男人唔可以窮 II: 7
呢一幕，其他人可能只係覺得一件小事，但喺薛可正眼中，佢見到自己親細佬，好似走左入自己以前一條舊路，甚至更嚴重。
第二日，可正已經急不及待咁去到舊居搵可勇，希望從薛媽又或者係靜悠口中，知道可勇最近既情況。
可正去到樓下，啱啱好見到著得一身華麗既靜悠準備跳上一架跑車，可正望住靜悠既舉動，心入面竟然湧起左一陣好莫名其妙既感覺。
一個本來就有其他身份既女人走上另一個男人既跑車，令可正諗起一個人、一件事仲有一段永遠都唔會忘記既回憶。
可正走上前，去到跑車旁邊向靜悠打招呼。
可正：「靜悠。」
「哥，你返嚟睇奶奶？」靜悠見到可正立刻動身落車，面對薛可正，靜悠永遠都有呢一份尊敬，可能係出自一份當日一齊捱過金市既情誼。又或者係，靜悠當日喺可正身邊見証過佢所遇到既挫折。
可正：「係呀，你返工喇？」
靜悠：「係呀，我表哥潘志龍呀，你識架啦，呢個我大伯正哥。」
潘志龍：「呢個係可勇大哥？喂，你好呀？唔好意思，唔係成日見唔係太記得。」
可正：「冇所謂，大家咁話。」
靜悠：「可勇都喺上面，你上去搵佢啦哥。」
可正：「唔急，架車幾靚喎，你表哥都搵到下。」
潘志龍：「托賴啦，起碼唔使餓親老婆，聽靜悠講，正哥，你以前都係喺宏訊做架喎。」
可正：「好耐之前，而家冇做喇，搵返實業做，炒炒賣賣既嘢有幾穩陣丫，分分鐘今日渣靚車聽日就要乞食。」
「咁又唔係，都要睇個人本事既。」潘志龍知道可正有心落面，亦都不甘示弱。
可正：「本事？第一日做呢行呀？我以前班同事，最覺得自己有料果幾個而家去哂做文員啦，不過冇所謂，做人既嘢一定有三衰六旺，好境果時唔好囂，唔好連底褲入面最後果一蚊都要刮哂出嚟炫耀，冇意思。
唔通我話你知我今日一炮過買左層樓咩，我驚第時自己冇境，俾人玩返轉頭咋。」
「正哥我地趕時間，走先喇。」靜悠感覺到火藥味愈來愈大，都盡快打個圓場。
可正：「我上去先喇。」
可正轉身向大廈大堂走入去，靜悠突然從後面追上嚟。
靜悠：「哥，可勇唔知我表哥嚟接我，你記得唔好講。」
可正：「連呢啲嘢都要呃，妳地搞乜？我知點做架喇。」
「唔該哂哥，拜拜。」
返到舊居，可勇同薛媽都喺屋企入面，可正突然既到訪，令到可勇意識到自己大哥既來意。
言談間，大家傾到一個問題。
薛媽：「樓下果個李太過左身幾年，啲骨灰一直都係放青松果邊，暫託左諗住等佢起好棟新既可以有優先權揀位，點知阿李生話果棟兩層高既嘢起左幾年都未起好，但暫託費就個個月咁收，都唔知等到幾時。」
可勇：「而家出面好多骨灰位都炒到好貴，如果唔係點會有咁多私營。」
可正：「香港真係愈嚟愈唔似人住，冇錢既話，唔好話病，你連死都唔得。」
薛媽：「第時我死左你地將我放埋入你阿爸果度得喇。」
可勇：「阿爸果個位都好似炒到十萬有多，所以你話點可以唔俾心機搵錢？」
「薛可勇你成三十歲架喇，要做乜嘢之前諗下仲有老婆同個仔。」薛媽知道可勇諗法，借機會又再一次表達自己不滿
可勇：「得架喇阿媽。」
可正：「勇，不如我回收公司果度股份預你一半，賺到錢就分一半俾你，到你儲夠錢就俾返入股既錢俾我。
可勇：「點解要咁？你明明賺緊錢。」
可正：「兩兄弟冇所謂啦。」
可勇：「就係兩兄弟，你先唔好好似乞俾我咁。」
薛媽：「個阿哥邊有咁講，可勇點解你既脾氣愈嚟愈似以前？」
可勇：「我休息埋呢兩日就會開返工，你地唔好操心啦，我決定返球哥果度做。」
