男人唔可以窮 II: 6
第二日，日子依然係一樣咁過，靜悠每朝返工之後，都係可勇開始糾結既序幕，佢會幻想今日靜悠到底會見乜嘢樣既客人，潘志龍又有冇故意親近佢之類，有時可勇會將呢種幻想帶到入夢境，總而然之，就係會發各類不同既夢，夢入面都係傳遞住同一個訊息。
如果唔盡快搵到好多既錢，靜悠好快就會離開自己。
呢個時候，天佑拎住一個玩具，走到可勇身邊：
「爸，飛呀！飛呀！」
天佑指指電視，好開心咁向可勇大叫，可勇一望，原來當時電視做緊一套內地既三國劇集。每個下晝可勇都會同天佑一齊睇呢套劇，一邊睇，可勇會一邊向天佑講劇入面所有人既名又或者係兵器。
劉備既雙股劍定係呂布既方天戟，喺十幾年前馮兩奴果套三國入面，已經令可勇同可正兩兄弟睇得津津有味。
當時薛天來仍然未出事，有時放工返屋企，三父子就會喺電視前面一齊欣賞，邊睇，薛天來就邊好似可勇而家咁講出各個名將既事跡。
雖然佢地後來都知道呢啲只係一本明朝漫畫既劇情，但已經成為左佢地成長既其中一個印記。
每次，可勇抱住天佑一齊睇，佢都會覺得，爸爸同哥哥都喺身邊一齊，果種感覺，係生活壓力以外既一個緩衝點，令可勇可以有一剎那既寧靜。
可惜返到夜晚，可勇又變返果一個自信無比，不擇手段既薛可勇。
「球哥。」可勇打開球哥既房門，見到球哥、樂芝仲有高榮一齊。
球哥：「可勇你返嚟喇？高榮你繼續。」
高榮：「新填地街果邊我地唔熟，仲要走入人地陀地，呢條數好難搞。」
球哥：「我應承左幫人收，你睇下有冇辦法。」
高榮：「我盡量。」
可勇：「咩數嚟？」
球哥：「我幫朋友架咋，佢地同社團唔好意思收，條債仔又擺明賴皮咪搵我幫佢，但錢唔多，可勇呢單野唔啱你。」
可勇：「個老闆〈指債仔〉咩人？」
高榮：「叫權叔，五十幾歲，回哂塘架喇，但仲有班細既跟出跟入，開麻雀館，日日咁多現金流點會冇錢？」
可勇：「球哥俾我去，冇錢都好，當起下朵。」
球哥：「唔好玩啦，行到入人地地方，手都俾人斬左你。」
可勇：「佢斬我一隻，我咪斬佢一對手囉。放心呀，俾我啦。」
球哥：「勇，呢班人唔係講玩架，錢冇必要咁搵。」
可勇：「香港地方，你估佢敢殺左我咩？如果呢度係大陸我就怕，你俾我幫你諗下啦。」
球哥：「好，我安排好再搵你。」
可勇：「多謝球哥。」
可勇講完，就走左出房外面，轉而走向一班熟客入面一齊玩。呢個時候Forever入面已經有好多熟客認識可勇，亦都知道可勇喺呢度有一定勢力，所以好多人都會好客氣咁對待可勇，而同時，唔同既女人投懷送抱既情況亦都多左。
樂芝：「勇。」
可勇：「點呀芝姐？」
樂芝：「呢個我老死，叫霜霜，佢班朋友未到呀，幫我照顧住佢先得唔得呀？」
霜霜：「你好呀。」
可勇打量一下眼前呢位霜霜，典型既旺角暴風少女外形，一套暴露得唔可以再暴露既上衫，但明顯見到發育已經完全過份地完成。
「哦，好呀。」可勇隨口一句，然後就讓出旁邊既位置俾霜霜。
霜霜坐低，熟練咁由手袋拎左一包煙出嚟，然後將個頭靠近可勇：
「有冇火？」
可勇：「怒火定慾火？」
自此之後，霜霜每個星期都會去到Forever搵可勇，可勇有時會陪佢玩一陣，有時又會故意離開唔見霜霜，因為可勇清楚霜霜既意思，而佢自己亦都知唔想靜悠有任何懷疑，所以一直都係做有限度禮貌上既回應。
兩個星期後，有一晚Forever打烊之後，可勇正打算返屋企，出到門口，見到有一個人企左喺不遠既地方，係霜霜。
可勇：「妳喺度既？」
霜霜：「果邊玩完，經過呢度想搵你宵夜你個電話又唔通，正想走上嚟就見到你喇。」
可勇：「咁夜宵夜，好肚餓呀？」
霜霜：「陪我食個早餐放你走啦，行啦。」
可勇俾霜霜拉到去金馬倫道附近一間通宵茶餐廳，一坐低，霜霜就拎住餐廳猛咁睇。
可勇：「快啲叫呀，我要返屋企。」
霜霜：「知喇。」
可勇：「我聽日要早起……」
可勇突然中斷既說話，係因為同一間餐廳之內，佢見到潮哥帶住一班手下坐喺不遠處，而最令可勇驚訝既係，坐喺潮哥身邊既，係阿栽。
可勇見到潮哥同阿栽既同時，潮哥二人亦都見到可勇。
三個人對望期間，時間就好似停頓左幾秒，然後奇怪既係，首先打招呼既竟然係潮哥。
潮哥：「喂，可勇，咁啱既？你同栽仔都應該識架下？」
