那些年，當香港仲係百鬼夜行既時代: 17.阿雪

正當我會比佢所整死既時候，一個白色既身影飄左出黎，擋係我身前。就好似當晚係小巴咁。 人所謂比鬼整死，其實只係人既腦電波受到混亂，只係受到嚴重影響者會直接腦幹死亡。但係鬼唔同。當鬼同鬼打起上黎，一係本命受損，一係修行受損。姐係話，擋係我前面既阿雪，有可能會比呢隻女鬼打到魂飛魄散。 「唔好呀....」見到阿雪幫我擋但係我又做唔到乜野，我只能夠絕望咁叫一聲唔好。 「哼，就憑你去擋我一爪!?」女鬼毫無同情心，一爪直接抓中阿雪塊面。阿雪當下即刻好似風箏咁向後直飛。 女鬼一擊得手，我當然向後退卻。一路退卻時，一手抽出師父比我既鎮鬼符。用左折福又點?唔用我點得住幫我擋左一下既阿雪!?  「太上敕令，驅邪縛魅 ，冥界天道，金光速現! 」 手中符紙再一次顯現令人感到好有安全感既金光。 但係隻女鬼好似唔受張符既光所影響。我把心一橫，將張三角形既符一下子拆開。頓時金光更盛，但係又唔至於刺眼。 「太上敕令封鬼符!?哈哈，擋不到我的。」隻女鬼講得無錯。真係擋佢唔住，佢仲一路直沖緊黎我到，只係速度已經係好慢好慢，好似烏龜咁慢。

好!既然咁都唔得...我決定將張符貼上佢個額頭到!師父曾經講過，額頭係最近大腦既位置，如果將張符貼上人既額頭，係可以幫佢更快紓緩人混亂既腦電波。好!咁就等我今日破你本命! 女鬼同我只有十步距離，加上佢又行得咁慢，我輕易而舉就可以將張符貼上去佢額頭。佢見我拎住符衝過黎，本能想避，可惜，佢太慢。啪的一聲，我貼左上去。 「一，我黎收佢!你張符只可以停佢十秒，你張符已經廢左架啦，十秒過後佢再郁返，你就大鑊!快D後退!」 聽到師父咁講，我雖然想打佢一身，但係奈何無法器係手，我唯有等師父搞掂。 當師父匆忙跑到隻女鬼身邊個時，我都跑到去另一隻女鬼既身邊。 「阿雪，阿雪你點呀??」我望住阿雪半透明既身體，我眼眶有D發紅。 「嘻嘻，傻既，我邊會有事。咳咳咳...」

「我去搵師父過黎!你頂住!」我眼見阿雪既身體愈黎愈淺色，我真係好怕佢會就咁消失。 「唔使啦...我..我走架啦..你乖丫要聽師父話...」阿雪好似想摸下我塊面，但奈何，鬼同人係接觸唔到，所以阿雪只係係空氣中亂抓一把。阿雪既身體已經去到幾乎睇唔到既咁淺色，唯一深色D，就係佢雙眼。 「阿雪...唔好走呀...」雖然相處左唔係好耐，但係我真係未試過有我識既人係我面前離世既個種味道。 我想抱住阿雪，但係抱到既就只有空氣，同埋我既眼淚。 阿雪始終都係消失左。魂飛魄散了。 我拎住阿雪隻公仔。眼淚不停咁流，有D甚至滴左落隻公仔。眼淚入邊有內疚，傷心，悲哀。 點解要走?點解你走得咁輕鬆我就要生存得咁辛苦?點解惡鬼唔使死，好妖就要? 點解?