那些年，當香港仲係百鬼夜行既時代: 1.六點之約

我返屋企時已經係11點幾，屋企得我D細佬妹。老豆做廚，老媽子就做車衣女工，兩個工種都成日要加班，所以佢地未 返係好正常。 我拉過廳中既一張櫈，坐低，開始思考下宇文將講既野。橫掂我都讀書不成，我天資又幾好，又可以輕易開到天眼，不如 我跟佢啦。但係我跟左佢，我屋企人點?細佬妹仲好細....我未理佢地，佢地咪要自生自滅? 正當我心亂如麻，六神無主既時候，阿爸阿媽一齊開門入黎。 「喂，我係鋪頭打包左D宵夜返黎呀，叫埋細佬妹出黎食啦。」阿爸甩一甩手中兩個大白色膠袋。 其實我都唔使叫。因為阿爸差唔多日日都打包D野返黎比我地食，所以只要佢一返黎，細佬妹一定會衝哂出黎搶野食。 「爸，媽，我有D野想問你地。」 「喂三家姐!比細佬食先!做咩呀一仔?」阿爸見我個樣咁認真，都唔敢怠慢，即刻問我發生咩事。 「又同人打架比老師罰要見家長?」 「唔係呀呀媽...我..我今日....」如是者，我就同佢地講哂今日發生咩事黎，連埋宇文將想收我為徒件事都講埋。 阿爸阿媽都靜左一陣。我知，佢地係唔捨得我既...嗯...我一諗到呢到，眼淚水開始係眼眶轉下轉下。 「嗯...搵唔搵到食先?有無錢架先?」下?下下下!?阿爸!你個仔要去捉鬼喎!唔係捉蟲喎!好大危險架喎!你唔係擔心你個仔既 安全，反而係擔心搵唔搵到食，有無錢?唉，眼淚水都哂埋。 「呃...」我一時間都反應唔黎。 「唔好亂講野啦阿仔老豆。一仔，你不如聽日請佢過黎食便餐，順便等佢一次過解答我地既疑問先啦。」 都好，唔使我哂口水。我一口答應左佢地，嗯，等宇文將親自解話好D。 翌日放學後，我一枝箭由學校直奔到義莊。而宇文將正係到嘆緊茶。 宇文將見我黎就開口問道:「點呀?」 「我阿爸阿媽對我做你徒弟一事好似唔係好抗拒...不過佢地好似有多野想問，想請你黎我地企食餐飯問下D...」 「得啦。今晚六點我準時到。」 我諗一諗，嗯，阿爸阿媽今日都唔使返工，應該得既。 「好，六點就六點。」