其實可正、可勇、阿栽、潮哥、麻哥仲有球哥，佢地本就係喺同一個邨長大，除左球哥同麻哥之外，其他四個人既年紀都差唔多，所以就好似一般既屋邨小朋友咁，你可能係我踢波既朋友，佢又可能係你既同班同學。
可勇已經醒唔起阿栽細個到底同潮哥係唔係好熟，又或者係細個既時候係可勇自己將阿栽介紹俾潮哥認識，佢只係知道，呢一刻，佢要首先清楚阿栽到底知唔知道自己正幫球哥做嘢。
可勇，如果阿栽知道左，就唔需要再講任何大話，直接同阿栽了結呢個炸彈。
可勇：「識，我同阿栽由細玩到大架。」
阿栽：「係呀，佢同佢老婆都係我介紹架。」
潮哥：「過嚟坐丫可勇。」
可勇：「唔好喇我有個同事。」
可勇唔想俾阿栽見到霜霜太耐，所以打算講句再見就會離開，誰不知，霜霜呢個時候竟然從來面走出嚟。
霜霜：「我唔怕呀，一齊坐啦。」
可勇：「咁…好啦。」
可勇坐低，見到阿栽一直對住自己微笑，無論可勇同邊一個講嘢，再望返阿栽，佢都係用同一個表情望住自己，相反，潮哥就一直同霜霜好開心咁談天說地，幾個人就喺呢個情況下完成左一餐宵夜。
離開之前既十分鐘。
潮哥：「可勇你而家住邊？我車你。」
可勇：「我仲係屯門呀。」
潮哥：「屯門我唔經喎，我住觀塘果邊。」
可勇：「唔使啦，我自己返去就得。」
霜霜：「潮哥我住九龍灣呀，順便啦。」
潮哥：「下，妳問左可勇先好喎。」
可勇：「唔好誤會呀，真係朋友咋同霜霜。」
潮哥：「哦，咁好啦，我去埋個廁所先。」
霜霜：「我都急呀，呢度後巷好黑架，我又去。」
潮哥同霜霜離開，就只剩低可勇同阿栽。可勇望住阿栽，阿栽依然係一直唔出聲，微笑咁望住可勇，阿栽一直維持住半個鐘頭既狀態，已經令可勇忍受唔到。
可勇：「你做乜嘢呀趙文栽？」
阿栽：「我有嘢？會唔會係你有？」
可勇：「有嘢想講就講，一路望住我笑做乜？」
阿栽：「我已經冇嘢講。」
同時，阿栽將一張咭片放喺枱上面，可勇一睇，係靜悠而家公司既咭片，亦即係話，阿栽曾經同靜悠有接觸過。
可勇：「即係點？」
阿栽：「靜悠打電話俾我話佢公司仲請人，問我點解冇搵佢？」
可勇：「做金有乜嘢好？安安定定搵其他嘢做咪仲好。」
阿栽：「你冇同我講真話。」
可勇：「我唔想你再做返金。」
阿栽：「你冇同我講真話。」
可勇：「我咪講左唔想你做金囉。」
阿栽突然企起身，雙手用力咁將整張枱反起，兩眼紅筋咁向可勇大聲咆哮：
「你點解要幫垃圾球做嘢？」
一張反轉左既木枱，一地凌亂既雜物，再加上兩個正準備開戰既男人。
潮哥既手下都唔敢出聲，只係望住阿栽帶住一起一伏既呼吸聲，好憤怒咁望住可勇。
面對阿栽既提問，可勇沉默左幾分鐘，然後答左一句，連自己都唔知啱唔啱既說話：
「我幫佢做嘢有乜嘢問題？」
聽見可勇既回答，阿栽心情更加崩潰，自從可勇出獄之後，佢同阿栽兩個就好似可正口中所講，一齊奮鬥，一齊成功過，雖然最後大家都係一齊喺金市入面失敗左，
但阿栽覺得，可勇已經係佢一世既兄弟。
自從可勇離開金市之後，阿栽仍然都係有喺金市入面打滾，但好景不常，唔知係運氣定係阿栽本身既問題，金市既生意一日比一日差，搵客既情況亦都比以前困難，最後阿栽決定拎住做金市賺到既錢，去同朋友搞一啲小生意，當然最後都係失敗收場。
之後既阿栽生活轉化平淡，冇左以前金市既五光十色，換嚟既係一份安安穩穩既工。同可勇一樣，做過金市賺過大錢既人，喺回歸平凡既呢個過程，都係產生好強烈既自卑感，都係覺得自己由上層跌左去下一層，每個人都會用輕視既眼神去打量自己，最後，果段時間，阿栽選擇左避開所有朋友，包括可勇。
誰不知一別，眼前既薛可勇，陌生到連阿栽都覺得好恐怖。
阿栽：「冇問題？如果冇問題你就唔會呃我，你目的根本就係唔想我去yoyo度返工，唔想我同你屋企有接觸，唔想我知道你幫垃圾球做嘢。」
面對阿栽既指摘，可勇只係望住阿栽，冇講說話。
阿栽：「如果今晚我唔係撞返阿潮，佢就唔會向我講你向佢大佬收數既事，我到果一刻先知，點解你會同我講yoyo公司唔請人，
薛可勇，你知唔知我由你老婆口中知道你呃我果時，我係幾難受？
我趙文栽個人係縮骨，但對你我一早就當左你係我兄弟，做宏訊果段時間，係我最開心同最成功既日子，你仲記唔記得我地兩兄弟一齊睇市一齊嬴錢果個笑容？」
「記得……」可勇垂低頭，唔敢再同阿栽對望。
