那些年，當香港仲係百鬼夜行既時代: 14.娃娃靈

翌日朝早，我一起身第一時間就坐車落西環搵師父。我好想知琴晚發生咩事，而阿雪又係邊個，仲有我好兄弟依家點樣。 「叮噹!叮叮叮叮叮...」因為不停咁禁個鐘，搞到門鐘既聲音都變得有D怪，只係播到頭一個音出黎。 「死仔使唔使咁心急呀!?」師父一開已經講呢句，睇黎佢知我今日會黎。 「師父，阿雪係邊個呀?同我血索左既隻女鬼又去左邊?仲有黑仔佢地點??」我急不及待咁揚揚手中既娃娃公仔，口中連珠炮發問道。 「黑仔佢地走左啦，無事啦。至於其餘野，你去拎兩杯茶黎先，我慢慢同你講。」師父坐係梳化，不急不緩咁講。 我聽言都鬆一口氣，黑仔佢地無事啦。然後，我係廚房拎左兩杯茶出黎，一杯比師父，一杯當然自己飲。  「嗯...我咪同你講過，如果動物係人間生存得耐，佢會有能力去修煉自身，可以成精、成靈、成妖甚至成仙既?」 我當然記得師父講過啦，我仲記得佢話古時三國既孟獲用動物幫佢打仗，而個D動物全部都係靈既級別。一隻老虎靈已經等於十隻老虎精既能力。所以師父問起，我當下就點點頭。 「其實唔單止動物可以..死物都可以。嗯...茶沖得唔好，茶葉只係過左一次水，我同你講過要過一冷一熱既水架嘛!一陣再沖過。嗯講到邊?」師父將副心機放係D茶到，講講下D茶就唔記得自己講到邊。 「你話死物可以修煉...」 「丫係。死物都可以修煉自身，可以成精、成靈、成妖、成仙。不過成仙就只限自然之物，例如石頭，樹等等。阿雪就係咁既情況。呢隻娃娃本身係一隻普通既公仔，但係當有一D靈氣沾染到佢，佢就會憑藉個點既靈氣去發展出自我。我成日帶住佢去收鬼，佢當然會沾染到我既靈氣。再經過佢自身既修煉，佢依家已經係娃娃靈，可以上人身，幫人，同鬼同人溝通。」 「哦...佢琴晚救左我同雨瑤...」 「哦?點救?講黎聽下?」師父好似好有興趣知琴晚係小巴發生既事，我就慢慢同佢講返。 「咁你留住佢啦。有時連我叫都叫唔到佢出黎。佢一定會保護你，尤其是係中西區南區呢頭，因為幾乎無鬼唔識佢同我。而至於琴日你就真係大意，點會上左地府尾班車既呢?唔係阿雪你可能又入多次陰曹地府架啦。」 我望住手入邊隻公仔，雖然個樣係好似嘉賢臺隻女鬼。 「丫係，我揀左日子，後日申時(下午三點至五點)去睇下嘉賢臺班鬼咩料。記住帶埋阿雪黎。」 「哦好啦..我後日會準時到。」我見師父已經打點好哂，而我又無野想問，就打算走先。「咁...呃..咁師父我走...」 「哦好，走先好，不過記住沖過杯茶黎先好走。」