那些年，當香港仲係百鬼夜行既時代: 2.探鬼

我地間村校其實就係大口環，但係細佬仔個時點知呢到叫咩名姐，得一間野最顯眼，個間就係東華義莊。 所以基本上講我住邊，我都會以東華義莊作開頭，人地問我去邊，我又會以東華義莊做開頭咁既。
「下...又去個到呀?啲阿婆比我地探哂啦下話?」黑仔唔情願咁講。
「無計，學校經費有限，但係又要搞啲賴係令學生學啲書本學唔到既野，去老人院學下孝咪最抵囉。」

返到學校，其實我同黑仔已經遲哂到，所以我地班一早出左發，咁無計啦，唯有跟最尾一班出發。
學校同間老人院唔係好遠，行就5分鐘咁大把。
今日我同黑仔同10個同學比老師分派左去探一個姓陳既老伯伯。
「呢個阿伯個腦有啲事架。」 同我地一樣比人分派左去採個個阿伯既一個肥仔同佢旁邊啲朋友陰啲陰啲咁講。
丫，你條死肥仔，平時做狗公你就帶頭去汪，而家叫你探個阿伯姐，返左黎就唔好係到牙痛咁聲啦。
我個時都唔知個阿伯唔止個腦有事，原來連帶成個人...嗯...人都有事...






「拿，陳伯呢就住係304室，你地去啦。」老師好似趕住放工咁，多一句野都唔想講，話左比我地知陳伯住係邊就走開左。
「唉，行啦黑仔，入去坐到到夠鐘就閃水。」
當然，一間學校少左一班熱心，想讀書既同學就唔叫學校啦。
我地呢間野雞村校當然都有啦，做探訪個時仲要係係我個組。
我帶頭第一個入去304室，正當我想入去既時候，黑仔拉住左我，「有古怪。等條狗公入左去先。」 等啲人魚貫而入個時，我反問黑仔:「你同條狗公都一擔擔既，邊有古怪呀?」
「隔離303同305都無人住架。」
黑仔個樣驚驚青青咁。
因為當時香港既人口仲未係由老人組成，當時老人數目好少好少，所以我對隔離房無人住都唔係咁緊張，另一個原因係因為始終當時既人都唔會將自己既老豆老母送入老人院唔理佢地咁無良，所以我更加覺得住唔滿係順理成章。




「入去啦唉。」我一手拉住黑仔一路行入去。

入到去，一啲正宗好學生已經同陳伯傾緊計，「開解」緊佢。但係陳伯講野唔知係咪有問題，次次都係一句起，兩句至。 
陳伯仲要由頭到尾望住出邊。
如果，當時有毒撚呢個term，陳伯就儼如係一個毒撚典範!有咩好睇呀...我心諗...我個時就隨住佢既眼光望出去，頂，薄扶林墳場。

一排排既墳墓，一張張貼係上面既黑白相，仿似有一個個「人」坐係塊碑上面咁...
即使係熱到隻狗咁既天氣，我都有覺得有啲寒。
突然，眼角餘光見到有一隻白骨手準確搭上我隻手上邊!我嘩左一聲，隻手就搭左上黎。
我無諗咁多，立即一下子甩開左隻白骨手。




「你做咩呀一哥??陳伯搭下你姐!」
隔離有個好學生不明所以咁，又好似有啲不滿咁問我。
陳伯?陳伯隻手係白骨手!?我二話不說，當下即刻拎起陳伯隻手睇。
陳伯隻手除左瘦到無咩肉同有啲偏白之外，又真係同常人手無二。
唔通我眼花?因為諗住個啲野搞到我以為陳伯隻手係白骨手?無理由架...我真係見到啲手指骨郁郁下架喎....

「後生仔，你一陣留低一陣得唔得??」陳伯用佢把沙啞而又無力既聲音問我。雖然聲音中好似無咩中氣，但係卻又有一股好堅定既精神透露左出黎。
「下，呃，好..好啦。」雖然我都開始有啲驚，但係老豆老母成日教我孝，呢個時候仲推塘一個無親人既阿伯又好似真係唔係好人道。

一班同學好似比我搞一搞都驚左我，所以好快，就話探訪完夠鐘要走。
留低左我同陳伯..仲有我個朋友，黑仔，係到。
唔好話我細膽要拉埋個老死陪，而係呢老死係真心想陪我，佢成日都話自己第六感好準，我都唔想信，但係今次無得我唔信....

陳伯將佢既眼光由一堆又一堆既墓移到去我地身上。
將我同黑仔全身都視姦完之後先開口講野。




「你地信唔信呢個世界有鬼?」呢句說話配合埋佢既聲線...去幫電影入埋啲鬼配音啦應該。「唔信。」黑仔搶住講。我猶豫左一陣。
信?我又無見過。唔信?但係我又聽到D隔離左右話撞野喎，係細個個時仲見過人疑似鬼上身咁款。
最後，我答左:「信。」
始終，個個時代科技未發達，鬼神之說仍然十分流行。
陳伯望返出去，張口欲言，但係次次開口都只係唉左一聲。幾次之後，陳伯好似下定決心。
「無得你唔信，因為我就係鬼。」