薛媽：「咩話？」
可正：「可勇…」
「唔好講，再講都係嘈，你地明就由得我，唔明都冇辦法…我落街買嘢…」
可勇離開屋企，轉入後樓梯，慢慢咁一級一級往地下行，行既時候，一路諗起半個鐘頭前，佢喺窗邊唔小心所見到既一幕。
靜悠再一次走上潘志龍跑車既一幕。
兩日之後，可勇收到一個電話。
「喂。」
可勇：「喂…球哥？」
球哥：「係呀勇，你點呀？」
可勇：「幾好呀…」
球哥：「點呀，我咁耐冇打俾你，有冇怪我？」
可勇：「傻啦，明既。」
球哥：「上次對唔住，勇。」
可勇：「冇事，我知你冇心，唔好講呢啲，我聽全孝講佢去左你度幫手。」
球哥：「係，我見佢幾醒目，又同你係老死，如果你會返嚟幫我手我諗住俾佢跟住你，仲有其他嘢都想你幫我跟跟。」
球哥係江湖人，從頭到尾都係一個江湖人，由最初答應可勇既自薦，然後交俾可勇既工作，到最後果次交把刀俾可勇果一刻，佢都以自己既立場做首要。
但唔代表佢對任何事都冇感情，只不過係去到生死關頭，佢都會以自己優先。眼前向可勇開出呢個條件，明顯係球哥一早已經針對可勇既性格而提出。
呢一點可勇自己完全明白，佢唔知道球哥點解一定要將自己拉返去佢身邊，但可勇唔介意，反正，佢自己都有佢自己既目標。
可勇：「好，我過兩日落嚟。」
兩日後，可勇再一次返到Forever，踏入門口果一剎那，就見到全孝笑面迎迎咁等緊自己。
全孝：「勇，球哥今日遲開門做生意，佢知道你返嚟，特登叫我地同你搞個Party，快啲入嚟啦。」
可勇跟住全孝走入去，已經見到球哥向自己行過嚟。
「勇，歡迎你，冇哂事喇嘛？」雖然球哥故作輕鬆，但可勇仍然知道球哥有意無意咁望住自己頭上既傷口。
可勇：「冇事，球哥咁俾面搞咁大個Party。」
球哥：「唔止你一個呀，高榮都冇事喇，但佢未嚟到，今日除左班伙記，仲有啲熟客都一齊玩。」
可勇：「多謝球哥，咁我周圍行下先。」
呢一晚，整個酒吧都係歡迎可勇同高榮既聲音，其他人唔知道可勇受傷既內情，但球哥明顯地向外面宣佈自己對可勇既重視性，令可勇覺得感覺非常良好。
可勇成晚都滿場飛，認識唔同既朋友，又或者係搵好多熟客聯誼，但有一個女仔，可勇以前都經常會見到，但大家都未曾傾過任何說話，可勇對呢個女仔有印象並唔係因為呢個女仔有太大吸引力，而係，佢唔記得自己喺邊度見過呢個女仔。
今晚，幾分酒意之下，可勇主動走過去，打開話題。
「妳好，成日見到妳都冇打過招呼，我叫可勇。」
可勇生硬既開場白，令呢個女仔停頓左兩秒，就好似好驚訝可勇點解會同自己講嘢。
「你好，我知你係邊個啦，我叫Kay。」
可勇：「妳好面善，我係咪見過妳？」
Kay：「你啲開場白咁老土既？」
可勇：「唔係，係我應該真係見過妳。」
Kay：「哈哈，咁唔知你記錯定我錯。」
可勇：「一定見過，等我諗到再話妳知，嚟飲杯先。」
Kay：「好呀。」
Party過後，Forever照常營業，但球哥既房入面，一大班人依舊係繼續慶祝。
球哥拎住一杯酒行到去可勇面前，示意同可勇乾杯。
「球哥飲杯。」
球哥：「飲啦勇。」
兩個人一飲而盡，然後情緒高漲咁談天說地，突然間，球哥主動帶可勇行入另一間細房。
Forever入面所有人都知道，球哥既房入面，有一度小門可以通往另一間細房，而呢個細房既門，只有球哥可以打開，就連樂芝冇唔可以隨便行入去。
「坐啦勇。」球哥行入呢間私人房，然後打開電腦，再拎出另一支酒走到可勇面前。
