那些年，當香港仲係百鬼夜行既時代: 12.尾班車

 在場仲係清醒既人本黎就圍住隻娃娃，一聽到佢開聲，就即刻跳後兩步。 「睇黎佢既一魂兩魄就只可以幫佢講到呢一句出黎。唉，我擇個吉日先帶埋佢去搵佢本體啦。」師父無奈地甩一甩頭。 「小女子身世咁可憐，你竟然咁忍心離我而去...唔好走呀!留低陪我一生一世!!!一!生!一!世!!」 「師父..佢係咁叫都唔係辦法架喎....」雖然隻公仔把聲未至於去到令人受不了，但係就好尖，好似一個女高音唱歌咁。 「阿一，你比少少你既血我」師父開口。 又比血!?我頭先係嘉賢臺先出血又出力咋喎!唉，不過師父叫到，我唔比佢，佢都會介我手指拎我D血架啦...好好好..比少少啦。我忍痛係我中指上輕輕介一下。再將手指遞比師父。 「視之不見，聽之不聞，惡鬼速消，重墮三世!妄逆天命，灰飛湮滅!血索為引，封之! 」
 師父一手拎住隻公仔，一手拎起我隻仲鮮血直冒既手指，然後竟然用咒幫我同隻公仔以血索既方法連繫住! 所謂血索，係指用自身既同一D靈體連繫埋一齊。你會成為該靈體既主人，個主人有咩事，靈體就會幫佢，隻靈體係會完全聽主人話既。類似養鬼仔，不過同佢唔同既就係，血索既形成係要大家都夾先得，如果有雙方既時辰八字唔夾就形成唔到血索。 「師父!」我知道血索既用途，如果連個關二哥黎，我就真係萬鬼莫敵。但係衣家連隻只係識叫既惡鬼比我... 「放心!隻女鬼一定無惡意，如果有惡意，你地今日一定唔會係我屋企出現!我連住佢同你，係想你可以幫佢，積下陰德。」 「連住我同佢就可以積陰德?」 「唔係咁簡單，你同佢連得埋，姐你就係唯一一個可以將佢帶黎帶去而佢又唔會依嘩鬼叫既人!」 哦，借我肉身過橋啦姐係?唉，好啦，見你咁慘我點會唔幫你丫，比人拋棄喎。我望住手中既公仔，突然又覺得佢唔係咁恐怖。 「你地走先啦，我會再黎搵你地，呢度有幾張平安符，一張袋一張，如果張符變黑就要黎搵我!」正當我望住隻公仔發呆個時，師父就每人比左張摺成三角形既符比我地。 「咁黑仔佢地...?」雨瑤有D憂心咁望住黑仔佢地。 「最好就留係到一晚，我怕巨依家個魂咁弱，行夜街會比其他惡鬼搞。」  「咁留低佢地啦，其他人各自返去啦。」我有D悶悶不樂咁講。好地地一個燒野食，搞到又撞鬼又比鬼迷，仲要搞到黑仔佢地咁...唉.. 師父過黎拍一拍我膊頭:「是福不是禍，是禍躲不過，人既命就係咁，唔使太怪責自己既。」 最後，野人理所當然地送走佢新女朋友同埋另一個女仔朋友走，而我同雨瑤住得比較近，所以就由我送佢走。 同野人佢地分道揚鑣後，我就同雨瑤等小巴尾班車。 「雨瑤呀...呃...你..呃...嗯..無事真係太好啦。」我講完呢句都鬧自己白痴，唔通有事都好咩! 「其實你頭先係嘉賢臺怕唔怕?我好驚...我見到隻鬼不停咁追住我地...」雨瑤無理到我D白痴開場白。 「我..我其實就只係想保護你..地..所以都無話怕唔怕。」 「保護我...?」雨瑤抬頭望住我，我感覺到我塊面好熱，應該已經紅到好似個利是封咁。 「呃..嗯!」我用力點點頭，始終女神自己問到我係咪保護佢，咁我當然答係啦。 「多謝你...」雨瑤dup低個頭，細細聲咁講。 唔知點解，我竟然有股衝動想拖住佢。正當我想申手一刻，小巴就出現了。雨瑤重新抬頭，「有車啦。」 我望住迎面而黎既紅色小巴，感覺到好似有D唔妥。尾班車點解會咁多人既? 西環，尾班車，坐哂人... 正當我下意識想捉住雨瑤時，雨瑤已經向馬路方向踏出一步，當我拖住佢手時，佢都截停左架小巴。 「上車啦。」雨瑤無甩開我隻手，反而仲拖緊D。當下我腦突然一片空白。 呢段既斷片期係直到我同雨瑤係小巴尾位坐低先結束。 「點解咁多人既尾班車都...」雨瑤好似覺得有D怪。 我正想開口接既時候，前面有個男人個頭竟然180度轉過黎，笑住咁講: 「係囉，點解咁多人既呢小妹妹，嘻嘻嘻嘻嘻嘻嘻 ....」