點解我咁靚仔都無女？: 學校女神篇 part3

呢個係一個風和日麗嘅星期六早上，有一位少年正在係屋企進行開聲練習。

｢啦啦啦啦啦啦啦啦｣嘅聲音係窗內傳出，窗外嘅雀仔伴隨住歌聲而鳴叫。

｢終於到咗今日啦！經過呢四日，我已經打好晒我同女神嘅關係｣我心諗，我已經為一陣嘅戰鬥作出咗萬全嘅準備，依家嘅我簡直係第二代嘅周杰倫，絕對可以令班女完全被我嘅歌聲征服。

｢我出去啦｣說罷，我拉一拉高個衫袖，瀟灑哋踏出門外。

沿路上見到不少人都望住我，證明我今日個look真係好掂，睇嚟我今日嘅成功率一定好高，唱完K、食晚飯、送佢返屋企、再表示下自己心意，簡直就完美嘅計劃。





｢Hi，咁早到嘅你｣一位著住白色連身裙搭見黃色外套嘅女性走咗個嚟。

連身裙本身就係身高稍為高少少嘅人而設，係班小矮人埋沒咗連身裙嘅美，今日我終於見到佢真正嘅美，清純嘅裝束加上清純嘅樣貌，今日仲要無帶眼鏡，別有一番滋味，簡直就係仙女下凡，我不禁暗暗自嘆。

｢係阿，我不嬲都會早到嘅｣

｢唉｣女神嘅樣帶住些許無奈咁嘆咗一口氣，繼續講｢佢哋要遲好耐，我哋去先啦｣

what the fuck！天哪，你唔係同我開玩笑呀嘛？我居然有機會同女神獨處。





｢唉，唯有係咁啦｣我克制住自己嘅情緒，唔可以令自己露出一絲麻甩嘅表情。

睇嚟計劃將會比我想像之中更加完美。