那些年，當香港仲係百鬼夜行既時代: 4.達德小學III – 雲南蠱降

「瑤，你聽我講，唔好郁。」唉，人就係犯賤，愈叫佢唔好點點點，佢就偏點點點。果然，雨瑤聽到我咁講就驚起上黎，即刻爬起身衝過黎我到。個頭好似一時間反應唔黎，無追住雨瑤。 我伸手拖住雨瑤，「跑!」我拖住雨瑤向個人頭反方向跑，穿過左兩間破廢既課室，黎到一個雜物房咁既房。入邊周圍都係蜘蛛網，周圍都係灰塵。個人頭係咩料!? 「一!頭先做咩呀?有d咩恐怖野呀!?」雨瑤攬住，好似嚇到喊左出黎。 「哦無事無事。我見個邊好似..呃...好似有條...蛇姐，所以咪叫你唔好郁囉。」我輕撫摸佢既頭髮，算係安慰下佢。「坐底先，我去睇下雨有無細到。」 我安撫好雨瑤，我就行出去門口，睇下個人頭係邊。四周圍除左一堆爛木板，就係一堆枱櫈。唔見個個恐怖既人頭。 到底個人頭係咩黎呢?我心暗忖。黑板D字會唔會有關係? 黑板D字...好似有D熟...藏文?無理由丫...我學過一年藏文，最基本既字我應該識睇下至係架...唔通...「我知啦!彝文!」我拍一拍手。 「下做咩丫阿一!」哎，太大聲嚇親雨瑤添... 「無事無事!我終於知道黑板個D寫咩姐。原來係彝文黎。」我往回走，行返去雨瑤身邊，輕拍佢手背道。 「下，雲南彝文?」雨瑤一聲輕呼。「點會係呢到出現既!?」 「我都唔知...」黎到呢一刻，我唔能再呃住雨瑤..既然牽涉到彝文，姐係話個頭唔係一般野。我唯有如實同雨瑤講其實頭先有個頭伏係佢膊頭到。佢嚇到面都青埋，跟住又係咁拍自己膊頭。 我伸手阻止住佢，「傻妹，走左啦個頭。」 係，個頭的確依家走左。但係佢一定會返黎。 但係為左證實我既推測，我決定搵下睇下呢到有無蟲。間學校依山而建仲要咁耐無人黎，好難會無蟲。但係偏偏呢到就係一條蟲都無!連蟻都無隻!中啦! 我抽出符紙寫左一度符，再收返埋，度符威力太大，縱然我有天生陰既體質，我始終法力未夠，就算單憑道符殺退個頭，出埋間學校，我諗我都無力帶雨瑤返市區。 「阿一...我地..我地係咪出左事啦...?個頭到底係咩黎?」 「我地中左雲南佬既降頭同蠱。呢間學校就係佢地既大本營。佢地以呢間學校作為結界，再以飛頭蠻做守衛，困住我地唔比我地走。」 雲南飛頭蠻，古結界，蟲蠱。不妙。