那些年，當香港仲係百鬼夜行既時代: 2.拜訪

屋企既時鐘踏正六點。同時屋企既門鐘亦響起黎。 我急急忙忙去開門，只見宇文將執得好事正咁企係我屋企出邊。 「快D請宇文師父入黎啦一仔，你做咩丫。」我媽一把推開我，迎請宇文將入屋。 「上官生，上官太你地好。我叫宇文...」

「宇文師父唔使同我地客氣啦!我地都只係粗人黎。」我老豆同宇文將握下手，就請左佢坐低。 而我阿媽開始拎D野食出黎...魚...雞...菜..仲有湯，當然唔少得一枝XO。嘩!我咁大個仔除左去飲都未見過咁多一餐咁好 餸架! 「我唔客氣啦!」我立即搶過一隻雞脾放入口到啃。 「喂一仔!」我阿媽拎住筷子好似想打落黎。因為正常黎講，我地屋企係要讓長輩食先。 「上官太，由佢啦，你不如有咩想問就問左先啦。」醉翁之意不在酒。佢根本唔係想食呢一餐，而係想消除我父母既疑慮， 然後拐走我! 「我地其實都好多問題想問...但係又唔知邊到問起好...」 「咁我不如由我身世開始講起?」 「呃..好丫好丫師父。」 宇文將端起酒杯，開始細說一段往事....「我本姓宇文，但係唔係叫宇文將。今年已經四十有多，我呢個名係師父比既...我 雙親係我七歲就離開左我，師父收養左我，再訓練我成為一個斬妖除魔既道人。 我呢個將字都係佢比我既。我師門係御鬼門，入邊得5個人， 按帝王將相黎排。我係第三個入門，所以我得到將呢個稱號。我仲有兩個師兄一個師弟既，不過佢地今日就黎唔到，因為 身有要職。至於我呢身既道法係咪堅既呢，我相信阿一都應該已經同你地講哂。其實我地呢門派既使命就係要趕走D惡 鬼，必要時甚至要殺埋佢地。不過我自己三十年黎都未試過殺鬼，因為殺人要填命，殺鬼..就要填魂。所以我係唔會將阿 一訓練到一個殺人唔眨眼既殺手既。講左咁耐，我諗你地都唔會唔信無鬼架下話?」 「宇文師父，我地當然信..不過我其實緊張一仔既前途。我都想佢做好事...不過至少都要有兩餐溫飽..呃姐係..」講到錢銀， 我阿爸當堂紅都面哂，佢從來都唔偷唔呃唔借，係一個正直既大好人，當然都係一個古板既人。對於收徒，佢係點諗? 上座山上邊，搵個廟，刻苦咁潛修囉。 宇文將都好似意識到老豆想問咩，亦知佢誤會左D咩。 「上官生，我就算收左一仔做徒，我都唔會帶走一仔架，佢一樣係你地到住，只係我有時會黎下教佢野，或者佢黎搵我。 不過可能一個星期有幾晚佢都要夜返。至於讀書方面，我都係盡量唔影響到佢讀書既情況下教佢野，始終做呢行無得做過 世，讀書都係好重要既修行之一。」 「雖然我係佢老豆，但係我始終都係要問下一仔既意見，我唔可以幫佢話哂事..一..」 其實佢地一路講，我都一路聽緊。又可以住返係屋企，又可以學下D特別野，我本身對鬼神都幾有興趣。正丫!所以我老豆一叫我，我已經急不及待 咁講:「好!我答應做你徒弟!」 「嗯...好，咁三日後我再黎。到時我會正式接受你既拜師，同埋我會帶埋你去見下祖師爺，入我地一定要拜下我地既創門 祖先。」 師父佢將杯中物一乾而盡，睇黎佢都幾高興，「好!食飯!」