超靈視雜誌社: 四章－真性異言靈（２）

我和紡瑩被女王召集到客廳，已經是翌日中午的事情了。客廳其中一側是一整片的落地玻璃，玻璃窗外則是一個開滿了花的園庭。我們坐在梳化等了幾分鐘，一位留長頭髮、穿白色長袍的中年男性出現在我們眼前。
 
「藍社長！」我驚訝地說。
 
沒錯，這個人雖然是雜誌社的社長，但幾乎沒有在雜誌社內出現過。像這樣所有雜誌社的人共聚一堂還是頭一次。
 
「樂介翔，我地好耐冇見。」社長說：「終於都到左呢一日。」
 
「呢一日？」我不懂社長的意思。
 




「嗯……」社長問：「今日係幾多號？」
 
「８月２８號。」
 
「農曆係幾多號？」
 
我用手機的應用程式翻查，然後回答：「７月１５。」
 
「冇錯，所以尋晚就係盂蘭節。而尋晚既地震亦都係招魂實驗所做成。」
 




「吓？你唔會想話係地府鬼門大開，啲鬼湧晒出黎所以搞到地震卦？」
 
「哈。」社長冷笑道：「如果每年七月都係咁就麻煩。鬼門無論任何時候都唔會大開，只不過係尋晚有人想打開鬼門──我地叫佢做『地獄之門實驗』。」
 
「如果同鬼節無關，咁點解要係鬼節做實驗呢？」我問社長。
 
「重要既係月相。越接近滿月，靈魂既力量就會越厲害。所以道教既三元節都係農曆十五，並唔係一個巧合。」社長說：「雖然而家我講既野好難令你相信，但我希望你可以記得。」
 
我點頭表示明白。而社長接著說：
 




「而家我地面對既問題係有一個研究『靈魂力量』既神秘既組織，佢地企圖打開『地獄之門』直接抽出『靈魂力量』。而尋晚就係佢地其中一次最成功既『地獄之門實驗』。」
 
靈魂的力量，好像不久前也有聽說過這名詞。對了，是兩個月前 Dr Wong 殺死 Samantha 的時候所說的。Dr Wong 就是透過不斷殺人去收集靈魂的力量；而現在社長所指的神秘組織，就是直接從陰間吸取靈魂力量的感覺。
 
「樂介翔，你呢幾個月經歷左咁多事，你知唔知道有咩方法可以控制到靈魂力量？」
 
我望一下手上的戒指，便說：「戒指……量子電腦？」
 
「冇錯。雖然你手上既只係仿製品。」社長掏出了一個藍色絨布盒子，打開後裡面又是一隻鑲有寶石的戒指。他說：「呢隻戒指先係真身，亦都係可以控制到靈魂力量既媒介。」
 
「社長既戒指都係量子電腦？」
 
「唔係。呢隻戒指係屬於以前薩米族既薩滿，係一種神器。」
 
薩滿……這個名詞好像也有聽過。就是剛認識紡瑩時，她解說 Etiäinen 是薩滿的分身、守護靈。這樣想的話，我最近所有經歷都是和社長所說的「神秘組織」有關嗎？




 
社長擺出一副十分嚴肅的臉孔，說：「我相信下一次佢地就能夠打開地獄之門，到時候既災害就唔係尋晚咁簡單。所以我需要你既幫助。」
 
「我可以做到啲乜？」我不明白。
 
「一切關於控制靈魂既理論，就係由呢隻薩米族既戒指開始。所以最壞既情況，萬一地獄之門被打開，你都可以用戒指去閂返埋地獄之門。呢樣野只有你可以做到，因為戒指只會對凱米薩米語有反應。」
 
我吞了一下口水，問社長：「下一次佢地嘗試打開地獄之門係幾時？」
 
「你有冇聽過收穫月？Harvest moon。」
 
社長解釋，在西方的民間習俗裡，每一個滿月都有自己的意思。而最接近秋分的滿月就叫做收穫月。收穫月最特別的地方是它會在黃昏時間月出，月亮會十分接近地平線並染上黃昏的橙紅色。社長說這是最適合打開地獄之門的日子，尤其是當天的月亮是本年最大的超級滿月兼月全食，雖然在香港看不見月全食就是了。
 
所以下一次打開地獄之門的時間就是９月２８日。
 




社長把薩米族戒指交給我，說：「當然有人會嘗試係９月２８日之前阻止神秘組織既行動，不過到而家仲係冇人知道關於神秘組織既事。所以你就係最後既保險線。」
 
正如一開始社長告訴我，他的說話全部聽起來都是不可思議。究竟這個世界怎樣了。
 
我不禁問：「其實社長，你同霜姐到底又係咩人？」
 
但社長不太願意提起以往的事情，只是簡單地回答：「我曾經都係研究超常科學既科學家，而弦玥俾你既戒指亦都係按照我以前既理論而製成。」
 
聽到弦玥的名字，讓我有一種懷念的感覺。