球哥：「呢間係我真正既房，出面果度我多數都係俾佢地飲飲食食，呢間房先係放我自己既生意，連樂芝都唔係入過嚟好多次。」
可勇：「明白。」
球哥對可勇笑一笑，然後走到去一個大櫃前面拎左兩本大既筆記薄出嚟。
「呢部電腦同呢幾本嘢就係我今個月外圍既數，可勇，上次果件事我知你一句都冇爆我出嚟，所以而家我當正你係我細佬咁睇。我呢度有一堆艇仔既電話，以後外圍波你幫我跟好唔好？細節嘢我會慢慢教你，只要你話冇問題，我就可以開始交俾你。」
球哥突如其來既一問，令可勇驚訝，但唔等如可勇會冇反應，而可勇俾球哥既答案，令球哥更加驚訝。
可勇：「外圍搵得幾多，又要計數又要將啲飛射嚟射去，我唔知搞唔搞得掂。球哥，有冇啲又簡單又搵到快錢既俾我？」
可勇既提問，球哥絕對明白，然後球哥放低酒杯又從大櫃入面拎左一件用雞皮紙包住既物件，「砰」一聲放到去可勇面前既枱面。
「係咪呢啲？」
可勇望住眼前呢一塊物件，完全驚既感覺，因為佢完全知道，球哥交俾自己呢一件係乜嘢嚟，可以幫自己賺到幾多錢。
可勇：「嘩，就咁放喺度，如果平時查牌咪麻煩？」
球哥：「哈哈，你當真架？呢舊模嚟架咋，放咁大舊真既喺自己地方，隨時死左都唔得掂。呢排風聲緊，做呢樣一定要小心，過多個月我再帶你去睇啦。」
可勇：「又係喎，我仲以為真。」
球哥：「仲有呀勇，上次我同阿潮兩兄弟單嘢仲有大把手尾跟，你同全孝出入小心啲，你同阿潮佢地由細識到大，又冇直接衝突，但真係郁起手上嚟，佢地唔會錫住你，你自己最好打定個底。」
球哥既意思，明顯係要可勇確定同潮哥既關係，到底是敵，抑或是友，因為可勇知道呢個決定絕對影響自己喺球哥身邊既位置。
首先用利益做餌，然後再逼可勇確定立場，球哥既諗法已經明顯不過。
可勇：「真係要做嘢既，邊理得咁多感情。」
球哥：「嗯，我同佢地兩兄弟，點都係要鬥一次。」
「飲杯啦球哥。」可勇舉起酒杯
球哥：「飲！不過我未講哂，應該唔止鬥一次。」
可勇：「咁係咩？」
「係遲早要死一個。」球哥一飲而盡，眼入面發出堅定既訊號。
呢一晚Party之後，可勇又重新投入夜生活，繼續每晚既夜夜笙歌，慢慢咁重拾返起自己遺失左既自信，同時亦都係慢慢走入一條死巷。
某一日既清晨，一晚忙碌之後既可勇準備坐車返屋企既時候，喺Forever樓下既橫巷發現爛醉既霜霜。
旁邊仲有一個手足無措既樂芝。
「可勇，見到你真係好。」樂芝見到可勇，好似見到救生艇咁跑過嚟。
可勇：「佢做乜呀？」
樂芝：「飲大左呀，訓喺度死都唔肯走。」
可勇：「做乜嘢事先得架，妳唔叫人落嚟幫妳既？」
樂芝：「佢同果個潮哥玩左幾日就分手，而家嗌生嗌死。」
樂芝講起，可勇記得茶餐廳果一日霜霜正係跟潮哥既車離開，當然往後發生既事亦都唔難估計。
可勇：「咁妳帶佢上去咪唔使訓喺街囉，貪好睇咩？」
樂芝：「球哥知佢跟過潮哥架，點帶呀？」
「咁又係…」
可勇兩個人談話期間，霜霜突然清醒咁坐左起身，見到可勇，霜霜反應其大咁企左起身，然後同樂芝一樣向可勇跑過去。
「可勇，阿潮好賤格唔理我，你幫我打佢。」但同樂芝有所分別既係，霜霜係整個人撲起可勇。
可勇：「喂，放手啦，癲夠未呀妳？」
兩人糾纏期間，後巷既盡頭有一班人走過，入面包括之前同可勇曾經傾過計既阿Kay。
阿Kay望住糾纏中既可勇同霜霜，面上竟然發出古怪既神情。
可勇：「發癲咩妳？行開啦。」
