超靈視雜誌社: 二章－靈魂証人（７）
回到大學宿舍，我冷靜地回想剛才發生的事情，還有陳家仁的證言，和李俊旭倒斃的新聞。我隱約感覺到，事情的真相一定會比我所想像中複雜。
不過無論如何複雜，所有事情都是遵循因果律進行。蘋果從樹上掉下是因為地心吸力；火箭能夠一飛衝天是因為反作用力。人類最大的武器就是邏輯、思考。
想當初紡瑩因為有趣就假定 Samantha 殺死了李俊旭，雖然我不能夠證明她是錯誤，但我們的確忽略了當中的人性。如果 Samantha 是兇手，那樣她的殺人動機又是什麼？
我在網上反覆搜尋有關 Samantha 的資料，結果完全找不到她要殺死李俊旭的動機。她們是中學同學，長大後因為緣份再次相遇，然後火速墮入愛河。
她們看起來是這樣甜蜜，就像童話故事一般，大家都期望會有一個完美的結局。
那到底是什麼原因令到她們的結局這樣殘酷？我現在手上有很多資料的碎片，可是卻湊不出完整的拼圖。
在我苦惱的時候，我接到了紡瑩打來的電話。
「阿翔？仲未瞓？」
「而家先十二點幾，冇咁早瞓既。做乜事？」
「冇乜特別，只係應承左，想講返陳家仁部手機既事。」
「啊，好呀。我都有關於 Samantha 既野想同妳講。」
「嗯，咁我講先呢。」紡瑩深呼吸了一下，然後說：「簡單黎講，陳家仁係一個好變態既 fans。佢係 Samantha 既超級 fans，但係好病態……甚至試過跟蹤同埋偷拍 Samantha。電話裡面可以搵到有好多偷拍 Samantha 既相。」
「所以妳話妳明白點解 Dr Wong 會咁講佢。即係佢都知道陳家仁係啲咁既人。」
「可能因為 Dr Wong 見到佢有偷拍 Samantha 同自己一齊既相，所以知道。」
「吓？妳話 Samantha 同 Dr Wong 一齊？」
「嗯，係陳家仁手機裡面，近幾日既相有好多都係 Samantha 同 Dr Wong。唔知佢地乜野關係，但淨係睇相既話，佢地既關係應該唔多好，好似有啲爭執。」
Samantha 和 Dr Wong，我手上又多了一塊拼圖把真相連在一起。
「但係呢，」紡瑩說：「只係跟蹤同偷拍已經算係比較好。佢最近仲開始不斷打電話同寄信騷擾 Samantha。內容全部都好難聽……同埋不斷叫 Samantha 去死。」
想不到連恐嚇 Samantha 的惡作劇也真相大白了，整件事情的輪廓越來越清晰。
「點解陳家仁會突然變成咁？因愛成恨？」
「都可以係咁講。不過最大既原因係因為佢知道左 Samantha 以前既事。」紡瑩問：「你知唔知道原來 Samantha 同李俊旭以前係中學同學？」
「嗯，知道。」
「其實佢地唔止係同學關係，仲係情侶，佢地中學嗰時已經拍緊拖。不過當時 Samantha 係校花，好多追求者；而李俊旭只係一個唔起眼，又唔識打扮既內向四眼仔。」
「哦？同而家爭好遠呢。」
「係呀。當時佢地拍拖，其他同學都笑佢地係『美女與野獸』、『一枝鮮花插在牛糞上』。尤其係其他男同學，佢地不斷排擠李俊旭，又成日叫 Samantha 飛左佢。」
「咁李俊旭都好慘。」
「不過聽講李俊旭真係對 Samantha 好好，好關心佢，只要 Samantha 需要佢既話，無論任何時候任何地點，李俊旭都會隨傳隨到。係李俊旭心目中，Samantha 就好似女神一樣。」
「女神同埋內向既四眼仔……諗起上黎真係唔係好襯。」
「如果換轉係而家既話，可能就係叫做『收兵』呢。」紡瑩苦笑說。
