那些年，當香港仲係百鬼夜行既時代: 5.東華義莊—黑白無常

東華義莊其實係我地個個年代都已經有D名存實亡。點解呢? 

一，已經唔會有人死左無得落葬，隔離就有個大墳場。 二，火葬在香港普及之後，對於堅持一定要成條入棺既人入土為安既人已經唔多。 咁你話，仲點會有人要東華義莊黎暫寄下屍體?咁當然有就仲有既。 

係呢個時候，我發現到王大牛有D唔妥。
「牛叔，你無野丫嘛?」我細細聲問佢。點解細細聲?一隻鬼係墳場到有D唔妥你驚唔驚?仲敢唔敢大聲? 「我..我入唔到去架...」王大牛成個人震哂。
「咩呀牛叔..穿過東華義莊就係墳場啦喎。」
當年既東華義莊係有兩邊門，任人穿過去，當然死屍就放哂係路既兩邊，行唔行就貴客自理啦。我地要快就當然會穿過去啦。 同埋係側門入，就一定要穿東華義莊過去先入到墳場。 「後生仔，你就唔好逼佢啦，佢係過唔到架啦。」
正當我以為王大牛耍我個時，一把蒼老而又有威嚴既聲響起。
「你係邊個?」黑仔立即擋係我同出聲阻止既中年人中間。




「呵呵，我咪係東華義莊既守門人囉。我姓張，個個都叫我做義莊張。」義莊張咬住支煙，一講野D煙就漂哂出黎，一刻間，我連佢個樣都未睇得清楚，因為多煙都好似火燭咁。
「張叔叔，你就比我地過去，我而幫下呢位伯伯返屋企。」既然你守得義莊，就一定明我講咩架啦。我心諗。
「我唔比你過咩?係黑白無常唔比咋呵呵。」 黑白無常!?我心當堂打左個突，佢兩個唔係專收鬼魂返落地府架咩!? 「張叔叔，姐係點呀?」
「你帶住既個個人有D問題，守呢個場既黑白無常唔比佢過。」 我終於睇到義莊張個樣。正正常常，一個慈祥既中年人咁樣，臉上掛一個似笑非笑既表情。 佢知道我地對鬼神根本咩都唔識，所以都唔理我地，自己有自己講:「黑白無常話呢個人唔可以返返入去佢既山地入邊。」 「佢地係邊?」黑仔無神神彈句咁野出黎。
「黑白無常係鬼黎架大哥....」
「走啦小朋友，帶埋你個朋友走。時辰未到你急什麼?」義莊張揮一揮手。
「我唔走得!我要返屋企!我就黎比把聲煩死啦!」沉默已久既王大牛竟然突然大吼，嚇得我同黑仔都差D心臟病發。
「聲?咩聲?」義莊張放低手上既煙問王大牛，睇黎佢好似有D興趣想知喎。
我當然即刻將王大牛同我講既野講哂比佢知啦。
佢又一路聽一路問，王大牛又慢慢補充下，結果成三點先話哂比佢知。 「唔...等我組織一下...」義莊張接連食左三枝煙，終於食到煙都無哂，佢先至講:




「我明啦!」
喂你明姐我唔明喎....「張叔叔，姐係點呀?」 「前一排，我地義莊唔見左一條屍。條屍就係王大牛既。政府搵人黎過...不過點會查到野丫，莫講話一條無親無戚既屍， 就算有家人朋友既屍比人偷走左都無得查啦。王大牛話見到有人叫醒左佢，咁佢應該就係偷左王大牛條屍既人。叫醒一條 屍，召返佢個魂魄返黎有好多家都識，所以我唔肯定邊個偷。而王大牛話見到叫醒佢既男人拎住既一黑一白物體，相信就 係鎮守呢個場既黑白無常既本命體!所以點解黑白無常唔比佢入去，係因為有痛腳係人到。」 義莊張摜性手勢想係包煙到拎技煙，但係空煙包又點變支煙出黎比佢?佢望一望個煙包就掉左佢去後面。 「唉，本派講求自然，和，有違天地自然既野出現係眼前，我有咩理由唔幫?」義莊張甩一甩個頭。 「我幫你地呃過黑白無常，等你地可以帶王大牛入去啦!」