【海嘯警告，現正生效】: Ep.14

「下午七點 依家由張浩軒為你報道一節新聞 正在訪京嘅特首梁圳英尚未返港 政府發言人發表聲明 稱梁圳英因身體不適而暫時無法返港 部份市民認為梁圳英係因為唔想接觸輻射而唔返回本港 赤柱監獄逃獄事件尚未平息 而且目前無法聯絡位於香港島嘅警察 未知情況如何⋯」

「我頂 行到返去都要七點架啦⋯」
我由灣仔行返返去我果棟大廈 直頭筋疲力盡⋯
「Hi⋯ 唔記得咗我已經食晒啲杯面⋯」
我又要重新出發 去間七仔買⋯
就係我去嘅路途中 我又見返我之前係路口見到啲人…
而我又忍唔住行入去偷聽下⋯

「喂 政府都唔理我地啦 我哋仲洗鬼規矩」




「咁不如我哋自己建立一個政府好過啦」
「都好呀 玩小圈子啦 邊個傳政府唔理我地」
睇嚟佢哋已經知道香港島比人隔離⋯
我再行多幾個街口 又係講差唔多咁嘅嘢⋯

「唔可能嘅 政府又點會唔救我哋呢」今次又輪到啲阿叔
「咪係囉 對面嗰班有仔都唔知係咪染勁左 喺度係咁講香港島隔離」
「我同意 我哋唔可以俾佢地妖言惑眾」
「不如我哋組織一下 搞到佢哋唔好妖言惑眾啦」
「你講得啱 我哋唔可以比佢哋繼續去洗腦其他人！」





聽來聽去 都係分化左兩種人⋯
搞到好似香港島進入左無政府狀態
成個社會都被撕裂晒⋯⋯
當然 我就淨係旁聽 無講過野啦
費事得罪另一邊嘅人 到時就有排煩⋯
聽聽下 又行到嗰間得佢做嘢嘅七仔
「啲貨冇晒嘅？」我問個職員
「俾人偷晒啦 你遲咗咪冇囉」
「咁你仲唔報警？」




「報咗都冇人聽 係咪買嘢架？」
「都冇嘢賣⋯ 等陣先 冇嘢賣咁你仲企係度？」
「橫掂都死個囉 點解唔⋯⋯」
「得得得 你就繼續企喺度啦⋯」我講完即刻行出去
「多謝幫襯 下次再見」
「冇下次架啦！！」

「Hi⋯咁唯有食威化餅當晚餐啦⋯」
我又要行返去 我真係攰到好想截的士
但係呢個時候 最快嘅交通工具係單車
但係我冇⋯ 我唯有死死氣咁行番去…
越係喺度行 我就越想聽一首歌⋯

『爆裂　散落　折翼墮下
正跌向對面大廈　就撞爛大廈




而樓下有群男共女
以摺凳菜刀打架　聽不見他
幾秒後滿地是血花
而模糊的受害人　一早猜想到嗎
誰人才終極殺害了他』

「⋯目前災區正在醞釀一種新病毒 目前未有方法能夠根治 生物學家警告 一旦該病菌進化到可以感染人體 該病菌將會大規模爆發 可能引致大部份人死亡⋯」

「⋯國際原子能總署將本次嶺澳核電廠既核事故等級評定為第七級 即特大事故 中方批評今次嘅做法 認為並無此嚴重⋯⋯」

『有病　有毒　市面混濁
氧氣裡正在孕育　極厲害病毒
全城就快齊齊病發
個個照逛街睇戲　不知退縮
於市內某巷夜店中




誰人從粉末藥囊　針筒之中找到
如遊魂魔域那份滿足⋯』

終於 我行返棟大廈度…
「開冷氣先熱到死呀⋯」
我攞出我之前買返嚟嘅威化餅 而且準備埋檸檬茶
正當我想食嘅時候 突然間有人打電話來

「Hi Hi邊向左走向右走個阻住我食野！」
「喂 搵邊位呀」
「阿Sam啊 你嬲我都照講架啦⋯」
「又講乜嘢啊 我食緊野啊」
「你食緊野你都聽我講 呢單野真係好重要」
「重要得過我食嘢？」
「係 今日下晝又有收一條信息 依條信息真係好重要」




「唔好再兜圈啦 講重點啦唔該你⋯」
「依條信息係咁講嘅」

「CLEAN THE ISLAND」

「都叫咗你講中文囉！」
「我諗佢既意思係咁嘅」

「佢想殺曬所有係香港島嘅人」