男人唔可以窮 II: 4
球哥：「跟我？你講笑呀？」
可勇：「冇講笑，但我只係做你呢個場既保安，球哥，可唔可以？」
球哥：「點解無端端會咁問我？」
可勇：「你個場賣啲乜大家都知，呢個位又俾幾邊陀地夾住中間位，如果唔係你都唔使放咁多人喺度，我以前喺屯門都做過睇場，想幫球哥做睇場既嘢。」
球哥：「只係做睇場？」
可勇：「係，其他嘢我唔會掂。」
「你當勞工署呀？揀工做？」球哥身邊一個手下向可勇講。
球哥：「高榮，我有分數。」
可勇：「你大佬都冇講嘢你嘈？」
球哥：「勇，你都唔好嘈，你有心跟我，呢班第時就係兄弟，你同我入一入房。」
房入面
球哥：「勇，我同你雖然唔熟，但你細細個我已經見過你，可唔可以話我知有乜嘢理由你會主動想幫我手？」
可勇：「因為我冇錢，我連搵份夠屋企既都冇本事，做出面既工又受氣，我上到嚟呢個地方，先覺得好似係我既世界，我可以留喺度，做我識做既事。」
球哥：「但你又話只係同我做睇場？你知道要搵錢既有其他嘢做。」
可勇：「因為我同以前唔同，我而家有老婆同個仔，如果我又犯事，我就要坐好耐監。」
球哥：「就係咁簡單？」
可勇：「球哥你唔信既可以啲簡單嘢我做先。」
球哥：「我信，如果係既，你後日嚟幫我手得唔得？」
可勇：「冇問題。」
行出房，高榮正正就企左喺門口，見到可勇行出嚟，高榮冇打算避開既意圖，球哥見到呢個情況冇出聲，想睇下可勇會點處理。
可勇諗都唔使諗就用膊頭撞開高榮，高榮正想發難，可勇已經用手指住高榮：
「球哥叫你唔好玩嘢你係要阻住我？如果唔係第時做同事，我而家就要你訓低。」
高榮唔係善類，正想還擊，球哥喺身後面拍一拍佢示意停止。
可勇走左之後，球哥先安撫高榮：
「呢個可勇細個好打得，而家佢嚟幫我地手，都應該唔錯，忍下佢啦，炮仗頸嚟之嘛。」
可勇離開酒吧，落到樓下，正想打電話俾全孝通知佢自己唔再返機場果份工，前面竟然比佢撞到一個熟人 – 潘志龍。
可勇見到潘志龍既時候，潘志龍並未知道可勇既存在，就喺潘志龍由側向可勇直到見到有機會見到可勇果五秒時間內，可勇做出左一個決定。
佢決定藏身喺一個暗角位度避開對方，原因好簡單，因為可勇唔想再俾靜悠知道自己又再去呢個地方。
可勇企喺暗角位，耳一路聽住潘志龍既腳步，心就一直等佢既離開，潘志龍行左幾步，停低打左個電話。
潘志龍：「喂，我見到架酒吧喇，妳係唔係肯定佢係呢度架？係我就上去架喇。
得啦，冇問題，我搵到就打俾妳啦。」
聽到潘志龍既電話，可勇奇怪佢點解又會咁巧合走到去呢度搵朋友，直到可勇聽到潘志龍收線前既一句：
「冇問題，我見到佢叫佢開返電話打俾妳先啦，妳等多陣啦，靜悠。」
「靜悠？」可勇聽到覺得好奇怪，原來潘志龍要搵既人就係自己，但靜悠點解會叫潘志龍去搵自己？靜悠既性格可勇好清楚，盡可能佢都唔會想麻煩其他人，可勇好自然地拎起本來打算打俾全孝既電話，先發現原來電話已經冇電。
「係咪發生左事，靜悠先叫佢表哥搵我？」可勇好擔心咁坐的士趕返屋企，
返到屋企打開大門，屋入面一個人都冇，只有一張紙條放左喺枱面。
