超靈視雜誌社: 四章－真性異言靈（３）

社長離開後，客廳裡只剩下女王、紡瑩和我三個人。
 
「聽完有咩感想？」女王問我。
 
「呃……完全諗唔到任何可以叫做感想既感想……首先係社長講既野已經超越左我可以接受既範圍，其次如果我真係可以左右到世界命運既話，我會好替呢個世界擔心。」
 
「咁又係，要將世界既命運交俾翔你，我諗上天真係冇眼光。」
 
「唔係呀，」紡瑩說：「我覺得阿翔都有佢既優點，所以先至會被擇中。」
 




「「例如呢？」」我和女王異口同聲地問。
 
「……」紡瑩停頓了一會，說：「做乜連阿翔你都要問我喎，自己既優點總會數到一個半個卦？」
 
一個也算了，還要半個。如果只剩半個的優點到底還算不算是優點？
 
「好喇，」女王問：「咁翔你而家有咩打算？仲有一個月先到９月２８號。」
 
「我覺得……與其坐係度咩都唔做，不如主動出擊去搵嗰班人出黎。」
 




「不過嗰班人唔係善男信女，你唔記得佢地仲有槍？佢地而家仲知道左你係唯一可以阻止到實驗既人，你估佢地會點做？」
 
「唔會想殺人滅口卦……我仲諗住大學畢業之後投身社會建設香港。如果我死左咁香港點算？」
 
「如果你死左既話，香港每年可以慳返幾噸碳排放，話唔定會比較環保。」女王笑著說：「不過你又唔駛咁擔心。雖然你已經係『神秘組織』既目標，但佢地唔會當街當巷咁對付你。佢地行事一向好小心，唔會為左你而露出蛛絲馬跡。但你以後一定要避免單獨行動，同埋盡量留係多人既地方。至於夜晚你就暫時住係呢度先啦，咁樣會比較安全。」
 
「嗯，明白。」
 
「仲有，社長俾你既戒指你都係戴住先，當係習慣一下。必要時或者可以救你一命。」
 




我聽到之後冒了一把冷汗，說：「雖然我唔係咁希望有呢個必要……不過如果要調查神秘組織既話，或者無可避免會有危險……」
 
一邊說，一邊把社長交付的戒指戴在左手食指上。這樣戒指就和中指上弦玥的戒指並排在一起。
 
「啊，原來已經成兩點鐘。」女王記起了自己有約會，便說：「大姐姐要走先喇，紡瑩妳點？」
 
「我想留多一陣。」紡瑩說。
 
「哦……」女王望著我和紡瑩，點頭說：「咁你地加油喇。」
 
然後女王也哼著歌走出客廳了。
 
留下來的紡瑩對我說：「霜姐姐叫你唔可以單獨行動，所以阿翔你始終都係需要我幫手呢。」
 
「嗯，多謝妳。」




 
「但係你諗住由邊度開始著手調查呢？我地對所謂既神秘組識一無所知。」
 
「都唔係一無所以既。」
 
我把之前我和弦玥在廢棄工廈的遭遇，還有那些騷擾著 Samantha 的短訊告訴給紡瑩。我認為這兩件事情背後都和神秘組織有關。尤其是廢棄工廈裡面我看到的東西，說不定那個就是所謂的「地獄之門」。
 
『呢度係……現實同地獄既正中間。』
 
『唔好跌落去，一跌落去唔會係一樓，而係地獄。』
 
當時的弦玥是這樣告訴我，我想我現在可以明白她的意思。
 
「原來係咁。」紡瑩說：「不過 Samantha 既事件已經冇人可以再幫到手，剩返就係最初既『連環人口失蹤事件』。」
 




「冇錯，或者仲有線索當時我地冇留意到。我覺得再深入調查既話，應該可以搵到更多關於神秘組識既資料。」
 
「但係我記得，全部當事人都冇晒失蹤期間既記憶，所以連警察都冇頭緒呢。」
 
「仲有一個方法。」我回想起昨晚錄影帶的影片，「就係催眠，用催眠去喚起以前既記憶。咁樣做話唔定可以令到經歷過失蹤既人，記返起當時發生過咩事。」
 
「喔，逆行催眠，的確可以試一下。而且要搵返經歷過失蹤既人都唔困難。」
 
「我既大學室友，同埋我記得紡瑩妳朋友都係受害者？」
 
「嗯，可以問一下我朋友。」紡瑩疑惑地說：「不過咁做唔知好唔好呢……」
 
「點解咁講？」
 
「可能有啲野唔記得會比較幸褔……我只係有呢種感覺。」




 
「妳都講得啱，如果佢地唔想接受催眠既話就只好放棄，唔能夠勉強。不過我覺得或者佢地都想知道真相呢。」
 
「嗯，一切就由我地既朋友去決定啦。」
 
可是催眠最緊要是催眠師，可以到哪裡找呢？紡瑩告訴我只要找杜霜虹女王就對了，她總有辦法幫我們準備。
 
結果正如紡瑩所說，當我把計劃報告給女王之後，她很爽快地答應了。聽起來女王也有一點期待的感覺。於是我決定打電話給我的室友問問他的想法。
 
「對唔住，你所打既電話暫時未能夠接通……」
 
該死的 Charles，有事要找他的時候電話卻打不通。還好我也打算回宿舍一趟，大概他只顧玩電腦連電話也沒有開吧。
 
「打唔到俾你朋友？」紡瑩問。
 




「嗯，我返宿舍睇下搵唔搵到佢。」
 
「咁我同你一齊去啦。」
 
「唔駛喇，妳又入唔到宿舍。我盡量避免去少人既地方就得啦，冇事喎。」
 
「至少俾我送到你去宿舍門口啦。」
 
看見紡瑩這樣擔心，害我反而有點尷尬，只好接受她的好意一同返回宿舍。