那些年，當香港仲係百鬼夜行既時代: 12.達德小學XI – 飛頭降

秋風颼颼，吹到達德學校已經半爛既窗戶搖擺不定，發出刺耳既聲音。黑暗中，除左風同窗既聲音，我地唔難聽到有一個男人不叫亂叫。 「啊!我隻鐵臂蟲呀!我要殺左你，將你整做蛇羹!!生食你既蛇膽!」 同時，我地都唔難見到有一老一嫩係到對恃緊。 「土降中既千石降本身都係死降，你既土地又幫左你一次。」阿讚舐舐上唇，古古惑惑咁望住我。 雖然我中左招千石死降，但係由於有土地護住既關係，我仲可以慢慢復原返。但係同時，我感覺到土地開始走，散緊功。 我同佢之間，仲有六步既距離。但係呢一刻既我，只係慢慢向後退卻。七步，八步，十步，到最後，我返左黎雨瑤既身邊，到佢足足有十九步既距離。我從身中又抽出一啲符紙。 「細路，無用架，呢間學校都係我既施法範圍，你點退，都係要死。」阿讚面目猙獰，眼中射出貪婪既眼光。 「呵，邊個要死都仲未知!」我一把灑出手中既符紙。 「福星高照，安家保園，精氣固在，萬里無邪!」 就係漫天符紙既時候，我邊拎起隻飛頭蠻邊喝道。語音剛下，飛頭蠻前後已經貼左兩張天火咒。 緊接而起既除左阿讚既咒語聲，亦有我既聲。 「五行有道，無物自燃，神火天焚，惡鬼盡退!燎!」 突然，阿讚大叫左一聲!靠住著左火既飛頭蠻，我見到阿讚按住自己心口，就地雙腳跪低左。而隻飛頭蠻就不停係地下掙扎，不停大叫，而佢既叫聲好似一個帶有烏鴉聲既嬰兒一樣!聲音音節既尖又密，聽到人毛骨悚然。唔單止，因為高溫既關係，佢既眼窩燒到變哂型，眼珠就咁跌左出黎。而佢面頰肉就燒有液體流出，我諗呢D黃色既汁液就係屍油。 但係唔使好耐，隻飛頭蠻就無再出聲。應該係話佢以後都得無再出聲。因為佢已經燒到變成舊炭。 「你竟然燒死我隻飛頭蠻!」阿讚對住我怒吼。 我心入邊暗自竊笑，無得落我降啦掛死老野。 「阿頌!睇住我個身!我親自出馬!」阿讚調轉頭，同一條蛇糾纏既阿頌講。 「唔好呀師兄!你未練成就貿然使用...」

阿頌之後講咩我已經聽唔到。因為我比前面既畫面嚇到目瞪口呆。 阿讚竟然一邊唸咒，一邊自腰間抽出一白光閃閃既刀仔出黎，然後介落自己條頸到!

佢首先係咽喉位置大力一介，鮮血直濺，就好似噴水池咁，不過係一個鮮血噴水池!佢無停手，仲係頸既左邊，右邊，後邊都猛然落刀!到最後佢成個頭搖擺不定，好似就黎會由佢軀體跌落黎咁!但係承受緊巨痛既佢，口中依然崩出一個又一個古怪既音節。 音節稍停，佢隨手將把小刀向地下一掉。舉起右手，大喝一聲，繼而一把將自己個頭扯甩!而軀體上原本係頭既位置，依家就變成一道血柱。

我望住佢高高舉起既人頭，佢亦都居高臨下咁望住我。而佢對眼仲識眨。佢開始張開口。 「我要你為你既魯莽付出呢生人最高既代價!哇哈哈哈哈....」