可勇一睇，大吃一驚，原來天佑發高燒送左入醫院。
可勇唔知道去左邊一間醫院，但又唔敢打電話俾靜悠，由細到大既本能反應，有事發生，佢都會先搵可正。
可勇打電話俾可正，但電話響左好耐可正都冇聽，正當可勇想收線既時候，可正接電話。
可正：「薛可勇，你去左邊？我打左好多次俾你，你電話都冇電。」
可勇：「哥，天佑點？你地送左佢去邊？」
可正：「靜悠話天佑今朝已經有小小燒，你抱過佢你自己唔發覺架咩？一到夜晚佢就燒得好急，係靜悠搵唔到你打俾我，我送左佢地去法國醫院，阿媽都喺度，一陣你嚟到唔好再同靜悠嘈，知唔知？」
可勇：「我知，我而家趕過嚟。」
大半個鐘後，可勇趕到醫院，行到去病房前，可勇突然停低腳步，因為佢唔知道房入面既情況。
就好似小朋友做錯事一樣，可勇評估房入面每個人對自己既態度係點樣，佢最擔心既係靜悠，可勇覺得好糾結，自己只不過係冇返一日工去左酒吧搵第二份工，但就係因為電話冇電，搞到要俾人公審一樣。
可勇鼓起勇氣，打開門，私家病房入面有六個人，靜悠、薛媽、可正、安兒、天佑，仲有一位護士。
除左護士同天佑之外，其他四個人既眼光同時望向可勇，可勇個心好驚，但佢更擔心天佑既情況。佢走近床邊，護士啱啱幫天佑量完體溫。
可勇：「姑娘，點呀？」
護士：「你係？」
靜悠：「佢係病人爸爸。」
護士：「哦，小朋友已經退左小小燒，而家唔算高燒。」
可勇：「唔該…」
可勇眼尾見到薛媽憤怒既表情，知道自己難逃一劫，好在呢個時候可正將薛媽拉開，然後安兒走近靜悠身邊：
「傻妹，冇事喇，你睇天佑塊面都冇咁紅，
係呀可勇，你去買小小嘢食俾靜悠，佢仲未食。」
可勇：「哦阿嫂…老婆…妳食乜嘢？」
靜悠：「我唔食喇，可勇，我有小小嘢同你講。」
安兒：「靜悠…」
靜悠：「得架喇。」
靜悠示意，安兒立即離開房間，房入面，就只係剩返可勇一家三口，
仲有死寂既氣息。
靜悠：「可勇，表哥最近轉左去一間做金既公司。」
可勇：「係咩？」
靜悠：「屋企已經冇太多錢，我已經應承左表哥，下個月會出返去打工，去佢公司幫佢跟大陸既客。」
聽完靜悠既說話，可勇並無出聲，佢只係心入面一直盤算。
其實早在兩年前，當可勇離開宏訊轉返去做運輸果日開始，佢哥哥薜可正都已經問過薛媽可勇會唔會唔習慣。
因為可正知道當一個男人試過一個月搵六位數字既收入之後，要返去一份平淡而冇亮點既工作，係一件非常辛苦既事。
事實上呢兩年幾可勇根本冇習慣過，每日刻板既工作對佢嚟講毫無激發力，呢個世界上有好多人都一樣，要切合到自己本身最大既優點，佢先會勇往直前咁去完成件事；如果做果一樣嘢本身就唔可以得心應手，又或者係連自己都覺得唔適合，呢類人就會好似大懶蛇一樣，每日得過且過，不思進取。
而可勇覺得自己呢一條大懶蛇，應該可以從球哥呢一份工作入面蘇醒，變返最意氣風發時候既自己。
靜悠要出去工作最大理由就係可勇一直以來工作上既不穩定，所以可勇呢一刻覺得，
只要盡快搵到一筆錢交到靜悠手上，佢就可以勸服靜悠繼續留喺屋企，所以可勇冇選擇拒絕靜悠。
