那些年，當香港仲係百鬼夜行既時代: 13. 達德小學XII – 血降

只見阿讚一下子將佢頭向我拋過黎。我手中並無符紙，所以可以話係毫無還擊之力，但係正當我手足無措時，突然，一道道陰風吹起，伴隨住呢D陰風出現既，係一堆一堆既鬼，佢地有D面容潰爛，有D無左一隻手，更有D個係無左雙腳，只可以係地下無助咁爬。

 佢地口中不停喊住「救命呀...救命呀...」令人毛骨悚然既呼救聲，令我諗起個豆腐花婆婆講既說話，一到夜晚，總會有唔少客人聽到一聲又一聲既救命同操兵聲... 正當我防備緊呢班鬼做咩之際，一陣操兵聲又傳入我耳中。一幫都衣衫濫褸既人出現係我眼前，唯一令人印象深刻既，就係佢地清一色著住一雙閃閃生光既軍靴，同埋清一色膚色都係好黑。佢地手持好古老既槍，瞄準住個班人不斷開槍，槍聲此起彼落，班被屠殺既鬼接二連三咁倒地，救命之聲更加係不絕於耳。持槍個班鬼好似好滿足咁就大笑住走左。莫明奇妙。
係呢個時候，雨停左但係又一道轟雷。轟雷打係阿讚軀體後方不遠處。學校附近既能見度都高左好多，我甚至好似可以見到賣豆腐花個婆婆個檔口。佢檔口既油燈，就好似鬼火一樣，係風中左搖右擺。 「哼，奇奇怪怪。」原來唔單止我覺怪，原來個阿讚都覺。「受死啦細路!」突然佢語氣一轉，佢原來係半空中既頭又向我飛埋黎。我突然明白左D野。哦，操兵，救命聲，結界...明啦我! 「我都話咯老野!邊個要死都仲未知!」我唰一聲從我衣服入邊抽出一張早已寫好既符。 「九九輪轉，凶者必滅，天地合我，暫借天上天下雷火!離!」我大喝一聲，神雷火符重新出陣! 語音畢落，天空中又開始打雷。就係阿讚個頭就飛到黎個時，一支雷箭已經破空已至，直打係阿讚個頭到!阿讚無防備我有此一著，就比支雷箭打中。 對於有土地加持既我，對自然環境既感應劇增，加上結界已破，要祭出神雷絕對唔難。不過可惜，招雷只能傷到阿讚，並唔能夠一擊絕殺。始終人地修道時間比我長太多。 「咳咳..之前同你浪費得太多時間...依家自食其果..我應該估到你係一個聰明仔...咳咳...」阿讚個頭後退左幾步，懸吊係空中既頭部咳出血，而佢既本身既軀體就跌左係地下。 「哼...除左飛頭，我仲有一招絕活...我要你打直行入黎，行橫抬返出去!」 阿讚係呢個時候，佢竟然飛返去自己個軀體個到。 只見佢一下子將個頭嵌入返上去條頸到，跟住就搖搖擺擺咁企返起身，除條頸既傷口外，其他身上既部位就好似佢未放個頭出黎之前咁，無任何損傷。正當我訝異飛頭降之厲害時，佢又拎隻白色公仔出黎，吐出一口鮮血係上邊。 「睇土地點保你!血降係無人能破!」