「記得你仲出賣我！」阿栽突然走上前，一拳打落可勇既面上。
可勇完全嚟唔必反應，人向後一跌，跌左落餐廳既卡位，阿栽想再走上前，可勇已經雙手推開阿栽。
「夠喇，栽！」可勇大叫
阿栽：「薛可勇，我地一世都再冇兄弟做！」
阿栽用盡全力既一句，就好似一粒子彈咁，打中可勇既心臟。
可勇：「我都有我難處架？點解你唔問下我？」
阿栽：「每個人都有佢既難處，但呢個唔會係出賣朋友既原因！」
可勇：「我冇出賣你，我出賣你乜嘢？」
阿栽冇再回答可勇，一股氣咁向餐廳門口走出去，消失喺可勇既視線之中。
呢個時候，有人搭左可勇膊頭一下，可勇一望，係潮哥。
潮哥：「你冇事嘛？係唔係我多口向阿栽講左你既事？」
可勇：「冇事，遲早都要知。」
潮哥：「不過，你都係唔好近阿球太多。」
可勇：「得架喇阿潮，我知你好意，我會同阿栽自己傾。」
潮哥：「我唔係話你同阿栽，我係話我同阿球。條仆街起左成百萬貨，遲早一次我幫佢做忌，但我唔想你同佢行得太埋，來叔係我世叔伯，我唔想同你有乜嘢衝突。」
可勇：「潮，你搞清楚，你同球哥既事，同埋你同我細個識既事，係唔關事。佢起你既貨，你要點搞佢，唔關我事。
如果我唔好彩，你搵人斬佢果時我在場，就係我自己唔好彩，我唔會怪你，好冇？」
喺一大班手下面前，俾可勇用非常唔禮貌既語氣頂撞，潮哥完全冇唔高興，仲笑笑口咁拍一拍可勇手臂，然後示意一班手下離開。
臨走前，霜霜跑到去可勇既身邊：
「喂，咁我跟潮哥走架喇，佢好有型呀，拜拜。」
「淫娃。」可勇等霜霜走左之後，不屑咁吐出兩個字。
返到屋企，已經天光，可勇望住訓左覺既靜悠，心入面有一種好奇怪既感覺，與其話係一種感覺，不如話係一個預感，
可勇覺得，靜悠好快就會離開自己。
呢個一係好直接既感覺，無原因無理由，就好似其他人所講既第六感一樣。
本來可勇都想叫靜悠起身問一下到底佢講左幾多嘢俾阿栽知，但可勇再諗，阿栽而家都已經知道自己同球哥做嘢，靜悠講左幾多，都已經唔係一個重點。
可勇行出大廳，走到去廚房拎左一罐啤酒，然後慢慢咁坐喺大廳，望住慢慢發光既天空。
唔知大家有冇呢個習慣，我每住左一間屋一段時候，就會有一日無端端訓唔著，然後行到去屋既某一個角落，將整間屋清清楚楚咁望一次，再回想一下，呢間屋入面我到底同邊一個，走過邊一段日子。
諗既時候思維會特別清晰，價值觀會特別中立，心情亦都會隨之然放輕，好似將心靈嚟一次徹底既洗滌一樣。
可勇話我知，果一朝早，佢諗到呢間屋，諗到搬入嚟果時我地屋企乜都冇既樣貌，諗到阿爸、阿媽、讀緊中學既我同佢自己，然後諗到一路走來既種種感情同關係。最後，可勇既腦海入面，閃過最後一個畫面同問題…
到底我薛可勇而家做緊乜嘢？
唔知係酒精影響，定係可勇最近實在太大壓力，可勇訓左喺梳化，一邊飲住啤酒，一邊慢慢咁流眼淚。
佢哥哥薛可正，當日都因為以娜既事，訓喺同一張梳化上面，做住同一樣既事。
可勇合埋眼，一路飛快而又零碎咁回憶自己既過去，突然，有一隻小手拉拉可勇既手指尾，可勇一望，係天佑。
天佑：「爸，水啊。」
可勇：「天佑，點解你起左身？」
「水啊。」天佑指指自己身邊既水樽，話俾可勇知自己想飲水
可勇：「爸爸幫你倒杯水。」
天佑飲完水之後，伸伸手，示意想可勇抱起自己。可勇將天佑抱起，然後天佑就喺可勇既懷抱入面，慢慢咁訓著左。
可勇滿足咁抱住天佑，喺大廳中間來回咁踱步，一邊哼住爸爸細個教佢既童謠，一邊又眼訓又開心咁慢步。
我以前每次抱住自己小朋友做呢一個動作，腦入面，都會諗起周杰倫既一句歌詞，
「我想就這樣牽著你的手不分開，愛能不能夠永遠單純沒有悲哀？」
最後，由靜悠既口中知道，阿栽入左潘志龍既公司做Team頭，返左工兩個星期，已經搵到兩個客。
所以既事都一直向好，除左阿栽對可勇既態度。靜悠話公事上阿栽係百份百投入，偏偏係每次靜悠想幫可勇做說客，阿栽就會斬釘截鐵咁離開。
之前可勇想幫球哥收既果條爛數仲未有眉目，另一邊，潮哥同球哥既手下喺金馬倫道通利琴行出面大打出手，高榮俾潮哥手下一個叫天照既人用木棍恨恨咁重擊一下，最後送入深切治療搶救三個鐘頭之後先執返條命。
Forever內
球哥：「呢條阿潮真係要玩嘢，而家連高榮都入左廠，小妖，你叫班細既去睇下阿潮呢排邊頭出入，可勇，你跟我去羅馬城。
