那些年，當香港仲係百鬼夜行既時代: 5. 達德小學IV – 飛頭蠻

「佢無啦啦困住我地做..做咩??」雨瑤問 「點知...佢地可能要我地個頭做飛頭降..又或者想食左我地，又或者等佢地D蠱食左我地...呃...」我口快快一時講哂我所有既猜測出黎，我唔記得我身邊女仔其實係好細膽。 「死啦!死啦!死硬啦!」雨瑤聽到我咁講，即刻嚇到喊左出黎。 「呃我講笑，講笑。佢地唔係食人族，唔會食我地。」我一路安慰佢，一路諗有咩方法走。 就係呢個時候，天空中一閃，將間房仔閃到好光。我又見到個頭。我忽然醒起師父講過，當今更厲害既降頭師都只係得一個飛頭蠻，因為除左製造飛頭蠻既條件極其困難，而且仲要不停餵養毒蟲，用不同既咒鎮住佢既怨氣，所以養到一隻都已經係雲南土司級別。咁樣...倒不如搏一搏! 「瑤，我諗到點做好啦。你去幫我搵下有無足球網，姐係裝足球個個呢。」我輕拍眼泛淚光既雨瑤。 「你想點...?」 「你去搵先，呢度應該會有。我要去搵枝棍同D膠紙黎。」說罷，我同雨瑤分道揚鏢，佢搵網，我搵棍同膠紙。 呢間小學睇黎都真係荒廢左好耐。我係間房入邊搵到既膠紙已經完全無哂痴力!但好彩，我最好都搵到一卷牛皮膠紙。嗯，呢卷膠紙絕對唔會係體罰學生個時貼係佢地個咀到既，唔好亂諗。至於棍，周街都係，我執左三枝，一長兩短。 返到去頭先雨瑤坐底既個位，我已經見佢一手都係網。「邊個係裝足球架?我唔識分...」唉，真係傻妹。 我係佢手拎左兩個網，開始將網既一端同棍既一端痴埋。大功告成。古有蘇軾郊野撲蝶，今有我上官一達德撲頭! 「你想捉住個頭...!」 無錯。我就係想捉住個頭，引個降頭師出黎!但係...雨瑤點呢?我個張符又無效，叫佢留係到唔知會唔會有危險...唉點解張符無用架...明明呢D簡單家宅符我已經畫過好多次。 「瑤，你跟緊我。我張符應該對降蠱之類無用。」我伸手遞左一枝短棍比佢。「用黎自保，雲南既降蠱唔同傳統道法家既鬼，佢地有形有質，你係可以打傷佢。」

「準備啦...喂!!我係到呀!!」我由一堆破爛既枱櫈後邊跳起，對住個頭揮手同大叫。 個頭本來係背對住我，依家開始慢慢調轉頭...雙眼空洞無神..原本係鼻既個個位已經塌陷左落黎，只係得返一個洞..耳仔又無左一隻，頭髮稀疏。正宗死人頭。 見到我，佢不虞有詐，佢開始向我地飛黎。我就一路揮手，一路引返佢去一個空曠D既地方。我同雨瑤穿過左一間房，黎到一個操場咁既地方。我咪話間學校U字形，個操場就係U字既中間位。神奇就神奇在，學校外圍仲係雷聲大作，滂沱大雨，但係間學校就水靜鵝飛。唉，真係中哂伏。我無暇細想究竟眼前到底係幻像定係現實，因為個頭已經跟到黎。 「瑤，企埋一邊先。呢到空曠，有咩事我可以救到你。」 我同雨瑤講完，就隨手拈起一張符。張符上邊已經一早寫哂咒文，因為呢張符係師父係我臨出門口前比我既。佢話新界多怨靈，死係日軍手下又有，英國手下既都有。真係估唔到師父咁有先見之明。雖然唔係對手唔係鬼，但係我諗張符都幫到下手既。 「 無上五行，三魂永久，天罡護身，出幽入冥 ，為吾開路!急召土地護我身!」