可勇：「得啦，呢啲事遲小小先再傾，而家等個仔冇事先。」
靜悠：「你今日去左邊？個電話點解冇開？」
可勇：「我撞返個朋友球哥之嘛，阿栽都識，同佢去左飲茶，個電話又冇電，先唔知個仔有事…」
靜悠：「你同奶奶返屋企先，安兒今晚陪我。」
可勇：「俾我陪妳啦，阿嫂都要返去湊天迪。」
靜悠：「天迪交左俾佢媽咪睇，你唔好煩住我地兩個女人傾計啦好冇？」
可勇：「咁我同阿哥阿媽返去先，妳有事記得打俾我。」
車程中，薛媽又程序上將可勇鬧一個狗血淋頭，可勇冇反駁，只係一直唔出聲，諗緊靜悠去幫潘志龍公司既事。
可正：「媽，妳休息下，返到去我妳。」
薛媽：「我冇氣鬧你細佬呀，你同我鬧醒佢，做左人阿爸仲成日走左出街。」
可正：「可勇，有冇嘢同阿哥講？」
可勇：「哥，記唔記得以前安定邨果個球哥？」
可正：「球哥？……點會唔記得？果時仲成日同你仲有阿栽兩兄弟見到佢。」
可勇：「呢排見返佢，出嚟行好似幾身光頸靚，同佢傾過幾次計。」
可正：「佢出嚟行，你有乜同佢傾？」
可勇：「佢叫我去佢間酒吧度，幫佢打理下，睇住個地方。」
可正：「咩話？」
可正細細聲，然後由倒後鏡望一望已經熟睡既薛媽再講：
「咁你點答？」
可勇：「我應承左佢。」
可正：「咩話？」
可正本能咁望一望可勇，然後車後面就聽到『砰』一聲，一間私家車唔知點解由左邊一撞撞向可正既車，強大推力令可正既車猛烈咁震左一下，車尾燈既玻璃完全碎哂。
「哇！」薛媽大叫一聲嚇醒
可勇：「媽妳有冇事呀？」
「有冇搞錯呀？」可正落車，發現後面既車入面都走出兩個十八、九歲既年青人。
可正：「你個牌買返嚟架？」
年青人甲：「喂，你冇端端剎車關我咩事呀？」
可正：「點呀？賠定報警？」
年青人乙：「你賠俾我呀傻仔？」
「你講咩呀？」可勇呢個時候落車，一步一步走向果兩個年青人。
年青人乙：「嚇鬼咩，叫人嚟囉。」
「可勇！」二十幾年既感情，可正已經知道可勇下一步想做乜嘢事，立即衝過去可勇身邊，可惜已經太遲…
「我一個搞掂你地啦叫人。」『砰』一聲，可勇一半將年青人乙既鼻樑，徹底咁打爆左…
「嗚…」一條鼻血由年青人乙面上激射出嚟，然後佢就好似一堆爛泥咁撻喺地下，年青人甲見到阿乙既慘況，嚇到完全唔識反應。
「你兩條契弟嚇親我老母仲咁大聲？」可勇大叫，走埋阿甲度想梅開二度。
「夠喇，可勇。」可正拉住可勇右手，阻止佢再走向年青人甲身邊。
「咪拉住我啦。」可勇右手一撥，將可正推開，人已經向年青人甲衝埋去。
「頭先你兩個咪好威既？連你兩個都恰到我，我仲使見人。」可勇口入面唸唸有詞，兩個拳頭已經向年青人甲瘋狂咁打，可正再次上前拉住可勇，可勇被拉走之前再向年青人甲個頭踢多一腳。
「放手呀？」可勇回頭，可正一見到可勇既樣，心入面覺得一陣寒意。
可勇呢一個兩眼通紅，整個人好似進入左瘋狂狀態既樣，可正差唔多四年前見過一次，就係可勇犯事，喺差館可正打左可勇一巴果次。
