那些年，當香港仲係百鬼夜行既時代: 1.元朗屏山

如是者，我畢業之後既個一年都無搵野做，只係成日去師父屋企練呢樣個樣，有時什至會係師父過幾晚。好神奇地，師父雖然都無返工，但係唔知係邊變D錢出黎，總之我就有飯食，有時仲有新衫著下。我有問過師父D錢點黎，佢總係輕描淡寫咁話同人破下地獄，驅下鬼，睇下風水咁搵返黎。我見有錢用，我都無再點追問..但係之後既件事，先令我知道師父既錢係幾咁難賺返黎... 1978年既某一日秋天，我約左雨瑤去玩。當時既去玩唔係去灣仔，銅鑼灣行街，亦都唔會去睇戲，因為個時上演既多數係咸片。咁我同佢去邊?我同佢入左元朗屏山。當年既元朗都幾荒山野嶺下架，不過野人條死仔話元朗有檔好好食既茶果，又有好好食既冰凍豆腐花，仲有古式冰糖葫蘆喎。其實某程度上唔係我約雨瑤，係佢一聽到有咁多野食，佢就猛咁話要黎。咁我又無野做，咪陪佢入黎元朗行下囉。 我地經1978年上旬先開既屯門公路坐小巴入到元朗。雖然我地係市區十一點另出發，但係因為要轉好多程車既關係，入到元朗都成三點幾。 「嘩...野人張所謂地圖咁簡陋...點搵呀...」我拎住野人比我同雨瑤既地圖嘆息。個張所謂地圖有幾個特別顯著既地方，一，茶果檔。二，冰糖葫蘆檔。三，豆腐花檔。由於個三檔野形成一個神秘既三角，野人可能都知我地未必搵到，所以有第四個點出現，個個就係元朗市集。佢係係個三角形中間既一點。 「拿，我地依家就係呢到...」我指一指元朗市集比雨瑤睇。「我地食左茶果先，再去食冰糖葫蘆，再去食豆腐花好無?」 「好啦好啦，快D啦!」雨瑤依家滿腦子都係食，條路係點行佢其實都無咩所謂。 我地唔使幾耐就食左茶果同冰糖葫蘆，來回路程其實唔係好遠，只係我同雨瑤一路玩一路行，所以搞到六點先去食豆腐花個到。 食豆腐花個到叫屏山，唔講唔知，原來呢到曾經想起飛機場，50年代港督葛量洪本身話係到起飛機場，但係一聽到話飛機起飛時會經過中國，就即刻撤回方案，好似話怕D飛機會經過中國途中比人打落黎喎。 食豆腐花個到就屏山既一座山上邊黎既，有路行上去，唔使二十分鐘，我地已經行到上去。 甫坐底，有個婆婆就拎左兩碗凍既豆腐花黎。

「咦婆婆，你又知我地要食凍豆腐花既?」雨瑤問個婆婆。 「黎我呢到既都係食凍豆腐花架啦，唔通黎食法國大餐咩!」婆婆好自豪咁答佢。「唉...不過都唔做得耐啦..」 我食一口豆腐花，唔，好滑，又夠甜!「點解呀婆婆?你仲好壯健丫!」聽到婆婆話唔做我覺得有D可惜。因為咁好食既豆腐花我平時係食唔到。如果婆婆唔做，香港人就真係無食神。 「唔係我身體問題....後生仔，你知啦...食豆腐花既一定係食完晚飯先上黎。路程唔係一個問題，問題係在於唔知點解有客話食食下個時聽到怪聲。佢地話雖然D怪聲好遠，但係聽落去好有真實感。呢樣都未係我做唔到落去既原因，原因係，有客話搵唔返條山路落去，搞到佢地要係到過一晚。我無所謂呀，橫掂我都係係到訓既姐。」 我一聽，就知有古怪。因為久經訓練，我對靈界之事已經特別敏感。「婆婆咁佢地有冇話聽到怪聲似咩?」 「佢地話係慘叫，又話聽到救救我咁喎...同埋有客話聽到好似係操兵既聲...」