阿潮搞到高榮入廠，我就要佢大佬都一齊。」
面對球哥既命令，可勇本來就唔太想，但諗深一層，如果由自己手上去教訓一下麻哥，個情況點都好過任球哥既其他手下去做，至少可勇覺得自己可以避重就輕。
球哥帶住可勇同其他幾個手下，去到可勇第一次同全孝埋伏麻哥既位置，一模一樣咁，等待麻哥既出現。
等候其間，
球哥：「可勇，拎返一兩件先啦，唔通一陣用拳頭打呀？」
可勇：「哦。」
「拎住啦。」
可勇接過球哥遞俾佢既武器，先發現，球哥幫佢一早安排既，係一把開山刀。
可勇「球哥…刀？」
球哥：「唔係刀係乜嘢？佢地搞得高榮，即係唔係講笑，我冇可能唔同佢玩落去，可勇，呢次你一定要幫我，冇得走。」
可勇接過球哥手上果把綁住繃帶既開山刀，個腦開始進入一片空白既狀態，佢完全估計唔到，本來預計只係用拳頭解決到既問題，而家竟然要用刀解決。而最重要既，可勇需要向一個童年相識既朋友落手。
可勇：「球哥…」
球哥：「可勇，我知你同阿潮呢排有兩句，但男人出嚟做嘢，唔好成日諗住可以咁圓滑，你跟得我搵食，收條數可以袋幾萬蚊，你就知呢份唔會係朝九晚五既正常工，總之一陣我行出去果時，你行出嚟既就係兄弟。
如果唔係，我地以後都唔使再見。」
可勇拎住一把刀，企喺呢一個兩難局面既情況下細想，如果幫球哥，自己實在係落唔到手，但如果唔跟球哥走出去，自己既生活，又可能再次陷入困境。
諗到呢度，可勇已經冇時間再諗落去，因為麻哥已經進入左球哥既視線範圍內，球哥已經帶住一班手下，衝向麻哥。
「係佢呀！」
同一時間，可勇將開山刀收喺腰間，人已經衝出去，向麻哥既方向全力跑過去。
正打算返夜總會既麻哥突然見到一班人衝向自己，下意識情況下，向大廈入口樓梯跑上去，球哥一干人等尾隨上大廈，可勇也緊隨其後。
可勇跑到上次捉住麻哥果一層時，故意停一停步，等球哥等人先向上追，因為可勇覺得，年紀開始漸大既麻哥，冇可能會一直往上跑，佢知道自己既體力不足，搵地方避開，先係最好既方法。
可勇憑直覺走入果一層空置既單位入面，然後企喺原地，一路聽下有冇奇怪既聲音發出。
「撕。」可勇既身後發出聲響，可勇回頭一望，果然見到球哥正打算從自己身後逃走。
兩個童年時已經有交情既人，而家喺一個陌生既地方，古怪既立場下對望。
麻哥：「薛可勇，上次我已經還左錢俾你，點解仲要搞我？」
「唔係我意思。」面對麻哥既提問，可勇完全唔知由邊一個方向先去解釋
麻哥：「唔係你意思？你追到嚟呢度，條腰仲有把開山，你話你冇意思？」
可勇：「阿潮同球哥打大交，球哥頭馬入左廠，係球哥要拎你祭旗，我都係到左呢度先知佢拎埋刀，麻哥，你搵地方走啦。」
麻哥：「我已經通知左阿潮，你自己執生。」
麻哥從可勇既身邊走過，果一刻，唔知點解可勇有一種好強烈既感覺，佢好想用手上既刀一刀將麻哥斬開，跟住佢就會得到球哥更大既賞識，然後可以飛黃騰達，唔會再失去任何人同事。
但最後可勇都係冇做到，因為佢過唔到自己果一關。
麻哥走到門口，突然反方向走返入屋，因為門外面已經有幾個人走入左嚟，係球哥仲有佢既幾個手下。
球哥：「點呀麻哥，走啦。」
麻哥：「垃圾球，錢我都還左，阿潮既事你自己同佢計，唔關我事。」
麻哥一路講，人就一路靠向窗邊，只係希望拖得一時就一時，潮哥可以盡快趕到。
可勇既情況最尷尬，佢唔想向麻哥做出任何傷害，但亦唔想得失球哥一邊，因為再細心諗，就算佢想幫麻哥，都唔會幫到得太多，因為球哥既人數唔係可勇可以應付得到。
如果傷害麻哥，阿栽亦都會好快從潮哥身上得到消息，阿栽知道，亦即係話靜悠都有機會知道，可勇向一個兒時既朋友落手。
但得罪球哥等如失去所有，可勇一邊諗就一邊覺得為難，慢慢，變成一股怒火。
一股希望盡快解決面前問題既怒火。
球哥一直都冇講嘢，只係拎住一支水喉通，一步一步咁行近麻哥，呢個時候可勇亦都走上前，因為佢已經有左一個決定。
球哥：「我唔做小小嘢，你細佬就以為我好恰，麻仔，當你唔好彩。」
「垃圾球，阿潮好快就嚟…」
麻哥已經走到去一個牆角，除左跳窗之外，根本冇路可以走，只可以見到球哥舉起水喉通，準備將自己轟一個頭破血流。
「叫我垃圾球丫喇！阿潮嚟到我收埋佢皮呀！」球哥舉起水喉全力向麻哥既頭打埋去，呢個時候，突然…