坐完監之後，可正冇再見過可勇呢個狀態，佢以為佢弟弟已經隨住時間而令性格改變左，但可正呢一刻先醒覺自己諗法錯左，可勇好勇鬥狠既性格冇改變過，改變既，只係可勇一直以嚟既自我價值。
當一個人自我價值低既時候，自身性格上既短處就會好刻意咁隱藏；但當自我價值標升，缺點，就會不知不覺咁暴露出嚟。
正當可正猶豫之時，薛媽都落左車，阻止可勇。
薛媽：「可勇，呢度公路嚟，搞到咁大件事做乜嘢？」
可勇：「阿媽你返上車先啦，哥，你想條友賠幾多？」
可正：「你打到佢地咁仲賠乜？」
可勇：「唔打佢地肯賠？」
可正：「人地有差佬經過你賠返俾人就差唔多呀。」
可勇：「咁你架車點呀？」
可正：「尾燈整得幾多錢呀？行啦，成世人都牛脾氣。」
可勇：「你扶阿媽，我幫你渣。」
可正：「渣慢啲呀。」
「你兩條契弟唔妥就落Forever搵我，收唔收到呀？」可勇離開之前，指住兩個年青人大鬧。
『洪~~』上車後，可勇一言不發咁渣車，而可正同薛媽對望後亦都冇講半句說話，因為佢地都為剛才可勇既表現而擔心，兩個人既心入面都浮起左同一個問題。
可勇，係咪已經故態復萌…？
天佑第二日就已經出左院，今次可勇格外小心咁一早就接天佑同靜悠一齊返屋企，可勇由酒吧同球哥傾好果一刻開始，心情就變得愈來愈好。以前佢因為自卑，個人搵唔到目標而討厭所有外來既事，無論邊一個人同佢講任何勸導既說話，佢都覺得煩覺得係廢話。
原因好簡單，係因為可勇搵唔到出口。
一個男人長期搵唔到足夠既金錢去應付生活開支，自自然然四周所受既壓力就會增加，自我價值就會愈來愈低，所隱藏既怨氣就會慢慢增加。
直到呢個男人，可以再搵得返一個，佢認為可以宣洩既出口。
可勇覺得，只要佢盡快去到球哥既酒吧入面搵到佢想要既錢，靜悠就會打消幫潘志龍做嘢既決定，所以直到返新工之前，可勇都冇故意去講任何解釋說話，亦冇向靜悠講自己轉工既事，只係想盡快去完成自己既目標。
第一晚，可勇返到去Forever，見到球哥已經一早到左。
球哥：「可勇，咁早既？」
可勇：「我怕唔熟個環境，咪早少少返嚟學嘢。」
球哥：「好喇，高榮，你去教可勇。」
可勇：「球哥……」
球哥：「可勇，你跟得我，同高榮之前既事就抹左佢，大家以後一齊拍住上。」
高榮：「行啦，可勇。」
可勇：「高榮哥，咁以後睇住我喇。」
然後高榮就帶可勇喺Forever行左一個圈，連之前可勇未去過既職員房都行左一圈。
高榮：「可勇，總之地形你就自己記住，球哥話你唔會掂佢既生意，所以你只係負責保安，其實要做既事就唔多，你都知道我地呢個位係幾條街既陀地交匯處，好多其他社團既大佬好多時都會上嚟玩，第一，盡量同佢地交際下，我地打開門做生意既，一定要招呼得人地開心。
但如果有邊個大佬係上嚟玩嘢搞事，我地一般都係首先請佢走，真係唔得先再諗方法，總之打交就係最尾先諗，唔好郁啲就打人。」
可勇：「大家出嚟玩既，飲大兩杯嘈起上嚟好難唔打交架喎。」
高榮：「所以咪要有我地既存在囉，但球哥話，如果見到有人喺我地個場散貨既，唔使講，即打，打到佢下次唔敢嚟為止。」
可勇：「呢個就簡單啦，我明架喇。」