霜霜：「你做乜推我呀，係你介紹阿潮俾我識架！」
可勇：「係妳自己見到人就叫人地車埋你返屋企架！邊個得閒介紹妳俾人識呀癲婆？」
霜霜：「話我癲婆！」
霜霜失控咁走上前摑可勇一巴，但俾可勇捉住隻手。
可勇：「夠未呀妳？」
樂芝：「阿霜妳放手啦！」
霜霜：「個個都話我癲！我邊有癲？我真係鐘意阿潮架！」
可勇：「你慳啲啦！妳試下佢係渣貨車搵八千蚊一個月既妳會唔會叫佢車妳返屋企！鐘意鐘意！妳連佢全名叫乜妳都未知就陪人訓喇！做女人做到妳咁賤，我係妳老豆老母就真係要喊喇！」
樂芝：「可勇…」
可勇：「妳啲咁既女人，有錢有面果時咪覺得有愛情感覺囉，試下要妳住間三百呎既公屋，朝朝早要洗衫煮飯，妳睇下仲有冇知覺！自己而家落錯注妳走嚟話我介紹妳識，妳要傻就同我傻埋一邊啦，仲郁手郁腳，而家我欠妳架？」
霜霜：「仲鬧我，仆街啦你！」
霜霜依舊既態度，不斷向可勇發狂，無論樂芝點樣勸佢都無用，可勇俾霜霜逼到心情煩躁，隨手一推，竟然將霜霜推左落一條去水渠旁邊。
「砰！」霜霜整個人一唔小心，竟然撞左落條水渠上面，然後重重咁訓左落地上面。
「霜妳冇嘢嘛？可勇你做乜呀？」樂芝走上前睇霜霜，嘴裡面不斷咁埋怨可勇。
可勇：「妳問下妳姊妹打夠未？失戀大哂呀？借啲意發癲，我唔理妳地，妳同佢慢慢玩。」
可勇轉身就走，但唔夠三步，就聽到樂芝既叫聲。
「可勇…可勇呀。」
「又點呀？」可勇唔耐煩咁轉身，見到樂芝用右手摸住霜霜既膊頭。
「血呀…好多血呀！」樂芝攤開染滿血既手掌，伸到可勇視線範圍之內。
可勇望住水渠上面果一口尖釘，知道自己又闖禍。
伊莉沙伯醫院內
「喂，好痛呀。」霜霜指住傷口，好嬲咁望住可勇
可勇：「得喇，我都講左好多次對唔住，冇心架嘛，邊個叫妳郁手郁腳呀？」
霜霜：「我女人嚟架，就算我打妳幾多拳都唔夠妳推我一下啦。」
樂芝：「妳唔好指手劃腳啦，一陣個傷口又爆呀。」
可勇：「我陪妳入醫院陪到而家天光七點幾呀，算係咁啦。」
霜霜：「你整我架！唔使你陪呀？」
爭論期間，可勇既電話響起。
可勇：「妳地行先，我聽埋電話先。」
霜霜：「快啲呀，你仲要送埋我返屋企。」
「得啦煩。」
可勇揚揚手，等到霜霜同樂芝走遠先接電話，因為佢由電話顯示入面已經知道打電話嚟既係靜悠。
「喂。」可勇戰戰兢兢咁接電話，腦入面已經準備為自己未返屋企而作一個藉口。
靜悠：「你喺邊？仲未返既？」
可勇：「係呀，班兄弟話食宵夜，去左飲夜茶，差唔多返架喇。」
靜悠：「邊個兄弟？」
可勇：「全孝佢地之嘛，妳咁早起身既？」
靜悠：「俾個電話嘈醒，見你仲未返咪睇下你去左邊，冇嘢喇，我返工喇，你返嚟望一望天佑有冇踢被啦。」
可勇：「咁早返工既？」
靜悠：「今朝有個大客去公司，我要早啲返去準備，唔講喇，我走喇。」
可勇：「我都返架喇。」
「嗯………」
「老婆，做乜事？，」
「老公，你有冇嘢想同我講？」
「我，冇呀………妳呢？」
「我都冇，我起身喇，拜拜。」
「拜拜。」
收線之後，可勇企喺原地，圍繞住佢既，係一種不明既不安感，最後可勇決定立即返屋企。
可勇：「樂芝，妳幫我送佢返屋企啦，我有急事。」
樂芝：「我冇哂錢喺身呀。」
「妳同佢坐的士。」可勇隨手將幾張一千蚊交到樂芝手上。
霜霜：「有冇搞錯呀你？又話送我？」
可勇：「下次先送，妳唔好再煩！」