「球哥等我嚟。」可勇呢個時候衝埋去，以極度唔協調既時間衝埋球哥同麻哥中間。
可勇微微咁側向球哥，希望佢支水喉通係打向自己既手臂，咁做就可以拖得一時得一時。
點知球哥俾可勇既舉動嚇左一跳，人一猶豫，手就向左邊傾斜，將一支全力打埋去既水喉通，重重咁轟左落可勇既頭上面。
「砰。」
全場人都停住左動作，可勇跌落地之後立即起返身，搖一搖個頭，望望球哥：
「冇事丫嘛。」
講完呢句，可勇覺得雙眼被好多顏色擋住，一大條失控既鮮血，急速咁由可勇頭上傾瀉落嚟，可勇眼前一黑，就再冇任何知覺。
「可勇！」呢一聲既呼喊，已經係可勇昏迷前聽到既最後一句說話。
唔知道過左幾耐，可勇先回復返知覺，佢醒返聽到既第一句就話，係來自佢親生哥哥 – 薛可正。
可正：「我叫左佢唔好同果班人行得咁埋，而家出事喇，我點同阿媽講。」
安兒：「你細聲啲啦，呢度醫院嚟架。」
可正：「老婆呀，我點細聲呀，你睇下佢個頭，腫左成倍有多呀，而家仲話照下有冇裂骨，天佑得幾歲人仔咋，可勇有事叫靜悠佢地兩個點呀？」
安兒：「就算係咁，你嘈又有乜嘢用呀？一陣靜悠搞完手續返嚟你咪又係令佢更煩。」
可正：「而家成件事又未知係點，收到個電話嚟到醫院就見到佢個頭咁樣。」
安兒：「好喇，一陣先再講啦。」
可勇迷糊之間聽到可正同安兒既對話，但可勇連打開眼既力量都冇，只可以合埋眼一路聽住可正大吵大鬧。
突然間，可勇聽到有其他人走入間房，
「請問邊位係薛可勇既家人？」
可正：「我係佢大佬。」
「即係你都係薛生啦，我姓陳，係旺角區既CID，而家情況就咁，有人報警就話你細佬喺一層空置左既商廈入面暈左，我地伙記去到就見到佢成頭血咁訓左喺度，但我地睇過佢身上既財物，仲喺身上面，暫時唔知係打劫定係尋仇，所以想喺你地度拎小小資料。
可正：「我乜都唔知。」
陳Sir：「你細佬返咩工架？」
可正：「唔知，我地冇問。」
陳Sir：「咁佢平時鐘意去邊玩？有冇群埋哂唔好既朋友？」
可正：「唔知。」
就係咁，無論呢位陳Sir問任何問題，可正都會答唔知，可勇雖然迷糊期間唔係聽得好清楚，但佢知道可正既用意係唔想增添自己更多既麻煩。陳Sir問左半個鐘，依然係未問到可正半句答案。
陳Sir：「好喇，咁你有乜消息或者係你細佬醒左就通知我地，我地喺地下果層103號房。」
安兒：「知架喇阿Sir。」
陳Sir走左之後，安兒特登行到去可正身邊，將聲量壓到好細聲咁問可正：
「點解你有啲嘢知道都唔講？」
可正：「俾佢地知道一樣，佢地就會刮多十樣出嚟，我仲未知可勇發生乜嘢事，所以我唔想俾麻煩佢。」
呢個時候，枱上面一個電話突然間響起，係可勇既電話。
可正毫不猶豫，拎起電話一睇，打電話嚟既係球哥。
「垃圾球，你搞乜撚野搞到我細佬咁呀？」可正拎起電話，用盡生平既氣力向球哥叫出呢一句。
「你係邊個？」
可正：「我係薛可正，可勇大佬呀，唔識我呀？」
「你細聲小小。」
可正：「到底發生乜嘢事？邊個打到我細佬咁樣？」
「我叫你細聲小小。」
可正：「而家係你打電話嚟，你唔高興就同我收線，你當我係你隔離啲金毛仔呀？」
「可勇而家點？」
可正：「訓喺床度囉點，你答唔到我問題你就收線，仲有，我細佬好返之後你唔好再叫佢去你度做嘢，係咁多。」
「你記得唔好同班差佬亂講嘢。」
可正：「睇下點。」
講完，可正就收左線，安兒正想發作鬧可正既態度果時，靜悠呢個時候返左入房。
靜悠：「哥，安兒。」
安兒：「悠，搞好未？」
「嗯。」靜悠輕輕答左安兒一句，就坐左去可勇身邊，拖住可勇隻手。
靜悠呢個動作，令可勇感受好深，因為薛媽喺佢地兩兄弟好細個果時已經講過一樣道理：
如果你地同對方係好親密既人，就算你地爭執、鬧交又或者係反面，但如果任何一方有事，你地都需要第一時跑到去佢身邊，支持佢、撐起佢，令佢唔可以覺得孤獨。
世界上冇一種關係，係因為爭執而值得分開，如果你地都愛對方的話，
無論係親情、友情或者係愛情。
靜悠呢一下拖手，就好似將之前同可勇既所有不快掃走，兩個人慢慢咁再重建曾經擁有過既事。
可勇突然用力咁緊握住靜悠既手，靜悠喜出望外企左起身，發覺可勇面上係帶住微笑。
靜悠：「老公，你醒喇？」
「可勇。」可正同安兒聽到靜悠既叫聲，都跑去可勇既床邊。