高榮：「明你就同小妖今晚睇後門啦，成日好多人走數由後門偷走架，所以要睇緊呀，仲有呀，如果見到樂芝姐同其他人玩得好埋，記得話俾我知。」
可勇：「話俾你知？點解唔話俾球哥知？」
高榮：「球哥係咩輩份？呢啲事我地自己處理返就得架喇。」
可勇：「我明架喇，我去邊度搵小妖？」
高榮：「你過去先，我叫佢嚟搵你啦。」
第一晚，可勇好順利咁完結左第一日既工作，跟住既兩日，Forever都係風平浪靜，可勇覺得呢一份係非常好既工作，每日返到去飲下酒，同客傾下計，好簡單就可以搵到兩萬二千蚊一個月。
第三晚，可勇向高榮講左一番說話。
可勇：「喂，呢份工都幾易做。」
高榮：「係咩？遲小小你就明。」
可勇當時以為高榮只係危言聳聽，但兩日後，高榮既說話終於兌現左。
兩日後
可勇：「喂，放手呀。」
靈芝：「喂我話陪你飲酒冇話同你去街喎。」
大漢：「飲我幾支黑牌，成晚要我猜，而家先話只係同我飲酒？你玩我呀？」
高榮：「先生，呢個係我阿嫂，唔該你放一放手，一陣到我老闆返嚟盞大家冇癮。」
大漢：「冇癮？我而家都好冇癮呀！」
大漢明顯已經爛醉，完全聽唔到其他人既說話，可勇呢個時候已經失去耐性，一手好大力咁扯住大漢衣領，近距離向大漢大聲問：
「我而家問你，放唔放手？」
大漢：「我鐘意放又得，唔放又得。」
「咁你唔使放喇。」『澎喇』一聲，可勇右手已經拎起一個黑牌酒樽，重重咁轟左喺呢個飲醉左既大漢頭上面。
由可勇拎起酒樽直到打落去醉酒佬個頭之前一刻，都冇經過任何思考，因為佢覺得係順理成章既事。呢度由我薛可勇管理，你嚟搞事，我一定要將你擺平。
直到酒樽由醉酒佬頭上面爆開果一下巨響，可勇腦入面好似突然之間發出一下尖叫聲，將佢由失控既情緒，帶返到嚟現實世界。
返到現實世界既第一個畫面，就係一個頭破血流既人用一對好怨恨既眼望住自己，然後呢個人就慢慢咁訓低左。
樂芝：「嘩！好多血呀！」
醉酒佬既血泊加上樂芝既大叫，令到酒吧入面既其他顧客開始緊張，雖然酒吧爭執經常都會發生，但流血事件就表示一定會有麻煩。
高榮：「可勇，你傻左咩？就算你要爆佢都唔係爆黑牌啦，個底咁厚分分鐘會死人架，是但拎個啤酒樽咪得囉。」
可勇：「而家唔爆都爆左，可以點？」
高榮：「得喇你去洗下個身既血跡先，洗完你走先，一陣有差佬上嚟我識搞。」
可勇：「下？咁就得架喇？」
高榮：「行啦。」
可勇跟住高榮既吩咐，由後門離開酒吧，跟住一直由山林道經過金馬倫道行到去尖東，人一邊行，一邊回憶自己頭先所做既行為。頭先係佢近來第一次個腦入面有一把會尖叫既聲音，呢把聲就好似提點可勇，想佢諗清楚自己到底係唔係揀緊一條正確既路。
行到去海傍，就喺可勇當日同靜悠結婚既尖沙咀中心對面，可勇停低左，望住尖沙咀中心既外牆，佢先驚覺時間原來過得咁快。
原來咁快佢同靜悠已經結左婚兩年幾；原來咁快佢已經離開左自己爸爸兩年幾，所有事都好似轉變得太快，太快，
當日佢哥哥薛可正都試過滿懷心事咁走過呢一條海傍既路。而今日，可勇又再一次喺呢條路上面百感交雜。