「咁當時 Samantha 其實係唔係真係鐘意李俊旭？」
「唔知道呢。不過最後李俊旭發現左 Samantha係學校外面有男朋友，然後 Samantha 就向李俊旭提出分手。雖然李俊旭唔肯，仲係同學面前苦苦哀求，但係 Samantha 都無動於衷。最後 Samantha 轉左校，佢地就冇再聯絡喇。」
「估唔到 Samantha 細細個，感情生活就已經咁多姿多采。」
但我到現在還是沒有女朋友，damn。
紡瑩說：「講返陳家仁，佢就係因為知道左呢件事，於是對 Samantha 既印象 180 度轉變。陳家仁認為 Samantha 係一個恃住自己靚而去玩弄感情既女人。所以陳家仁變到好憎佢。尤其當佢認為係 Samantha 殺死李俊旭之後，就不斷 send 短訊去騷擾佢。」
「愛情真係恐怖……或者李俊旭既死都係因愛成恨既悲劇。」
等等，好像有哪裡不對勁。關於 Samantha 和李俊旭的過去的確是一個重大線索，但這裡有一個矛盾。怎樣看李俊旭都是受害者。要報仇的話應該是李俊旭殺死 Samantha 才對啊。
「吶，紡瑩。或者我地一直都誤會左一件事。李俊旭既死，唔係因為 Samantha 想殺死李俊旭，而係啱啱相反──李俊旭想殺死 Samantha。」
「即係李俊旭想殺死 Samantha，但唔知點解最後李俊旭反而被殺？」
「從結果黎睇，可能係因為 Samantha 反抗，最後錯手殺死左李俊旭。」
紡瑩沉默了一會後，說：「咁都好奇怪啫，李俊旭係死係自己屋企。如果佢要殺死 Samantha，正常都唔會係返自己屋企殺架嘛。」
「咁即係話，第一案發現場並唔係李俊旭屋企。」
「點會啊，李俊旭死前仲有係屋企用電腦玩微博喎。」
「呢樣可以係事前 set 定指令，等部電腦模仿自己係微博度留言。根本唔需要自己坐係電腦前面做。」
「但點解要咁做？」
「如果李俊旭想殺死 Samantha，咁樣做可能係想製造自己既不在場證據……如果第一案發現場唔係李俊旭屋企既話，一切就講得通。」
「阿翔你話李俊旭係打算去第二度殺死 Samantha，咁會係邊度？如果你講唔出個地方既話，一切都只係估估下，好難去證實架喎。」
紡瑩說的話也有道理。暫時一切都只是我的推論，甚至還沒有結果。如果在這裡結束，我永遠也不會看見背後的真相。
我知道我還需要一塊拼圖，但我的常識已經走到盡頭了。我需要一塊不能用常識去理解……不，是超越常識的拼圖。就是陳家仁的證言。我一直都不明白為什麼陳家仁的瀕死經驗會讓他在醫院裡遇上李俊旭。不過如果李俊旭是死在醫院的話，拼圖就完成了。
「係醫院！李俊旭係死係醫院入面。我隻戒指發光唔係因為見到 Samantha，而係因為我係醫院；陳家仁見到李俊旭既靈體，因為李俊旭係死係醫院！」
「等等……而家既阿翔一啲都唔似阿翔呀……突然之間以靈異現象做前提。」
沒錯，現在的我的確很奇怪。不過 Samantha 的信，讓我相信整件事情有超乎想像的因素在背後推動。現在的我只能夠暫時放下常識的框框應戰。
如果我的預感正確，Dr Wong 就是關鍵人物。因為他是唯一一個可以把李俊旭、Samantha、還有慈愛醫院連起來的人。
「紡瑩，唔好意思，我突然諗起有啲事要做！妳早啲瞓喇。」
「喂，阿翔！蠢材阿──」
我掛斷了電話，然後準備出門去。
回想起在酒吧看見 Samantha 的時候，她一副已經放棄一切的樣子。或許她今晚打算去找 Dr Wong 了結一切吧。