔呀!」師父輕輕拍我背脊。 「嘔...我...嘔...嘔...」