可勇坐左喺路邊，拎左部手提電話出嚟，考慮左一分鐘，然後打電話俾靜悠。
靜悠「喂。」
可勇：「老婆，妳做緊乜？」
靜悠：「洗衫。」
可勇：「我有時間所以睇下妳做緊咩…」
靜悠：「嗯。」
可勇：「天…」
靜悠：「天佑醒左，我唔講住，拜拜。」
可勇失望咁收線，呢一次已經唔知道係靜悠對自己第幾次既冷言冷語，可勇無辦法去令自己好輕鬆咁釋懷。
每一次靜悠用呢個態度對待自己，可勇就覺得自己已經變得一無所有，正正就係呢種催化劑，將可勇帶返去果個令佢充滿信心既黑夜世界入面。
每個人都會問自己到底係唔係一無所有，只係次數頻繁有別而且。
爆樽一事令球哥吩咐可勇停工兩日，呢兩日可勇都選擇左留喺屋企，因為可勇已經意識同靜悠既感情問題需要緩和，所以佢希望用呢兩日時間可以陪靜悠好好咁過。
可惜，最後既結果係，呢兩日靜悠留喺屋企既時間係非常之少，根據薛媽口中所講，靜悠係為左新工作準備，而天佑亦都正式由薛媽照顧。
可勇呢兩日都搵唔到時間向靜悠問個明白，就算連打電話俾靜悠亦都搵唔到佢，每晚靜悠返到屋企，都係敷衍可勇兩句就好快咁訓覺。
兩日後既呢個朝早，當可勇清晨七點起身去廁所既時候，已經見到靜悠著住整齊既行政套裝準備返工。
可勇：「老婆，妳返工？」
靜悠：「係，奶奶會湊天佑，你訓啦，你要返工未？」
可勇：「今晚…」
靜悠：「咁仲有大把時間，你訓啦。」
可勇：「妳返邊度？我去接妳好冇？」
靜悠：「今日係表哥車我返工，聽日先接，好冇？」
可勇：「好，咁妳順順利利。」
靜悠：「知喇，我走喇。」
靜悠走左之後，可勇就算點樣都再訓唔著，等到下晝一點，可勇起身，決定打電話俾球哥。
可勇：「球哥，我今晚返得工未呀？」
球哥：「應該冇問題，上次單野高榮話應該冇手尾跟，可勇，我多謝你幫樂芝解圍，但如果下次呢個情況，記得唔好咁衝動，酒吧係生意地方，你打拳頭交好地地，但一見紅就好影響到做生意，知唔知呀？」
可勇：「知喇球哥。」
同球哥收線之後，可勇仍然係好糾結，佢選擇再打多一個電話，搵一個佢覺得好可靠既人 – 薛可正。
可勇：「哥。」
可正：「咁早既？你唔係幫個球哥做嘢咩？」
可勇：「冇返兩日。」
可正：「靜悠唔鐘意？」
可勇：「佢今日返左新工。」
可正：「我有聽阿媽講。」
可勇：「阿媽冇同我講。」
可正：「阿媽話你大脾氣，都唔識同你講嘢。」
可勇：「我一向都係咁架啦，而家先知咩。」
可正：「可勇，你到底幾耐冇自動自覺去關心一下你自己身邊既人？」
可勇：「哥，我都唔知可以點講，以前未結婚都未試過，而家做左兩夫妻之後，真係好多時成日時間都唔會講半句說話。」
可正：「就係難先要放心機，唔係你結婚為左乜？真係為左個仔先結呀？」
可勇：「我都唔知係唔係我地了解未夠…」
可正：「唔好作呢種假設性既原因俾自己好冇？可勇，你係我細佬，由細到大我都知你從來都唔會花時間喺人同人之間既關係入面，所以而家你唔識處理同靜悠既問題係好正常。」
可勇：「我有問佢，佢成日都十問九唔應。」
可正：「邊個人發脾氣會講原因先發架？仲要係女人，之前靜悠嬲妳係咩事連我都知啦。」
