那些年，當香港仲係百鬼夜行既時代: 2.達德小學

婆婆個樣好認真。佢唔似係講大話耍我地兩個。「後生仔..食完你地都好走啦...唔係我都無辦法架啦...」講完，婆婆扭頭就走左。 我望住雨瑤，「驚唔驚要係到過一晚?」 雨瑤望返住我，眨一眨:「你陪唔陪我先?你唔陪我就驚。」 我笑一笑，其實我唔係想同講咩肉麻野。而係我真係有呢種感覺，今晚可能真係搵唔返路走。 天色已黑，黑暗中既唯一光源就係婆婆檔口既一盞油燈。微風中，油燈隨風飄逸，好似鬼火咁。 雨瑤輕拖住我，「走啦。」 我無講野，我擺低五蚊比個婆婆。五蚊當時其實已經唔少錢，我諗食餐夜晚都得，但係我見婆婆咁可憐，得佢一個生活係山上，所以我決定比多少少，反正碗豆腐花又真係幾好食。雖然我無叫到婆婆出黎，但係婆婆好似知我地要走，佢係收銀處探頭出黎，「後生仔!小心D呀，有咩事返返黎，唔好係山入邊亂行呀!」 行左唔夠兩步，雨瑤無啦啦丫一聲尖叫。「我踩死左條蟲呀!好核突呀!」唉，平時已經住係山村架啦，都仲咁驚。 「山無蟲你仲驚啦...走啦白痴妹。」我拖住雨瑤離開條蟲既屍體，繼續行落山。 但係行左成三十分鐘，我地竟然仲係座山到行緊!轉多兩轉，竟然真係蕩失左路。 我因為有過嘉賢臺個次既經歷，所以我出街都會帶少少符咒，同埋一枝筆。師父話過用咩寫符唔會起到決定性作用，反而心態，思緒會。換言之，原子筆寫既符都會有，當然，無朱砂，甚至人血寫既咁靈。係呢個時候我摸一摸D符，準備一陣會用到佢地。 古語有云:屋漏偏逢連夜雨，船遲又遇打頭風，無錯，就係呢個時候，竟然落起雨黎。我地估唔到個天會有此一著，所以我地出發前都無諗過拎遮。 「瑤，個邊有間建築物喎，不如過去避一避，等停雨我地再行啦!」我指一指前方，無錯，黑暗中的確有個龐然大物係風雨仍然仡立不倒。 我拖住雨瑤，一直跑，三幾分鐘間。我地就跑到去個間屋到。一路上，我地都見到有好多蟲，有D講得出名，有D講唔出。落大雨D蟲都無理由會走哂出黎架...至少我屋企附近都唔係咁。不過我無暇理會D蟲，甚至踩死左幾隻。雨瑤自然一路不停「咦!吖!哎呀!」

「學校黎架喎原來!」到我地跑近間野既時先知呢間野原來係學校黎。 門口有一副對聯，「達期兼善，德修於身」 ，唔，好聯好聯。 而係對聯上邊，就寫住間學校既名。校名經過歲月洗禮，已經有少少模糊不清。我咪起雙眼去睇。 「咩名呢....達....達德...哦!達德小學!」