可勇走出醫院，唔理後面既霜霜點樣大叫，呢一刻可勇覺得自己做錯左，佢根本唔應該為左霜霜呢一個無謂人去呃靜悠。但可勇知道呢個大話一開始左就唔可以停，因為佢同靜悠之間既信任，已經喺唔知邊一個時間開始，消失得愈來愈快，所以就算上一次佢見到潘志龍接走靜悠，佢都選擇信任，而唔去將件事拆穿。
可勇好快咁跑去的士站，跳上的士，吩咐司機用最快既速度返到屋企。
可惜，可勇返到屋企既時候，靜悠已經走左。
早上，可勇起身之後第一件事就係打電話俾靜悠，但換嚟既只係靜悠一句「做緊嘢。」
「做緊嘢…」可勇收線，唸唸有詞咁重覆住靜悠既一句說話，旁邊既天佑聽到，又好奇咁跟住一齊講
「做緊嘢，做緊嘢。」
可勇：「仔，過嚟爸爸度。」
可勇揚揚手，天佑好開心咁跑過去，然後一下衝入可勇既懷中，可勇抱住天佑，兩父子又開開心心咁一齊睇電視。
「仔，俾爸爸望下先。」可勇將天佑安放到自己大脾上面，雙手托住天佑小小既兩頰，就好似研究藝術品咁欣賞天佑。
可勇：「仔呀，你又大個左，爸爸係咪太少見你呢？」
天佑望住可勇，好似唔明白可勇所講既說話，但可勇冇理會，繼續講自己想講既事。
「其實爸爸都想陪你多啲，但爸爸讀書唔叻啦，要搵多啲錢呢，就要出去做嘢搵錢，所以唔可以陪到你太多喇仔。」
「仔，你鐘意爸爸定媽咪多啲？」
「仔，如果以後見唔到爸爸，你會唔會好掛住我？」
「爸爸成日都好掛住爺爺，第時爸爸死左，你會唔會都好掛住我？」
「仔，你大個左之後會唔會唔理我架？」
以上咁多句唔屬於男人會講既說話，我肯定有百份之八十以上既父母都會講過，原因只不過係因為某一個時刻入面信心既動搖。
小朋友遇上挫折時會跑返去父母懷中，
父母失落時兒女亦都係佢地一個好好既緩衝點。
但可惜好多兩代既關係入面，大家都唔知自己係對大家有幾重要。
過左冇幾耐，可勇收到哥哥可正既電話。
可正：「勇呀，今個星期成班去睇波喎。」
可勇：「睇咩呀？」
可正：「德國對英格蘭呀，敬人佢地話出去睇呀。」
可勇：「睇波？但我果日應該要返工喎。」
可正：「你返工廠咩，使乜咁準時呀，睇完先啦。」
可勇：「應該問題唔大，預我。」
可正：「可勇，阿哥有啲嘢同你講。」
可勇：「關於乜嘢？」
可正：「果日我返屋企果時喺樓下…」
可勇：「喂，哥呀，天佑撞到腳，我再覆返你。」
可正：「好，你去睇佢先。」
收線之後，可勇望住面前安好無恙既天佑，心入面湧起一陣陣既內疚感。佢知道可正想同佢講既事應該就係潘志龍接走靜悠既事，但可勇唔想再聽，佢知道哥哥出發點係好意，但佢已經唔想再喺任何人面前表露出對靜悠非常信任既決心。
因為事實上，佢根本冇呢個心。
無論一段關係既開端係幾完美都好，其由於兩個相對既日子實在太多太長，如果稍一不慎，兩個人喺生活入面脫左軌，大家既世界入面已經搵唔到對方既蹤影，呢段關係所受既考驗亦會順理成章地愈來愈大。
可勇明白呢個道理，所以佢寧願好似抱住一隻易碎既碟一樣，唔做任何動作，以好好保護呢段易碎既關係為首要。
夫妻愛情，從來都係一邊琢磨，同一時間一邊折磨。
當晚返到Forever，可勇第一件事就係搵樂芝問下霜霜既情況。
「佢冇事，我送左佢返屋企啦。」
可勇：「如果佢要再睇醫生妳話我知，話哂我整傷佢，醫藥果隻我俾。」
樂芝：「得啦，你驚佢唔搵你咩？」
可勇：「點解咁講？我同佢冇兩句架喎，上次佢跟阿潮走左之後，唔係佢走返出嚟我都唔記得左有個人。」
樂芝：「佢仲有幾日就生日呀，佢話叫我訂房，佢要約朋友落嚟玩喎。」
