點解我咁靚仔都無女？: 學校女神篇 part1
行入嚟嘅係一個婀娜多姿嘅少女，恰好到肩嘅頭髮向內微卷，唔會長到披頭散髮，又唔會短到成個男人咁，瘦削嘅身形配上一條四十吋美腿，簡直就係人間極品，清純嘅面上加多副黑色圓框眼鏡，流露出嚟嘅氣質，簡直係學生妹嘅典範。
佢走坐喺我前面，我相信呢個一定係天意，連個天都認為我哋天生一對，要為我哋牽起紅線，淡淡嘅蘆薈髮香令我神魂顛倒，旁邊個對白痴早就因為雅典娜嘅龐大小宇宙而縮埋一角。
這麽近又那麼遠，明明就坐係我前面，但卻從不對話，若要打破沉默嘅關係，我就必須衝鋒陷陣。
｢喂，咁遲嘅你今日｣火箭成功起飛，我嘅心情就好似人類初次踏足月球咁興奮。
｢係呀，尋晚掛住煲劇所以無點瞓到｣女神把聲好似啱啱訓醒倍覺性感，再加上甜美嘅微笑，真係令人想入非非。
｢係咩，咩劇咁好睇｣我隱藏我心入面嘅想法，繼續對話。
｢x軸與y軸的一瞬間囉，你無睇咩？尋日先播完第十集｣我呢一刻就好似升空到一半嘅火箭，明明無垠嘅宇宙就係我面前，卻因為缺少對宇宙嘅知識而墮下，我每晚都係到溫書，真係從來未睇過電視。
｢哦，咁我今晚睇下啦｣我唯有退出呢個戰場，保留軍力，明日再戰。
｢嗯｣今日我同佢嘅對話，對話就此結束。
返到屋企之後，我九秒九開晒電腦同HKDV個官網睇翻之前嘅集數。由五點一直睇睇到十一點，都只係得個七集，距離完成仲有三集，平時有良好睡眠習慣嘅我，一早就瞓咗，但為咗同女神有流暢嘅對話，我決定繼續睇落去。