可正：「可勇，同大佬講，係邊個打到你咁。」
可勇用手指做出一個自己冇事既手勢，希望可以安撫到可正既情緒。
可正：「你同我講啦，你講我知就得架喇。」
可勇知道可正既性格，其實如果換轉係可正受傷，可勇自己都一定會咁既反應，所以可勇冇打算阻止自己既大哥，佢只係用盡九牛二虎之力，用非常非常微弱既聲線，向自己最親既三個親人講左一句：
「我…搞………得………掂………………信…………我………」
可勇最後証實係頭入面有一條小裂痕，醫生話以表面傷勢咁去睇，可勇只係得一條裂痕已經係好好彩。
差人果邊亦都三番四次嚟搵過可勇，但係可勇每次都係話自己上夜總會玩果時無端端俾人打穿左個頭，其他既事完全唔知道。
最後差人都係冇辦法，只係可以隔一段時間就嚟可勇再問一啲本來已經問過既問題，當然，最後都係冇結論。
薛媽最後從安兒口中知道左呢件事，但奇怪地薛媽聽到之後冇太大既反應，只係喺可勇未出院前問過可正佢既情況，知道已經開始康復後薛媽就冇再繼續追問落去。
可勇出院之後繼續留喺屋企休養，靜悠繼續佢既金市生活，而可勇康復呢段期間，最大既娛樂就係每日帶天佑到公園玩。
公園入面有好多唔同既小朋友由佢地既父母陪同下一齊玩，有一日，當可勇望住天佑自己一個周圍玩既時候，突然有一個少婦行過嚟。
「我叫李太呀，你係天佑仔個爸爸呀？」少婦自我介紹
可勇：「係呀，李太你好。」
李太：「最近唔見天佑媽咪既？」
可勇：「係呀，我太太返工，所以最近都係由我媽咪湊天佑。」
李太：「薛生呀，咁你幫我交俾你太太啦，之前佢問我鼻敏感用邊種噴劑好，我成日話拎俾佢睇都唔記得左，到記得果時已經見唔到佢陪天佑嚟，你幫我交呢張紙俾佢，叫佢買呢個牌子就得架喇，好好架。」
「好呀，唔該妳。」可勇茫然咁接過李太放低既紙條，然後揮手向李太道別。
全家人入面，只有可勇一個人有鼻敏感，可勇最清楚呢件事，亦即係話，靜悠喺果段同自己冷戰既期間，都仲係好關心自己既所有問題。可勇望住張紙條，再望下天佑，然後用手去摸摸自己仍然未完全康復既傷口，果一剎那佢覺得自己好無用。
同哥哥薛可正一樣，可勇一開始就用錯左一個觀點去對待自己同太太既一段感情，薛可正最後失去既可能只係同張以娜一段感情，但可勇失去既，會係一段婚姻，加上天佑一個健康既成長環境。
休養期間，可勇又再一次走入死胡同，佢好想繼續維繫呢個家，但家人因為今次意外而對可勇重返球哥夜場既態度，已經由唔贊成演變到反對，特別係薛可正，已經唔止一次講會因為呢件事向球哥問過明白。
還原基本步，如果唔喺球哥既身邊，可勇又點能夠搵到心目中足夠應付生活既錢？走返去做一份穩定既工，整件事就好似冇轉變過一樣，生活入面永遠都會有經濟壓力呢個惡魔出現？
之後會唔會又演變返一連串因為金錢同生活既不快事出嚟？
呢個問題一直困擾住可勇整個休養既時間。
意外發生之後三個星期，可勇收到一個電話，打電話嚟既人，係全孝。
呢次係意外之後，全孝第一次打電話給可勇，電話既開端，全孝講左一個消息俾可勇知，全孝已經去到Forever幫球哥手。
可勇：「又會咁既？」
全孝：「果晚我同家樂上去玩，玩左一陣樂芝就叫我入球哥房，球哥問我想唔想幫佢手，仲話等你好返就叫我跟你一齊做嘢。」
可勇：「但佢冇打電話俾我，我都冇講幾時返去。」
全孝：「我又唔知呀，佢話佢會打俾你，我都係由球哥佢地口中先知你既事，你冇事嘛？」
可勇：「冇事啦，係呀，呢件事球哥果邊有冇講其他嘢？」
全孝：「球哥話果日佢唔小心打暈你之後，潮哥班人就嚟到，兩班人你眼望我眼咁見到你成頭血訓喺地下，最後球哥話協議潮哥各自散人先，怕再打落去真係會流血流死你，跟住佢地走左之後咪幫你報警，直到見到差人去到樓下佢地就走。」
可勇：「原來係咁。」
全孝：「球哥話知你冇向差人講任何嘢，話你夠兄弟。」
可勇：「咁我休息多幾日就返去行下再搵你。」
全孝：「好呀，仲有呀，呢幾日都有條女叫霜霜既上Forever搵你，你朋友？」
可勇：「條女唔係埋左潮哥堆咩？仲敢上Forever既？得喇，到時先算，電聯。」
「再見。」
當晚，靜悠返到屋企，見到可勇已經煮好晚餐等佢返屋企一齊食。
靜悠：「嘩，老公你轉性呀，咁好心機既？」
可勇：「俾人扑傻左嘛，哈哈。」
