那些年，當香港仲係百鬼夜行既時代: 11. 達德小學X – 降頭

降頭術，係雲南巫術既其中一支分支，佢係依家眾分支中既佼佼者，本身威力雖無另一分支祝由神功咁厲害，但係勝在多人識，而且又易學。降頭由雲南傳到去東南亞，幾乎所有東南亞既法師都唔會學道而係學降頭。學降頭既人中又分兩種降頭師，一種叫龍波，係係廟入邊幫人做正面降頭既，另一種叫阿讚，專收錢幫人落降頭，為錢乜都做，包括殺人。我面對既，應該就係呢種降頭師。 只見個阿讚又開始咀郁郁，睇黎又唸緊咒語，今次仲一路唸一路拎隻白色公仔出黎。我唔敢輕舉妄動，我對降頭認識始終唔算好深，中伏都唔知咩事。係佢唸咒個時，我都無空閒自己，我都不甘示弱，再拎出幾張符紙寫上天火咒。同先前一樣，我都係用血寫。唔使十秒，我已經寫好三張。 「我就睇下你有咩符FIT!」我大喝一聲，既然佢一味自己係到喁喁細語，我決定先發制人。 我同個阿讚距離並唔遠，大約只有十步左右。我三步併作一步，一下子已經衝到同佢只有七步既距離。只見佢不急不緩咁拎出一枝鋼針，然後狠狠咁插上隻公仔隻手到! 倏地，我右手劇痛，甚至連符咒都渣唔穩。 「金降。」阿讚緩緩吐出兩個字。 過左一陣，手既痛楚紓緩過黎，我執返起地上既符咒，企係原地觀察佢既下一步。 「嗯...睇黎土地神真係幫到唔少，針降本身已經係金降中既死降之一，估唔到就咁就消解左。」 哦，原來土地仲可以咁用，我都唔知添。 但係佢點解可以落我降既呢?我心暗忖。我又無食到任何野，佢又唔知我既生辰八字。諗下諗下，我眼睛不期然就落係隻飛頭蠻到。嗯...師父講過，降頭可以靠一啲山怪精靈幫忙，所以只要飛頭蠻身上有我既精氣，佢應該就可以落到我降。呢個阿讚唔簡單，佢竟然遙距感受到飛頭蠻身上既精氣，睇黎呢個都係佢派飛頭蠻出黎先行應戰既原因。可惡，原來飛頭蠻係咁用。我用一種怨恨既眼神盯住隻飛頭蠻。 「哦，細路，睇黎你估到啦喎!唔錯唔錯!」個阿讚深邃既雙眼好似可以睇穿我既心思咁。 「嘖!」落到我降又點?我有土地護身，只要一日神功未過，你既降都只可以持續一段時間咋。 我既然手持三張火神符，好!依家就先用一張! 「五行有道，無物自燃，神火天焚，惡鬼盡退!燎!」我淨空思緒，意念集中係一張火神咒上。一張天火符應聲而燃，我急忙將手中其中一條火龍揮出，自己就緊隨其後，希望埋到身可以搶走隻公仔。 係熊熊既火光中，我見唔到個阿讚做緊咩，但係我只係踏出左一步，我就發覺我全身變得好重好重，好似背負住千斤石頭一樣! 火龍係無我空明既思想，法力支援下好快就熄左。個阿讚依然不動如山。 口中微張，再吐出兩個字。 「土降。」