那些年，當香港仲係百鬼夜行既時代: 14. 東華義莊VIII—冥界仙人

「呵呵，屍就還左比你，我走囉!」係啦!頭先係霧見到既個個伯伯! 但係好奇怪地，周圍既景物都好清楚...無霧，得聲。 「想走!?無咁易!還我魂來!」義莊張今次無用符，反而係到結手印，配合一啲好奇怪既步法，唸唸有詞咁。 「三界侍衛，五方鬼帝，九重天神，以吾之身為引，急迎南方鬼帝!」 語音一落，成個墳場都即刻風聲四起，樹葉吹到周圍都係。 「吾乃南方鬼帝，誰敢放肆!冥界仙人還不快下跪!?」義莊張係講呢句野既時候，口唇都係無張開過。 「又唔係真身，怕你有牙呀?有料既追死我囉哈哈哈...」老伯伯既聲音愈黎就愈細聲，明顯係已經走緊，但係義莊張無去追 既意圖。佢完全無郁，成條木咁企係到。 「放肆!本帝豈容你此等小仙侮辱!?天雷!」 原來天朗氣清，仲可以見到月亮姐姐既天空，突然烏雲密報，雷聲四起...遠處既薄扶林村仲好似傳黎:「小心呀，有雷暴， 落雨好收衫啦!」 話口未完，一道刺眼既天雷就轟係一塊墓碑上面。 又一記雷光，再遠D又一道。 「唔中唔中，哈哈，我今次真係走啦!」 「佢真係走啦，你仲唔去追!?」我心急地叫起上黎，但係義莊張就好似聽唔到咁。 過左一陣，雷停左，我地又見得返掛係天空上邊既月亮。義莊張慢慢地張返開雙眼。「唉...佢講得岩...我的確請唔到鬼帝 真身上黎...」
「咁姐係點呀?佢係邊個呀?王大牛...又係咪已經唔係陳伯身上啦...?」 「唉...」義莊張無正面答黑仔既問題。「陳伯無左王大牛既魂魄應該都唔可以再係陽間活落去，陽壽應該一早盡左。魂 都應該已經落左去十殿轉輪王到報到...條屍...唉放佢入去棺到啦..我會搵人做過塊墳碑比佢。」 義莊張果然所言不假，我地一睇陳伯條屍，竟然發現佢急速衰老緊。佢D頭髮好快咁變白...由最初一條...兩條....十條....到 最後滿頭都係。而佢既顴骨亦都慢慢塌陷落，原本精神飽滿既面容竟然突變成一個包住人皮既骷髏頭。見狀，我地都快快 手放左佢入棺。 「算係對先人既一種尊敬啦...一鞠躬!二鞠躬!三鞠躬!」我地都恭恭敬敬咁向陳伯..同埋王大牛既棺鞠躬。算係完成啦。 「返去啦..返去我再慢慢同你地解釋你既問題。」