可勇：「有生意咪做佢囉，怕乜？」
樂芝：「唔知呀，我見佢好主動咁成日話要搵你。」
可勇：「上次見到阿潮佢又咪係咁樣，唔使理佢，我去廁所先。」
可勇起身行去廁所，轉角位之後，佢見到一個熟悉既身影拎住一杯酒向自己行過嚟，係阿Kay。
Kay：「Hi，可勇。」
可勇：「我仲未記得邊度見過妳。」
Kay：「唔記得好過記得啦，你唔怕你女朋友唔鐘意？」
可勇：「我女朋友？邊個我女朋友？」
Kay：「上次我走果時喺後巷見到你同你女朋友拉拉扯扯，我見尷尬咪冇同你打招呼，球哥女朋友都在場。」
可勇：「果個？果個唔係我女朋友啦，我有老婆架喇，個仔都兩歲幾。」
Kay聽見可勇講自己有老婆仔女之後，笑左一笑，然後拍一拍可勇既膊頭：
「有老婆就早啲返屋企啦，我返房玩喇，再見。」
對於呢類對話，可勇唔太上心，反正夜場入面，大約有八成以上既對話都屬於廢話。
三日後，亦即係可正約可勇睇波既前一日，霜霜帶住一班朋友去到Forever開佢既生日會。
「哥呀，聽晚我唔出去睇喇，就算睇我都喺屋企睇，我想陪下天佑，同埋靜悠同我講聽晚會夜返呀。」可勇企喺後門，大聲咁通知可正自己唔能夠赴約既事
可正：「你唔去咁我去你度陪你啦，橫掂安兒都話天迪好耐冇見過天佑。」
可勇：「係啦，俾佢地兩堂兄弟玩下。」
可正：「咁我聽日打電話俾你。」
「喂，你送乜嘢生日禮物俾我呀？」可勇未收線，已經有人拍左自己膊頭一下，可勇未回頭，都已經知道係霜霜。
可勇：「生日禮物？冇喎，唔知妳生日。」
霜霜：「你個賤人丫，整到我入醫院仲唔記得我生日，折現算喇。」
可勇：「小姐，妳搞清楚，我係從來唔知妳生日，而唔係唔記得，仲有上次我俾樂芝送妳返屋企果啲的士錢，夠妳坐到上廣州喇，仲叫我折現。」
霜霜：「唔理你，一陣你入我房同我猜兩板呀，唔係我今晚煩足你一晚。」
可勇：「得喇得喇，轉頭入嚟啦。」
十五分鐘之後，可勇收到靜悠既電話，電話入面傳嚟既，係一個可勇唔想聽到既消息。
「老公呀，聽朝一早我會同表哥仲有幾個同事返大陸見客，要去到廣州呀，我好早返去，但唔知趕唔趕到返嚟，如果趕唔到我就再打電話俾你呀。」
可勇：「點解咁急既？」
靜悠：「客既嘢邊有急唔急，總之我會盡快返，仲有天佑有一堆幼稚園入學既資料要睇，我放枱面，你放工就睇下。」
可勇：「好，咁我放工早小小返。」
靜悠：「唔使特登趕，我訓喇，早抖。」
兩公婆機械式既對話之後，可勇既心情已經轉差左一大截，之前明明講好左唔會同潘志龍上大陸見客既靜悠，好似一步一步推翻自己所講既野咁。但都係一句老話，面對動輒幾百萬既客人，可勇又可以點樣？
可勇悶悶不樂咁喺場入面走左個圈，最後走入霜霜既房入面，打算同佢講一句生日快樂。
霜霜：「可勇，你嚟就啱喇，我俾人圍呀，幫我頂兩杯。」
可勇：「我講句生日快樂架咋。」
朋友甲：「可勇哥係呢度睇場喎，點都要飲兩杯啦。」
朋友乙：「係呀，當賀下壽星女都好啦。」
霜霜：「你睇到啦，唔使講我班老死都叫你同我飲兩杯。」
可勇：「飲兩杯咋下？拎嚟啦。」
霜霜：「我都話可勇好架啦。」
就係咁，可勇呢一晚就坐低同霜霜一班朋友玩左一晚。可勇不停飲，不停飲，就好似想將所有生活上唔開心既事都忘記哂一樣，芝華士、啤酒、吧枱度拎過嚟既雞尾酒，甚至就連霜霜自己朋友帶去既孖蒸，可勇都照單全收。
