那些年，當香港仲係百鬼夜行既時代: 18.照鬼

「一仔，走啦。收左啦。」師父輕輕拍我膊頭。我無去求師父救阿雪，因為佢已經魂飛魄散，佢既本命，修為所有野都已經無哂。 我抹一抹眼淚，袋返好阿雪，我就起身跟住師父離開嘉賢臺。一路坐車返師父屋企時，我都路把玩隻公仔。隻公仔係師父收服左隻女鬼之後就變返做之前未吸收隻鬼既時候個樣。黑色連身裙，白色洋傘，同正常人無二既眼... 「一仔，你帶住隻公仔啦，話唔定隻公仔又可以吸收到你既靈氣，再重新修煉架。」師父忽然彈出一句。 「嗯...」重新修煉又點丫..都唔係阿雪咯... 師父無再講咩野，因為佢知道點講都無用，要我自己諗通先得。返到師父屋企，師父將一個樽放係一個神像前面。 「一仔，你坐下，我要去買D野返黎鎮佢。」 「嗯....」我無意識地答師父一句。 「唉...」師父搖搖地，就開門走左。 我依然拎住隻公仔。突然，我感覺到好似有人摸我個頭。我開天眼周圍望。莫講話人，連鬼都無隻。 「咪喊啦。」係阿雪把聲! 「喂，你係邊!?出黎見下我!」但係我搵勻全屋都唔見佢既蹤影。 「我走架啦，我同秦廣王講好左數，我會用我五十年修為黎換一次輪迴既機會。」阿雪把聲再次響起，睇黎佢心意已決。 輪迴?唔係魂飛魄散?唔係咩都無得留低?「喂拜拜都唔講聲呀?」阿雪見我無咩反應，佢再次開口。 「唔好唔記得我呀，同埋係下邊記住睇路唔好仆親。拜拜!」聽到阿雪有得輪迴，有機會做人，唔使困係隻娃娃入邊，我心情當堂好返D。 「嘻嘻，好啦。拜拜!」呢次係我最後一次聽到阿雪既笑聲，就算佢係鬼，但係笑起上黎把聲仲好中氣過人。 阿雪，再見啦... 過左無幾耐，師父就返左黎。 「一仔，食野先啦，成十點啦。」師父FING一FING手中既飯盒。 真係唔講唔覺餓，可能頭先太傷心，, 所謂哀莫大於心死，更何況係肚餓呢D小事更加唔會有感覺。我接過飯盒，開始狼吞虎嚥咁食起上黎。師父本來望我既眼神係有D擔心，但係見我呢副食相，就知道我已經諗通左。 飲飽食醉之後，我就幫師父收拾好D野，師父就準確鎮隻鬼。老實講，我跟左師父咁多年都未見過佢鎮鬼。鎮其實已經係差唔多等於殺死隻鬼。佢只會度，或者充其量收。雖然我滿腹疑惑，但係我唔敢問佢，因為我怕會打擾到佢鎮鬼既思緒。所有道法，咒，結手印，踏天罡步都係一樣，思緒係十分重要，一定要心無雜念，去用至誠至真既心去請到天地幫助。你話，人力係幾咁渺少。 師中手中拎住一面銅鏡。口中唸唸有詞，我知道，呢個步驟叫做封身。鏡可以照到人間所有野，包括鬼。點解有時照鏡會好似有野閃過，個D就可能係鬼。所以要鎮鬼，就一定要照到隻鬼既原型先。封身可以令面鏡只係照到鬼而照唔到人。 「一面善鏡，三司封身，五倫永恆，七度苦海，九道天照!封!」