那些年，當香港仲係百鬼夜行既時代: 13.尾班車II -- 娃娃相救

我一把拉過雨瑤到我身邊。我眼前呢個男人一定唔係人。人既頭點可以咁轉法!? 今次真係大鑊。係咁窄既環境我又唔可以踏罡步施法。我又無符係身。手印又唔識打。 可能佢嬉得太聲既關係，我左邊女人既線視都由窗外轉而望過黎。 「平時一個人都無，全車清一色鬼，今晚竟然走左兩個生人上黎喎嬉嬉嬉...」 死啦今次，真係死啦 「你收聲呀!唔淮笑呀!」雨瑤睇黎都好驚，因為佢已經唔係拖住我隻手，而係攬住我隻手。 我..再用鎮鬼符??但係師父告誡過我鎮鬼符唔可以成日用...因為有損鬼魂既陰元，係會損福。正當我愁緊點搞既時候，我突然發覺，係我同左邊女人中間好似又有一個身影出左黎。 白色連身裙，係空中漂，拎住把遮...我隻娃娃!?我即刻將放係褲袋既娃娃拎出黎。 一模一樣。隻娃娃同個影係一模一樣。只見個影愈黎愈深色，到最後，一個好實在既人出左黎。 「點呀?你地係咪想搞佢?」女鬼開口。把聲有D似雨瑤，但係我好肯定唔會係佢講野。係隻女鬼。 「唔...哦乜係你呀雪姐。你要護佢咁我咪算囉。」本來嬉得好開心既個隻男鬼，見到我隻娃娃女鬼一開口，佢就另返轉個頭，唔再出聲，無哂癮。 但係我無心情再理佢。雪姐?隻女鬼叫雪姐? 「呃..阿雪?」 聽到我叫佢，隻女鬼用佢流緊血既雙眼望住我。「係?」 「你係娃娃入邊既...鬼?」 「我係娃娃本身丫。暫居係入邊隻鬼只係識係咁小女子小女子咁叫架咋!」阿雪向我微笑。又真係唔似隻女鬼。個隻女鬼笑得好肉酸。不過咩叫娃娃本身? 「即係點呀?你又唔係隻女鬼，你係邊個?」雖然雨瑤岩先仲好驚，但係見到有人壓得住場，佢都放心下來，問阿雪野。 「呵呵，我跟左你師父好多年架啦，你問佢啦，我唔自己講嬉嬉。放心坐到返屋企啦。」 一路上，阿雪就係架車到行黎行去，同呢個講野，個個講野。好似同D鬼好熟咁。佢既行為更加激起我既好奇心。到底咩叫娃娃本身既鬼魂?佢真係唔係隻女鬼?師父又養左佢好耐? 「生人落車!!」小巴司機突如其來既一聲大喝，喝到我有少少魂不附體。 原來唔經唔覺，架鬼小巴真係已經停左係薄扶林村村口。 我拖住雨瑤拿拿臨落車，阿雪都跟住我落。 我望住阿雪，佢又望住我。 呢個時候，雨瑤輕輕拉一拉我件衫，「頭先個阿雪呢?」 我又望一望阿雪。佢就企係我隔離。仲要同我扮個真真正正既鬼臉。 「佢走左啦..我送你返屋企先啦瑤。」 直到我送完雨瑤返去，我先返屋企。屋企人都係同雨瑤一樣，睇唔到阿雪。 「好啦你返到屋企啦，我任務都完成啦。」語音未落，阿雪就憑空消失左。我叫都叫佢唔住。想再叫佢出黎又唔知點叫。 三番四次有鬼相救，睇黎我呢世仔都真係有返D運。