同時霜霜都有一定既醉意，兩個就係咁坐埋左一齊，愈坐，愈近，最後霜霜整個人訓左喺可勇既大腿上面，不省人仕。
霜霜慶祝生日既房係一直打開，同一時間，房外面有一個人不斷咁將兩個人玩得盡興時既畫面，全部都用電話拍低哂。
凌晨五點，未酒醒既可勇用盡全力咁起身，拍拍身邊既霜霜。
可勇：「我返屋…企喇。」
霜霜：「我都走，一齊啦。」
可勇：「都唔同…路…」
霜霜：「行啦…」
最後，可勇神智不清既情況下，同霜霜一齊離開左Forever，當然，佢地一齊離開既情況，亦都俾同一個人清清楚楚咁影低埋。
離開Forever之後，可勇只係記得霜霜去便利店再買多兩支酒一齊飲，可勇上的士，打算送霜霜返屋企再自己返屯門，但上的士之後既情況，可勇已經完全唔記得。
可勇只係知道，第二日既朝早八點幾，佢一個人訓左喺屯門市中心巴士站旁既一個花叢邊，由一個途經既警察叫醒自己。
可勇俾警察叫醒之後，無意識咁坐喺原地，極力咁嘗試回憶上車後既情況，可惜唔成功。
最後佢隨便咁搵一個地食左一個早餐，九點半就返到屋企。
薛媽：「你咁晏既？靜悠一早上左大陸喎。」
可勇；「我知呀。」
薛媽：「天佑幼稚園既資料喺枱面，靜悠叫你自己睇返。」
可勇：「我起身先睇。」
薛媽：「仲有呀，你阿哥話今晚唔出去睇波，佢同你阿嫂會返嚟食飯，順手睇埋波。」
可勇：「哦。」
可勇換過睡衣，就跳入自己既床倒頭大睡。
呢一訓，直到天黑，可勇再起身既時候，整間屋既氣氛已經完全唔一樣，阿哥可正同阿嫂安兒都嚟到，而天佑就喺廳既一角玩玩具。
安兒：「可勇起身喇？奶奶就嚟煮好就食飯喇。」
「知道，我刷左牙先呀嫂。」可勇瞇瞇眼向安兒講。
可正：「可勇呀，你今晚要唔要返工？」
可勇：「唔返呀，我打算等靜悠返嚟，我冇陪佢好多日喇。」
可正：「佢去左邊呀？」
可勇：「同成大班同事返左大陸見客呀。」
可正：「好多人架？」
可勇：「唔知呢，我打個電話俾佢先。」
可勇拎起電話打俾靜悠，電話接通，係香港電話既接通鈴聲，可勇好開心咁知道靜悠今晚唔需要喺大陸過夜既同時，電話突破截斷左。
可勇覺得奇怪，再打多一次，情況都係一樣，電話被截斷。
由靜悠既另一邊截斷。
可勇再嘗試打多幾次，但情況都係一樣，最後可勇冇辦法之下唯有等靜悠覆佢電話。晚飯時候，一家人開開心心咁一齊食飯，但可勇依然係心不在焉，因為靜悠一直都冇覆電話俾可勇。
可勇一直等呀等，但無論係電話抑或係靜悠本人都未有出現過。
一直等到晚飯後兩個鐘，英格蘭對德國既世界盃比賽之前，可勇終於聽到大門打開既聲音，可勇一望，見到靜悠拎住一個大大既行李包企喺大門當中，同時，用目無表情既眼神望向可勇。
正當可勇想向靜悠打招呼既時候，靜悠已經淡淡咁講出一句震驚薛家既說話：
「薛可勇，我要同你離婚。」
靜悠既一句說話，令整間屋入面既氣氛突然急劇逆轉。
安兒：「靜悠，妳傻左呀？」
「我冇傻，妳地自己問下薛可勇自己做過乜？」靜悠走入屋，向自己既房一直行。
薛媽：「點解無端端咁大件事？」
「老婆。」可正向安兒打個眼色，示意叫安兒輞撫一下靜悠。
可勇：「我做過乜？」
聽到可勇既問題，靜悠停住腳步，轉身望住可勇，安兒想行近靜悠身邊，但俾靜悠用右手示意停低。
靜悠：「奶奶，我頭先打電話俾妳，妳話薛可勇幾點返屋企？」
薛媽：「下？咪九點幾囉。」
靜悠：「九點幾，薛可勇，你由尖沙咀返屯門要四個幾鐘？你行返嚟呀？」