靜悠：「唔好亂講嘢啦，我拎埋天佑個碗仔就一齊食飯。」
「好。」
氣氛歡愉既晚餐，令可勇同靜悠都覺得非常開心，直到可勇提出一個要求…
可勇：「老婆，我好返之後想返球哥…」
靜悠：「唔得。」
可勇：「上次係意外…」
靜悠：「我唔會理，我諗阿哥都唔會理，係唔係意外都好，但你都聽到醫生講，如果打過小小，你命都冇。」
可勇：「我知，但我會自己小心。」
靜悠：「你出事都係咁講。」
可勇：「但我唔返去做唔通又打份幾千既工咩，我唔想妳出去做嘢。」
靜悠：「老公，如果你唔想我去返工，你應該係俾心機搵一份可以應付到我地開支而又令我安心既工，如果你再走去果個球哥度做，你一個月搵幾十萬我都訓得唔好。」
可勇：「今日全孝打俾我，話球哥好想我返去幫佢手。」
靜悠：「你知唔知阿栽同我講，係個阿潮親口話佢知，打傷你既果個就戚球哥。呢個人由你出事之後一次都冇出現過，就算係你出事果日，阿哥話佢都係打過一次電話俾你咁多，呢種人仲值得你幫佢做嘢咩？」
可勇：「果日係誤會，同埋你唔好再聽阿栽講嘢，佢同阿潮有兩句，一定話球哥唔好啦，球哥同阿潮兩兄弟唔妥架嘛。」
靜悠：「我唔理果班所謂江湖人，如果你想我開心，你就養好傷再搵份簡簡單單既工，我呢排識左幾個大陸客，遲小小有可能要返廣州見一個客，如果傾得成就可以搵筆大錢。」
可勇：「妳又話唔使上去既？」
靜悠：「我開佢五千萬，佢都話有得諗，你之前都做過金，五千萬可以做到幾大舊佣你應該知。
可勇當然知道一個五千萬既倉如果正常運作，每個月過百萬係絕對唔係問題，面對呢個數目，自己有乜嘢本事去阻止靜悠？
但可勇聽到靜悠所講既數目愈大，自己想返球哥度搵錢既意慾就愈強，而家聽到靜悠有機會搵到一筆咁可觀既數目，心入面已經決定左自己一定要Forever做自己未完既事。
但可勇同靜悠又點會估到，呢一次公幹加上可勇呢一個私下既決定，正正就係佢地兩個離婚既導火線？
一個星期之後既一個夜晚，九龍仔公園足球場。
「喂，偉仔埋去啦，俾條邊佢落底得喇，王力維你包返偉仔個位啦，成日唔返後點踢呀？」
「敬人你封好條近柱好唔好呀？」
「可正呀，唔好成日斬上去啦，打網球咩兩邊斬嚟斬去？」
呢一日係可正同一班朋友既足球聯誼日，平時可勇都會出席，但因為傷仲未復原，所以今日只係帶左天佑去到球場見下大家。
可勇帶天佑剛剛去到球場，可正就立即跑過去可勇身邊。
天佑：「阿伯。」
可正：「乖。」
可勇：「點呀哥，今日夠唔夠人？」
可正：「就係唔夠，敬人話帶多幾個朋友，點知原來係你唔想見到既人。」
可勇：「即係邊個。」
「你自己睇喇。」可正指指球場中心，然後拎起個足球帶天佑去玩。
可勇循可正所指既方向一望，見到球場中心既人竟然係阿栽。
可正明白可勇唔想阿栽知道佢去幫球哥手既消息，所以一早就煞有介事咁向可勇提點。
呢個時候球場既人到左休息時間，大家都走向球邊休息。
敬人：「喂，可正又話你唔嚟既可勇？你個頭做乜呀？成個幾月唔見人，係呀我叫左阿栽嚟，王力維話你地幾個之前一早做金，即係熟啦。」
一班從細認識既朋友就有呢個古怪問題，因為人數太多，圈子又太多，所以好多時會出現阿甲唔知乙丙有過節，阿丁又唔知阿乙俾阿甲搶左女朋友呢一類既私事，往往會喺巧合既情況下約左出嚟，然後出現好多尷尬既場面。
敬人一輪介紹之後，可勇望住阿栽，阿栽冇理可勇，飲左一啖水之後就自己一個走返出球場。
王力維：「可勇你個頭做乜事？」
可勇：「我大佬冇講咩？」
王力維：「冇呀，係喎，好耐冇見過阿栽，你約架？」
可勇：「唔係，我去搵一搵佢先。」
阿栽一個人拎住個足球喺龍門前面亂射，可勇一眼就睇得出，阿栽只係避開自己，但自從上次餐廳之後，可勇一直都搵唔到機會同阿栽解釋，所以想親身再去同阿栽好好咁傾下。
可勇：「栽。」
阿栽：「唔使講，我唔會同你講嘢。」
可勇：「你聽我講先啦。」
阿栽：「你想講你有難處丫嘛，你想講你埋垃圾球身只係想搵錢丫嘛，我知架喇。」
可勇：「你一句都唔聽我講，唔通真係以後唔見？」
聽見可勇呢句說話，本來背住可勇既阿栽停住左動作，然後慢慢咁轉身望住可勇。
「我一早就決定左以後冇兄弟做，你上次聽唔到咩？」
阿栽同可勇對望，眼神係幾咁堅決，態度係幾咁強硬，可勇想再講嘢，但已經俾阿栽搶先一步。