可勇：「我果時有同佢講我只係一段短時間搵唔到工做之嘛，佢就以為我成世都唔做嘢咁。」
可正：「咁你一段短時間唔食飯得唔得呀大哥？你屋企仲有個細架，就算我同阿媽唔使你同靜悠交水電煤，你都仲有個仔要，你自己就大安旨意以為船到橋頭自然直，唔係你老婆晚晚唔訓走去搞網拍，你估真係搞得掂？靜悠咁俾比機搵錢都係想幫你她返多少面子，你咁大個人失業點解你都當係小事？」
可勇：「你估我想…」
可正：「我知你冇左份工我都有責任，但你自己賭到周身都係債呢樣嘢就唔關任何人事。可勇，靜悠雖然年紀細，但佢做左阿媽之後真係好識諗。呢樣嘢係你阿嫂教我，兩個各自生活左廿幾年既人，突然之間要住埋一間屋過下半世，係冇可能冇拗撬，最重要係睇你地點樣去處理呢啲問題。」
可勇：「阿嫂有冇同靜悠傾過？」
可正：「佢地女人一定有傾過啦，但你阿嫂把口好密，一句都唔同我講，不過女人傾得就代表一定有心事想解決，你記得自己執生。」
可勇：「明喇。」
可正：「新工做成點？你記得做睇場好喇，唔好掂衰嘢，你自己應承過阿爸既事你自己記得。」
可勇：「係呀，我自己知架喇。」
可正講既道理，可勇其實唔係太能夠消化，可能佢未試過薛可正失去以娜果種經歷。佢就好似薛可正以前咁橫衝直撞，用自己既直覺去行事，就算身邊有幾多人勸佢，佢都只會當係前路上面既一塊石頭。
佢了解薛可正所講既道理係有可能存在，但令到靜悠冷淡，又或者係令到佢要再出返去做嘢既原因，可勇強烈地認為，只不過一個錢字。
解決錢既問題，最直接既方法，就係用最快既途徑，搵更多既錢。
復工既第一晚，可勇從樂芝口中得知，某一個夜場既經理爭球哥一條好耐既數，兩個鐘頭後，可勇走入球哥既房，主動向球哥提出一個要求：
「球哥，我知羅馬城有個大班爭你條數拖左你好耐，我幫你收，得唔得？」
球哥：「收數？邊個同你講？」
可勇：「樂芝，佢話俾我知果個大班拖左你好耐。」
球哥：「我唔知阿芝點解要同你講，但呢條數你唔會收到。」
可勇：「球哥，俾我試下。」
球哥：「勇，你好等錢用咩？」
可勇：「……唔係。」
球哥：「你唔好以為渣住個拳頭行埋去嚇下鬼就可以幫我收到條數，呢個世界好大，如果是但搵一個一味牛脾氣爆下樽既人就可以收到條數，我唔會到而家都未收到返嚟，呢條大班叫麻哥，佢親生細佬係新記呢排最紅果個潮哥，你知唔知人地乜嘢料？」
可勇：「唔知。」
球哥：「人地食個飯都六七個人喺隔離，可勇，你唔好再以為牛頸就可以解釋問題，牛頸只會係製造問題架咋。」
可勇：「球哥，除左犯法既事，你可唔可以俾多啲機會我？」
球哥：「勇，你知我最賺錢係做乜生意，你話你講既嘢有冇可能發生？」
可勇：「咁當我冇講過。」
球哥：「勇，你到底係唔係等錢用？」
可勇：「唔係，冇嘢喇球哥，我出返去先。」
走出門口，可勇咁啱遇到高榮。
高榮：「可勇，你真係去問球哥幫佢收數呀？」
可勇：「你點知架？」
高榮：「樂芝同我講，佢話佢話左俾你聽之後你就走左入球哥房，你問左球哥？」
