那些年，當香港仲係百鬼夜行既時代: 15.東華義莊IX – 疑團

一路上行返，都仲見到一地既溪錢。有D仲有燒焦左既鋪係地下黎。 去既時候又要呃黑白無常，又要惡鬥個個阿伯，所以用左成個鐘先行到。但係一路返黎好暢順，唔使20分鐘已經返到黎。 「坐啦，有咩想問?」義莊張一眼就睇出我地滿頭問號，知道我地有好多問題想問，所以都唔講客套說話，劈頭就問我地。  「首先，到底個陣有咩用?我地好似靠鐘馗天師衝過D鬼架喎。」我不解地問。我問呢個問題係有原因既，因為一路上佢 都無點再提過個陣，反而請左土地，鐘馗上身。 「個陣會無用?你知唔知D紙扎公仔有咩用?」 提起紙扎公仔，我又諗起我比D紙扎公仔噴到一面都係血，當然我都即刻問埋佢。 「咁我一次過講啦。首先，個陣係以法壇為中心，再犧牲8個帶有法咒既紙扎公仔黎運轉。個8隻公仔上便既法咒就係鎖 住一隻動物既一魂一魄，法咒就可以將佢地既魂魄轉到變人既氣息。當我一將佢插爛，入邊既魂魄自然就會被放出黎。 黑白無常係唔識得細分動物同人既魂魄，有魂魄佢地就會去捉。我放一啲近似人既魂魄出黎，佢地一定會更加重手，因為 黑白無常天生就一定要捉人既魂魄，至於動物就可理可不理。 至於你話有血啦喎...我諗你應該係有天眼。天眼可以見到鬼魂，d紙扎公仔入邊有魂，係冥界，佢地係被界定為生命體， 所以你一樣可以見到佢地點....呃...死。天眼好多人都有，但係大部份人係就算受到極大既刺激都開唔到，所以呢少少既刺 激已經令你可以開天眼，你就好好運用啦。特異體質唔係個個都有架。」義莊張一講到天眼個時，眼中閃過一絲興奮，就 好似蜘蛛青見到唐三藏咁款。
正當我思考緊義莊張既一番話既時候，黑仔又開口:「咁個個伯伯又咩人黎?」 「砰!」義莊張大大力一下拍落義莊中唯一一張枱上邊。成張枱好似就黎比佢拍爛，搖搖欲墜。 「佢自稱冥界天楚道航仙人，其實簡單D黎講就係一隻明朝鬼!佢個名叫劉基 ，劉伯溫!」