阿栽：「上次我叫你幫我同靜悠搭路果時，我差唔多已經係山窮水盡，屋企仲有成堆數要找，但你可勇哥點對我？第一你一路呃住我，你將你一向都知既事實，因為錢，將佢掟左去一個連你都搵唔到既地方。
第二，你理虧，所以你冇理我到底咩環境，就同我講yoyo公司唔請人，因為你怕我會接觸到你地，會搞亂你既搵錢大計。」
「栽，做乜事？」可正抱住天佑嚟到，因為上次餐廳既事可勇冇向可正提過，照可正既態度去睇，佢唔知道阿栽同可勇之間發生過既事。
但可正見到阿栽既態度，佢好快就意識到，阿栽應該已經知道可勇去球哥身邊幫手既事，一時之間，可正都唔知可以點應付。
阿栽：「你兩兄弟喺度就啱，你地兩個都受過我恩惠，薛可正你點做大佬？你細佬做埋哂啲咁下流既嘢你都唔教下佢？」
可勇：「唔關我阿哥事，你一單還一單。」
可正：「咪住，可勇係去幫人手，但係人都要搵食，佢又冇出賣你，你細佬既事同可勇同邊個打工有咩關係？」
阿栽：「你講得冇錯，咁點解yoyo公司請人，可勇同我講唔請？」
「………」阿栽講出事實，可正一時間都無言以對，因為佢絕對相信呢一刻既可勇會咁樣做。
阿栽：「你地兩個唔掂果時，我就事事幫到你地盡，可正哥你啱啱入宏訊，我就搭通路俾你地，連邊個唔妥你都幫你收埋風。到後來你地本事，認返德叔，但果時我都冇拎你地任何著數。
但當我冇錢果時你地點對我？」
可正：「誤會嚟架栽。」
「誤會？」阿栽輕輕咁拍左可勇塊面兩下，然後一陣冷笑…
「你兩兄弟成日講男人一定要搵到錢，要俾心機做嘢，唔可以令屋企人唔開心，唔可以俾身邊人憂柴憂米，要做個顧家既男人，
咁我呢？我窮到冇飯開，細佬果筆護理費又要交，問到冇得問，我先去問你想拎個機會做返老本行，但可勇哥有冇諗過我處境？以前一齊炒金果時仲成日同我講男人唔可以窮，真係好好笑……
男人唔可以窮！？而家得你地姓薛既兩兄弟係男人呀？我唔係呀？」
阿栽既一句，都驚動左在場既所有人。
第一個行埋嚟既，係王力維。
王力維：「喂，幾個做乜嘢呀？未開波就咁燥？」
可正兩兄弟同阿栽對望，並冇理到王力維既提問，呢個時候…
天佑：「維叔叔。」
可正手中既天佑，好似知道氣氛惡劣，伸出雙手向王力維求救，王力維準備接住天佑果時，天佑兩隻腳仔一踢，竟然無意踢中阿栽既心口。
「小心丫！」阿栽下意識叫左一句，但聲量明顯有啲過大。
天佑企喺地下，仰望住一面憤怒既阿栽，眼淚已經開始湧出嚟。
呢個係一個非常巧合而又唔應該出現既誤會，阿栽鬧可勇既出賣，可勇知道自己理虧，所以幾唔想吞聲忍氣都要照做，但忍既過程仍然會牽動到可勇剛烈既情緒，情緒積壓太多就需要搵一個出口，特別係可勇呢一類已經情緒失去自主既人。
如果換轉正常狀態既阿栽，根本唔會出口責罵天佑，但情緒去到負面既場合下又另作別論。
可勇執住阿栽呢一個衝動，已經衝上前借題發揮。
可勇：「我個仔得兩歲你使唔使咁大聲呀。」
可勇推左阿栽一下，阿栽退後一步，已經好嬲咁準備衝上前同可勇大打出手。
可勇當然唔會怕，佢正高興天佑為佢準備左呢個可以教訓下阿栽既原因，兩個大男人正準備交手之際，就連可勇都唔記得，天佑正正係處身於佢地中間，好大機會會俾佢地整傷。
呢個時候，可正已經用力拉住可勇，而另一個人就擋住喺阿栽面前，係王力維。
阿栽：「你行開，冇你既事。」
王力維：「有小朋友在場，你地唔好嘈好冇？」
阿栽：「係佢郁手先。」
王力維：「係你鬧天佑在先可勇先燥。」
阿栽：「佢踢到我，我叫一句好正常。」
王力維：「成三十歲人俾個細佬踢一下就大叫？你胸骨有冇碎到呀？你同可勇嘈咪嘈，要拎個細路嚟出氣？」
可正：「維，唔好嘈喇。」
王力維：「我冇嘈喎，但你地幾個大人要講乜都好，係唔係等個細路行開左先講？你都係呀薛可勇，果個你個仔嚟架，佢兩行眼淚都未乾，你仲掛住打交？啖氣真係咁緊要？」
阿栽：「我唔使你教訓我，行開。」
王力維：「你條契弟真係當自己係江湖大佬呀？個場我Book架，要走都係你啦，仆街！」
俾王力維一輪教訓之下，可勇已經稍稍冷靜落嚟，望望天佑的確係流住眼淚咁望住自己，可勇個心痛左一下，然後抱起天佑，轉身就走。
走之前，死寂既氣氛下，可勇拋低左一句人生入面最重要既一世說話：
「趙文栽，我地以後都冇兄弟做。」