那些年，當香港仲係百鬼夜行既時代: 3.因由

聽完呢句，我又即刻諗返起陳伯隻手。「咁..咁..咁..陳伯你隻手..」 面對咁突然既消息，我只係口震，無嚇到問我身邊既黑仔食唔食腸仔蛋已經好叻架啦。 陳伯淒然一笑，個頭180度後轉向住我。重點係個身無郁過。
點180度法?你試個身唔郁望下你後面。
「嘩!」
「我既然係鬼自然乜都做得。」陳伯。「知唔知點解我要你留底?」
「嚇我?」
「你都傻既，要嚇你陳伯就唔會比埋我留低啦。」黑仔，你好野，咁都要窒下個老死。 「陳伯都嚇埋你囉白痴!」我當然不甘示弱啦。
「我想返屋企。」陳伯舉起手，一隻正常既手講，佢呢個動作算係打斷左我同黑仔既爭拗。
「陳伯咁你屋企係邊?」咁人地話想返屋企咁當然要問下人屋企係點架啦下話?
「對面。」
「個堆屋仔?」係薄扶林墳場對面坐山係70年代未發展好，所以都係一啲村，一啲屋仔。




「都話我係鬼，我又點會住個啲...」「得!得!唔好再頭郁身唔郁咁同我講野，你住薄扶林墳場丫嘛!」
唉我當然知鬼係唔會住陽宅啦...我只係唔希望你係鬼姐!


「唉..其實你可以見到我隻手係白骨手，就代表你係可以幫到我既少數人之一...當然如果你唔想幫我我都唔會報復你既...」 我默然。
「陳伯，你可唔可以講下點解你會係到出現?」黑仔睇黎對幫鬼好似有D興趣。
「呢件事好怪...嗯...由我點死開始講啦...」 陳伯雙眼濛朧，開始陷入回憶之中....
「當年，我係一個普通人，1965年，我係自己屋企病死。死因無特別，長期食煙，食鴉片死導致肺攻能衰竭而死既。」
「咪住，你死左點知自己個死因?」黑仔心意慎密，一語道破。
「係後來再次叫醒我既人講既。死左之後，因為我都無咩親人，所以政府就安葬左我係薄扶林墳場。我死前最後一刻係好舒服..好想訓..跟住就訓左。但係唔知過左幾耐，一道好刺眼既光就插入我隻眼入邊。 我又擘返大眼。眼前既係一個男人，高高瘦瘦，好似無食飯咁。兩隻手都拎住野，一黑一白，我都唔知咩黎。我想叫，叫唔到;想郁，郁唔到。無幾耐，我就比兩個人夾住行，帶左我黎呢到...一樣係304室，但係我見到有個老人家訓左係到，我就比個兩個人硬推左入去。」




「上身!?咪住，你全名係咩!?」我聽到之後就知係佢身入邊既，唔係真正陳伯!係另一個人!
「我本來個名係叫王大牛...但係既然個個都叫我陳伯，咁我都叫自己做陳伯囉...」
「其實你係點樣入去你記唔記得?」 「記得!我記得我入去個時有股好大既阻力，唔比我入去。我仲望到遠方有一個駝背既身影。夾住我既個兩人二話不說，放低左我，行左過去，用刀批左個人個頭落黎。 個人頭慢慢碌到黎我腳下，我仲記得，雙眼睜到好大好大，正當我驚緊個時，佢一隻眼珠就甩左出黎。我都未及望多一眼，個兩個人又返黎夾住我行。 成個過程好虛無縹緲，間房好似放到無限大，無限遠，但係裝飾就同衣家一樣...到左衣家，雖然我就只係一個人訓，但係周不時都聽到唔止我自己既聲...」