那些年，當香港仲係百鬼夜行既時代: 20.嘉賢臺 – 後話

係師父收完隻鬼之後，我不禁又再回味係嘉賢臺既個場激戰。八旗護法、神獸...丫係喎，個D動物到底係咩神獸?點解可以同八旗護法打成平手咁勁既? 「呃師父，我仲有問題。你係嘉賢臺同隻女鬼激戰既時候叫既動物係咩動物?」  「嘿，咩動物呀!神獸黎架!箕水豹，奎木狼，牛金牛，危月燕，鬼金羊，尾火虎，心月狐，角木蛟，隻隻都有名，廿八星宿黎架!所謂廿八星宿就係青龍白虎朱雀玄武既手下，個個都好好打。」 嘩個幾隻動物原來係神獸!我真係有眼不識泰山!如果師父教我叫到一隻，丫唔係，叫到黑白無常都得，我就可以自己一個收魔捉妖啦! 諗起呢度，我不禁面色一變。叫黑白無常?師父手持既一黑一白既野王大牛都話見過，唔通師父就係.... 「師父!你叫黑白無常出黎助陣既時候係手持一黑一白既野喎!王大牛話佢比人叫醒個時都見過!」 「哦!?竟然係咁!?世上竟然唔至一對黑白無常既用具!?拿，就咁既，白色個枝叫火籤 ，黑色個舊就叫方牌，上面就寫住「善惡分明」 四字。呢一對用具係你師叔司馬帝係二十年前，係大陸幫人消滅黑凶白凶個時搵到。佢自知自己請神術未曾到家，所以先將佢地比左我..真係估唔到...」師父面色訝異，睇黎受到好大既震驚。 係師父呢段對話入邊，我知道左幾樣野。一、我原來真係有師叔。二、師父對有另外一套黑白無常既用具感到訝異，姐係話叫醒王大牛既人絕對唔簡單..唔知點解，我諗起劉伯溫既鬼。 「師父..個個人，姐係手執呢套野既人，會唔會就係劉伯溫?」我將我自己既懷疑講左出黎。 師父輕皺一下眉。「嗯，可能係既，但係佢叫醒王大牛黎做咩?佢係鐘意直接食剛死之人既魂架嘛...食左去咪算囉...」

陳伯，王大牛，義莊，老人院... 我靈機一觸，「師父，你估佢會唔會用王大牛黎做一個探子呢!?佢如果真係要用人間既人幫佢做事，佢大可以搵副身體強而有力既，唔需要搵個阿伯丫!佢搵個阿伯既身體，會唔會就係想掩人耳目，好等王大牛可以入到去老人院到!?」 師父點點頭，示意我繼續講落去。 「老人院既老人家多數係無親無戚..死左唔會有人理..只會放過去義莊就算...劉伯溫會唔會係想食頭啖湯，等D老人家一死就即刻食佢地既魂呢?」 「有可能!劉伯溫老謀深算....咁我記得啦!阿王大牛話聽到個幾個字都可解釋到!死逃走亡，呢四個字係喚醒黑白常既咒語其中一啲字!生死有命，劫數難逃，無路可走，亡於陰冥!嘿，劉伯溫，你呢隻老謀深算既老狐狸!」 睇黎所有既疑團都解開哂啦。劉伯溫就係最核心既人物。師父好似憂心忡忡咁。 「唉..我有生之年都唔知可唔可以捉得到佢...見步行步啦!我諗我都係時候要教你一啲有威力既咒，等你有返D自保能力，我覺得我地遇到既事有D愈黎愈唔簡單....」 ---------------------------------------------------------------第二部完---------------------------------------------------------------