可勇：「係呀。」
高榮：「球哥點會俾你做丫傻仔，你去果邊撞到麻哥果班人，俾人溶左你都未知呀。」
可勇：「點解球哥咁忌佢地？」
高榮：「唔係忌，係唔想搞到件事咁大，你都知球哥撈乜架啦，樣樣嘢都搞到咁揚搏攞獎咩？條數都係十五皮之嘛，冇必要搞大佢。」
可勇：「十五萬喎。」
高榮：「球哥同麻哥兩兄弟以前都算識架，大家唔同字頭都有講有笑，後來唔知發生乜事，佢地就冇計傾，不過我覺得你又唔使理球哥講乜既…」
可勇：「咩意思？」
高榮：「我地出嚟行既唔係返學考試呀大佬，做乜嘢事都係達者為先架啦，如果你有本事收到條數返嚟，唔通球哥會鬧你咩。」
可勇：「你又有道理喎，唔該哂榮哥。」
第二日既下晝四點，羅馬城夜總會既樓下，出現左兩個人，兩個不知天高地厚既人，
蕭全孝，薛可勇。
全孝：「可勇，你肯定要咁做？」
可勇：「條友爭球哥十五個，我地收到既話拎三成都有成五皮嘢，點解唔試？」
全孝：「但我聽家樂講，話呢條麻哥個細佬好把炮，走唔到點算？」
可勇：「欠債還錢呀，唔通佢會隊冧我地呀？我搵個位等下啦，一見條友落單我地就埋去夾佢。」
全孝：「如果有差佬咁點呀？」
可勇：「走囉，驚呀？」
全孝：「坐去公園果邊先啦。」
可勇同全孝走到去夜總會旁邊既一個公園仔，可勇拎住部電話一路睇，電話入面既，就係樂芝傳送過嚟既一張麻哥真人既相。
可勇全神貫注咁望住夜總會既入口，非常、非常咁專心。
而全孝就一直喺可勇既旁邊同唔同既人傾電話，直到…
可勇：「喂收線，好似係果條友。」
可勇用手指向夜總會方向一指，一個拎住行李袋既中年男人正準備走上夜總會既大廈大門。
全孝：「喂，似係喎。」
「行啦。」可勇立即跳過公園仔既離芭，好快咁跟住麻哥既踪跡跑過去。
夜總會本身係位處一座商業大廈既五樓，所以麻哥需要經過大廈既電梯先可以返到去夜總會。
可勇想落手既地方，就係呢部電梯入面。
麻哥呢個時候仍然唔知自己即將有危險，就係咁拎住一個行李袋企喺電梯前面，呢個時候可勇嚟到，若無其事咁企喺麻哥隔離。
而全孝，一早就從樓梯跑上三樓準備。
呢座大廈既三樓，係一個空置左既大單位，而可勇一早喺之前已經嚟視察過，呢部外表好似戰前一樣既電梯，係冇閉路電視既裝置。
可勇打算，會同麻哥走入同一部電梯，然後佢會電梯到達三樓既時候打開門，再同一早已經準備好既全孝將麻哥拉出三樓呢個空置單位，然後用乜嘢方法叫麻哥還錢，可勇依然係未諗到。
佢腦入面仍然係高榮果一句：
「你收到條數，仲有邊個會理你用乜方法。」
諗到呢度，可勇就覺得冇任何事可以阻擋到佢，只要從呢個人身上拎返十五萬俾球哥，佢薛可勇，就可以得到更多機會。
電梯打開，麻哥首先走入電梯，然後可勇亦都尾隨入去。
電梯去到三樓，可勇打開電梯門，突然轉身，右手扯住麻哥既衫領，用盡全力將麻哥拉出電梯，同時全孝亦都走上前幫手。
「喂，邊度呀你地？」
麻哥大叫聲中俾可勇拉出電梯，同時手上既行李袋跌落地下，「躂」一聲，三個人既視線同時望向行李袋，正確小小講，係望住行李袋跌出嚟既一大堆一千蚊紙。