聽見靜悠咁樣一問，可勇突然感覺到一股寒意，靜悠知道自己幾多點離開Forever唔係重點，最令可勇恐懼既係，
靜悠係點解會知道？可勇突然諗起，之前靜悠都試過問一啲佢本來就唔應該知既事。
靜悠：「講啦。」
可勇：「我送左個朋友返屋企。」
靜悠：「要送四個鐘頭？」
可勇：「我講乜妳都唔會信。」
靜悠：「係因為你冇嘢可以俾我信。」
薛媽：「可勇呀，你到底又做過乜嘢呀？」
可勇：「我飲醉左，喺巴士站訓到八點幾…」
靜悠：「你呃邊個呀？」
可正：「靜悠，天佑喺度，唔好太大聲？」
靜悠：「哥，咪俾佢睇下佢阿爸做乜嘢囉。薛可勇，我已經冇嘢想同你講，我會返阿媽度住，同埋我要拎返天佑。」
安兒：「講清楚先啦靜悠。」
可勇：「都冇事發生，離乜嘢婚呀？」
「冇事發生？你工又唔正正經經做，一日到黑喺屋企做大爺叫冇事？阿哥叫你搵正經工你唔搵，係要走去做乜鬼睇場叫冇事？你俾人打穿個頭訓左幾耐醫院？轉頭又要走返去果啲鬼地方叫冇事？連我出去做嘢都要好似做賊咁成日怕你嬲呢樣嬲果樣，你覺得我地真係冇事咩？」
可勇：「咁我而家咪有拎錢返嚟囉！」
靜悠：「有拎錢返嚟大哂呀？係咪就可以攬住條女唔返屋企呀？賤人！」
可勇：「我送佢返屋企咋。」
可正：「靜悠呀，妳聽左可勇講先啦。」
靜悠：「哥，你覺得我錯呀？」
可正：「我冇話妳錯，但唔使咁就叫離婚。」
「你地自己睇下。」靜悠拎起電話，電話入面既一張相，係可勇同霜霜離開Forever既背影。
薛媽：「勇呀你衰仔幾時先生性呀？」
靜悠：「點解你出去返工搞埋呢啲咁既嘢我就要冷靜，我只不過叫我表哥返工放工車下我就要成日偷偷摸摸？又要俾你問，又要俾阿哥你走埋去單打我同我表哥幾句，到底而家係邊個做錯？」
靜悠言中有物，可正知道自己上次既行為，原來曾經令靜悠唔高興。
「天佑，媽媽而家返婆婆度，我過兩日嚟接妳，奶奶，麻煩妳幫我睇多天佑兩日。」靜悠走近薛媽同天佑身邊細細聲講，因為佢唔想因為可勇既事而同所有人既關係都變差。
薛媽：「靜悠…」
靜悠：「奶奶，妳都係女人，就算妳覺得我衝突或者其他都好，妳起碼都俾個時間我。」
可勇一直冇出聲，因為佢腦入面依然諗緊，係邊個將呢張相交俾靜悠。
靜悠摸一摸天佑既頭，然後返入房執左幾件隨身既行李就向大門走出去。
靜悠經過可勇身邊，可勇本能咁想拉住靜悠，但靜悠既反應係右手意圖一巴打落可勇既面上，
「啪！」但可正用手將靜悠呢一巴擋住。
可正：「乜嘢事都好，唔好俾天佑叫到妳打可勇得唔得？」
「薛可勇有你呢個阿哥真係唔知好定唔好。」靜悠講完，頭都唔回咁走出大門，同時安兒亦都跟住離開。
可勇垂低頭，望一望天佑，然後再望一望可正，但已經唔識點處理呢件事。
安兒跟住靜悠，一直去到樓下大堂。
安兒：「靜悠呀，妳冷靜啲好冇呀？」
靜悠：「我點冷靜呀？阿嫂呀，而家係薛可勇唔啱，唔通我要忍？」
安兒：「我明白呀，我同妳都係女人，我知道發生呢啲事一定會好嬲同好難過，但唔代表我地唔使為個仔諗，妳地頭先咁嘈法，天佑兩歲開始會聽得明，開始會記得架喇！點解要為一時之氣而令個仔有陰影呀？」
靜悠：「我唔理，我一定要拎返天佑，阿嫂妳叫阿哥同薛可勇講，唔比返天佑我，我地就法庭見。」
安兒：「真係唔可以慢慢傾？」
靜悠：「嫂，妳都同前夫爭緊思倪撫養權，妳應該係最明白我果個呀。」
安兒：「我又點同妳，可勇未有去到咁差。」
靜悠：「我唔想再諗佢好定差，我唔講喇，再見！」